Konqresin ermənilərə satılmış üzvləri Trampın dövründə bir-bir vurulur...
Məhərrəm Zülfüqarlı: "Erməni diasporunun maliyyəsi hesabına bəslənən Pallone, Pelosi kimiləri yeni administrasiya tərəfindən cəzalandırılmalıdır"
Prezident İlham Əliyev XII Qlobal Bakı Forumunun açılış mərasimindəki çıxışında onilliklərlə erməni diasporunu dəstəkləyən korrupsiyaya uğramış siyasətçilərdən danışıb.
Prezident bununla bağlı deyib: “...Biz bu məsələləri Ermənistan nümayəndələri ilə, onların Brüsseldə əyləşən yeni rəhbərləri ilə qaldırırıq. İndi onlar böyük qardaşını dəyişiblər. İndi həmin o böyük qardaş Brüsseldir. Prezident Tramp Dövlət Departamentində belə bir addım atdı ki, USAID ləğv olundu, korrupsiyaya uğramış siyasətçi Robert Menendes də cəzalandırıldı. Amma o, sonuncu olmalı deyil. Yəni, necə deyərlər, bir qaranquşla bahar olmaz? Çünki onlar pulları onlardan alıb ciblərinə qoyurlar. Məsələn, cənab Adam Şif, cənab Frank Pallone, xanım Nensi Pelosi və bir çox digərləri. Onlar onilliklərlə erməni diaspor təşkilatlarından ABŞ-da o pulları alırdılar ki, Azərbaycana hücum çəksinlər, gözdən salsınlar”.
"Bu siyasətçilər sözün əsl mənasında korrupsiya girdabına batıblar və çoxu özü özünün sonunu gətirib"
Professor, siyasi ekspert Məhərrəm Zülfüqarlı "Bakı-Xəbər"ə şərhində bildirdi ki, Prezident İlham Əliyev doğru deyir, erməni diasporu və lobbi təşkilatları ilə əlbir işləyən şəxslərin hamısı cəzalandırılmalıdır. M.Zülfüqarlı qeyd etdi ki, illərlə erməni diasporunun pulu bu şəxslərin cibinə axıb və bu üzdəniraq siyasətçilər o pullara görə Azərbaycanı hədəfə alıblar. Bayden administrasiyası dönəmində ABŞ Dövlət Departamentində korrupsiyaya bulaşan adamların hər birinin layiqli cəzasını almalı olduğunu deyən M.Zülfüqarlı hesab edir ki, onlar ABŞ-ın dövlət maraqlarına da zidd davranıblar. "Prezidentin dediyində böyük həqiqət var. Neçə illərdir erməni diasporundan maliyyə alan Qərb təşkilatları Azərbaycana qarşı düşmən mövqeyi sərgiləyib. Həmin qruplar Azərbaycanı nisbətən zəif salmaq, burda öz siyasətlərini həyata keçirmək məqsədi güdüblər. Burda, təbii ki, erməni diasporunun maliyyəsi rol oynayıb.
Bu siyasətçilər sözün əsl mənasında korrupsiya girdabına batıblar və çoxu özü özünün sonunu gətirib. Məsələ burasındadır ki, USAİD də, ABŞ Dövlət Departamenti də, bəzi konqresmenlər və siyasilər də uzun illər boyu erməni lobbisinin pulu ilə bəsləniblər və Azərbaycana qarşı mövqe tutublar. Onlar bizi Qarabağdan köçüb getmiş ermənilərin haqqını pozmaqda ittiham edirlər, guya ermənilərin hüquqları pozulub. Bütün bu məsələlər Bayden administrasiyası dönəmində daha geniş yayıldı".
M.Zülfüqarlı qeyd etdi ki, Azərbaycana və qardaş Türkiyəyə münasibət eyni cür olub, hər ikisində də erməni kartından istifadə olunub.
M.Zülfüqarlının sözlərinə görə, Trampın bu gün həmin qüvvələrə qarşı müharibə elan etməsi göstərir ki, onların heç biri cəzasız qalmayacaq: "Erməni diasporunun maliyyəsi hesabına bəslənən Pallone, Pelosi kimiləri yeni administrasiya tərəfindən cəzalandırılmalıdır. Çünki onlar həmin pullarla Azərbaycanın daxilinə də nüfuz etmək istəyiblər, vaxtilə müəyyən QHT-ləri və media qurumlarını maliyyələşdiriblər ki, öz çirkin niyyətlərini həyata keçirsinlər. USAİD-in rəhbəri Samanta Pauer də cəzasını almalı olanlardan biridir. ABŞ büdcəsini talayıb, boğazına qədər korrupsiyaya batıb.
Azərbaycan Prezidentinin çağırışları çox əhəmiyyətlidir. Biz yaxın gələcəkdə o korrupsionerlərin də cəzalandırılacağını görəcəyik" - deyə M.Zülfüqarlı qeyd etdi.
İradə SARIYEVA
