Avropa Şurasının Baş katibi Mariya Pejçinoviç Buriçin Azərbaycanın Qarabağ bölgəsindəki erməni sakinləri üçün təchizat məsələsi ilə bağlı 28 iyul tarixli qərəzli bəyanatına cavab olaraq, Qərbi Azərbaycan İcması Avropa Şurasının Ermənistanın fırıldaqçı təbliğatını dəstəkləməsindən və ikili standartlar nümayiş etdirməsindən ciddi narahatlığını bildirir.
Bu barədə Qərbi Azərbaycan İcmasından məlumat verilib.
Bildirilib ki, Azərbaycanın Qarabağ regionunda yaşayan ermənilər üçün tədarük məsələsi Ermənistanın beynəlxalq rəyi çaşdırmaq üçün ortaya atdığı cəfəngiyatdır. Belə ki, Ermənistanın göstərişi ilə bir qrup separatçı cinayətkar Azərbaycanın digər bölgələrindən Azərbaycanın Qarabağ bölgəsində ermənilər yaşayan məntəqələrə gedən yolları bağlayaraq, Ermənistandan nəzarətsiz şəkildə tədarük üçün eksklüziv yol tələb edirlər. Azərbaycanın Qarabağ bölgəsində 10 minlik hərbi kontingenti üçün hər vəchlə təchizat yolu axtaran Ermənistan bu mənfur cəhdləri ilə Azərbaycanı şantaj etməyə, Azərbaycanın sözügedən ərazisi üzərində suverenliyini zəiflətməyə və orada separatizm meyllərini gücləndirməyə çalışır.
Ermənistanın “humanitar böhran” barədə saxta rəvayətlərinin Avropa Şurasının son bəyanatında öz əksini tapması təəssüf doğurur.
Ermənistanın etnik təmizləməsindən əziyyət çəkən yüz minlərlə azərbaycanlını özündə birləşdirən Qərbi Azərbaycan İcması 1980-ci illərin sonu və 1990-cı illərin əvvəllərində Ermənistandan və Azərbaycanın işğal olunmuş ərazilərindən zorla qovulmuş bir milyona yaxın azərbaycanlının çəkdiyi iztirablara məhəl qoymayan Avropa Şurasının ikili standartlarını və riyakarlığını sərt şəkildə qınayır. Xatırladaq ki, Ermənistan kütləvi qovulma və etnik təmizləmə qurbanı olan Qərbi azərbaycanlıların hələ də öz ata-baba yurdlarına qayıtmaq hüququnu rədd edir:
“Özünü “insan haqlarının qoruyucusu” adlandıran Avropa Şurası Ermənistanın etnik təmizləmə siyasətinə məruz qalmış yüz minlərlə azərbaycanlının hüquqlarına biganəliyi fonunda, sözügedən saxta “humanitar böhrana” dərhal diqqət yetirməsi onun qərəzliliyini ortaya qoyur. Bu, Şuranın Nizamnaməsində, İnsan Hüquqları üzrə Avropa Konvensiyasında və Ümumdünya İnsan Hüquqları Bəyannaməsində təsbit olunmuş məqsəd və prinsiplərə ziddir.
Avropa Şurası qovulmuş azərbaycanlıların Ermənistandakı evlərinə qayıtmaq hüquqlarını fəal şəkildə müdafiə etməli və onlara qarşı törədilmiş ədalətsizliyin aradan qaldırılmasına töhfəsini verməlidir.
Biz Avropa Şurasını öz mövqeyinə yenidən baxmağa, Ermənistanın yalançı təbliğatını rədd etməyə, azərbaycanlılara qarşı nümayiş etdirdiyi qərəz və ayrı-seçkiliyə son qoymağa və ədalətə sadiqliyini qorumağa çağırırıq”.
