Müstəmləkəçilik cəhdlərinin artdığı müasir dünyada işğalı sonlandırmaq, separatçılığı və terroru bitirmək ən zəruri şərtlərdən biridir. Amma bu istiqamətdə istənilən nəticələrə nail olunmasını əngəlləyən hallar da var. Bunun bariz nümunələrinə dair misalların sayı yetərincədir. Elə Azərbaycan buna ən yaxşı misaldır.
Azərbaycan torpaqlarının Ermənistan tərəfindən 30 il davam etmiş işğalına, 1 milyondan artıq soydaşımızın Ermənistanın etnik təmizləmə siyasəti ilə üzləşərək öz doğma torpaqlarından didərgin salınmasına, şəhərlərimizin, kəndlərimizin dağıdılmasına, tarixi, mədəni və dini abidələrimizin yerlə-yeksan edilməsinə Qərb dünyası susdu. Bu fonda Azərbaycanın ötən ay həyata keçirdiyi antiterror tədbirləri regional sülh, təhlükəsizlik və sabitlik qarşısında dayanan ən böyük maneə olan aqressiv separatizmi aradan qaldırdı. Ardınca Qarabağ bölgəsində yaşayan erməni sakinlərin Azərbaycan cəmiyyətinə reinteqrasiyası, burada sosial, humanitar, iqtisadi və infrastruktur məsələlərinin həlli istiqamətində tədbirləri ölkəmiz uğurla davam etdirdi və etdirir. Amma buna rəğmən, Qərb ərazi bütövlüyü və suverenlik kimi prinsiplərə hörmətsizlik nümayiş etdirir, aqressiv separatizmə tam şəkildə dəstək göstərməklə, regionda uzunmüddətli sülh və sabitliyin bərqərar olması istiqamətində göstərilən səylərə mane olur. Qərb dairələri tərəfindən əsassız şəkildə Azərbaycan “etnik təmizləmə” siyasəti həyata keçirən ölkə kimi təqdim edilir. Bu hal Avropa Parlamenti, Avropa İttifaqı, Fransa, Niderland, Almaniya və digər bəzi ölkələrin mövqeyində aydın görünür. Bununla Azərbaycanın sentyabrın 19-20-də həyata keçirdiyi lokal xarakterli antiterror tədbirlərinin məram və məqsədləri təhrif edilərək, ölkəmizə qarşı əsassız iddialar səsləndirilir. Həmin tədbirlərin Azərbaycana qarşı davam edən hərbi təhdidlərin aradan qaldırılması və qanunsuz hərbi birləşmələrin mövcudluğuna son qoyulmasına yönəldiyi gözardı edilir. Bu fonda isə Ermənistan baş naziri Nikol Paşinyanın Avropa Parlamentindəki yalan dolu çıxışı alqışlanır. Erməni politoloq Alen Gevondyan qeyd edir ki, avropalılar Nikolu alqışlayanda çox səmimi idilər. Çünki öz ölkəsini Qərbin maraqları naminə qurban verən şəxsə başqa cür münasibət göstərə bilməzdilər. Paşinyan özü isə Avropa Parlamentindəki çıxışı ilə Azərbaycanın yaratdığı tarixi şəraiti, imkanı düzgün qiymətləndirə bilmədiyini göstərdi. Paşinyan Avropa Parlamentində çıxış edərək birtərəfli, heç bir reallığa əsaslanmayan, heç bir məntiqə sığmayan mülahizələr irəli sürdü. Ən faciəli məsələ ondan ibarətdir ki, guya Rusiyanın əsarətindən çıxmaq cəhdini göstərən Ermənistan Qərbin əsarəti altına düşmək üçün aciz qalaraq yalvarır. Pul, vəsait, kömək, hansısa dəstək ermənilərin dilindən düşmür. Bundan istifadə etməyə çalışan Qərb isə məsələyə ikili standartlardan yanaşıb, Ermənistana ardıcıl maliyyə və humanitar yardımının göstərilməsi, silahlandırılması istiqamətində addımlar atır. Paşinyan başda olmaqla Ermənistan rəsmilərinə edilən siyasi reveranslar, Azərbaycanın isə əsassız yerə ittiham edilməsi Qərbin ikiüzlülüyündə, ikili standartlarında və riyakarlığında heç bir şübhə yeri qoymur.
Bütün bunların fonunda ikili standartlar siyasəti xüsusi mənfi çalarda görünür. Rəsmi Bakı da dəfələrlə bəyan edib ki, Avropa İttifaqının bölgədə sülh və sabitliyin bərqərar olması, Ermənistanla sülh prosesi üzrə danışıqlara verdiyi dəstəyi yüksək qiymətləndirir. Lakin bunun əvəzində Avropa İttifaqının qərəzli mövqeyi ilə üzləşir. Qərbin Azərbaycana qərəzi Ukrayna-Rusiya, İsrail-HƏMAS müharibəsi fonunda da açıq-aydın görünür. Sual yaranır, ermənilər minlərlə Azərbaycan vətəndaşını qırıb öz yurd-yuvasından didərgin salanda niyə dinc azərbaycanlılara dəstək olmadınız? Ukrayna, İsrail vətəndaşlarının taleyinə isə biganə qalmadınız. Bu gün Qərbdə Azərbaycanın iştirakı olmadan keçirilən tədbirlərdə Nikol Paşinyanın və digər ermənipərəst rəsmilərin çıxışı Qərbin sülhsevərlik və vasitəçilik missiyalarına şübhələri artırır. HƏMAS-İsrail müharibəsi də Avropa İttifaqının təqdim etdiyi sülh platformalarına inamsızlıq yaradır. Qərb yenə də Ermənistana hər cür dəstək verir. Paşinyanı Avropanın müxtəlif təsisatlarında Azərbaycana qarşı qışqırdan, üzərinə götürdüyü öhdəlikəri yerinə yetirməməsi üçün rəsmi İrəvana şərait yaradan Qərbdir. Qanunların işləmədiyi, demokratiyanın olmadığı Ermənistana beynəlxalq təşkilatların loyal münasibəti, bəzi təşkilatların ölkəmizə qarşı ənənəvi təxribatları, təsir və təzyiqləri, Azərbaycanda ən xırda məsələyə reaksiya ikili standartlardır. Azərbaycan hələ də selektiv yanaşmadan və ikili standartlar siyasətindən ən çox əziyyət çəkən ölkələrdən biridir. Azərbaycan dövlətinin faşist, işğalçı, terrorçu, talançı və qarətçi Ermənistan üzərindəki şanlı qələbəsindən sonra isə Qərbin ikili standartları daha kəskin xarakter alıb. Amma Azərbaycan yenə regionda yeni əməkdaşlıq formatlarının təşəbbüskarı kimi çıxış edir. Halbuki, Qərb Cənubi Qafqaz regionunda gərginliyi artırmaq, onu geosiyasi rəqabət məkanına çevirmək istəyir və bunun üçün Ermənistandan istifadəni hədəfləyir.
Samirə SƏFƏROVA