Göründüyü kimi, bıyanatda AŞ-yə ədalətli olmaq, ikili standartlardan əl çəkməklə bağlı çağırışlar edilir. Bütün bunların fonunda Avropa Şurasinı öz mövqeyinə yenidən baxmağa necə məcbur etmək olar?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Qərbi Azərbaycan İcmasının Avropa Şurasına müraciəti mühüm addımdır: “Bu cür müraciətlər digər beynəlxalq qurumlara da ardıcıl olaraq edilməlidir. Ancaq bir müraciətlə Avropa Şurasının Azərbaycana qarşı tutduğu ədalətsiz mövqeyi dəyişdirmək qeyri - mümkündür. İlk növbədə bəzi həqiqətləri biz özümüz dərindən bilməliyik. Əgər hələ də Azərbaycanda Laçın dəhlizi ilə bağlı məsələləri bilməyib özünə politoloq deyənlər varsa, biz dünyadan nə gözləyək? Hələ də Laçın dəhliz yox, yoldur deyənlər var. Bununla da hesab edirlər ki, çox böyük bir məsələni kəşf edirlər. Dəhliz, yol məsələsini ilk növbədə Azərbaycan daxilində ən azı mütəxəssislər dərindən bilməlidirlər. Təbii ki, beynəlxalq qurumlara da bu məsələlər çatdırılmalıdır. Onları başa salmaq lazımdır ki, ermənilərin iddia etdiyi kimi Laçın dəhlizinin beynəlxalq statusu yoxdur və dəhlizlər haqqında heç bir sənəd də yoxdur. Əgər Laçın, Zəngəzur dəhlizləri barədə razılaşma imzalanmayıbsa, onların adi yoldan heç bir fərqi yoxdur. Çox təəssüf ki, bu məsələni beynəlxalq məhkəmə də anlamaqda çətinlik çəkir. Beynəlxalq məhkəmənin 22 fevral, 6 iyul qərarlarında tələb olunur ki, Laçın dəhlizində maneəsiz hərəkət təmin olunsun. Nəyin əsasında beynəlxalq məhkəmənin bu qərarı verdiyi bəlli deyil. İndiyə kimi kommunikasiyalarla bağlı cəmi bir sənəddə müəyyən müddəalar var. Bu da 10 noyabr bəyanatıdır. 10 noyabr bəyanatında yalnız Naxçıvandan Azərbaycanın əsas hissəsinə çəkilən yolda maneəsiz hərəkəti təmin etmək tələbi var. Laçın dəhlizi ilə bağlı belə bir tələb yoxdur. Ancaq ermənilər hələ də o yolun açılması üçün heç nə etməyiblər. Açıq şəkildə də bəyan edirlər ki, həmin yol Ermənistanın süverenliyi altında olmalıdır və Ermənistan nəzarət buraxılış məntəqəsi, gömrük məntəqəsi açmaq fikrindədir. Heç bir reaksiya yoxdur. Hətta 10 noyabr bəyanatında Naxçıvandan Azərbaycanın əsas hissəsinə çəkiləcək yolun Rusiya Federal Təhlükəsizlik Xidmətinin sərhədçiləri tərəfindən qorunması tələb olunsa da, Ermənistan qəti şəkildə deyir ki, həmin yol erməni sərhədçiləri tərəfindən qorunacaq. Rusiya baş nazirinin müavini utana - utana deyir ki, əgər Ermənistan icazə versə, Rusiya həmin yola nəzarət edə bilər. Belə bir reallıqlar, müəyyən həqiqətlər var ki, biz bunları beynəlxalq aləmə çatdırmaqda çətinlik çəkirik. Bu məqamda da ermənilərin əsas üstünlüyü ortaya çıxır. Heç bir milli qüruru, özünə hörmət hissi olmayan bir millət Qarabağda humanitar fəlakətdən danışır keçən ilin sonlarından başlayaraq. Artıq 9 aydır ki, “Qarabağda humanitar fəlakətdir” şousu yaradılır və dünya da bunu qəbul edir. Səfirləri də o şouda iştirak etməyə aparırlar və təəssüf ki, həmin şouda bizim özümüzə yaxın saydığımız Belarusun, Ukraynanın səfirləri də iştirak edir. Biz Ukraynaya hər cür təhlükəni gözə alıb humanitar yardımlar göstəririk. Ancaq Ukrayna ikinci dəfədir ki, bu cür ermənipərəstb mövqe tutur. Ötən ilin sentyabrında erməni təxribatı zamanı Ukrayna Xarici İşlər Nazirliyi bəyanat verdi və ermənilərin mövqeyinə daha yaxın mövqe ortaya qoydu. Hətta öz vətəndaşlarına da müraciət etdi ki, “Dağlıq Qarabağa” səfər etməsinlər. Ukrayna xarici işlər naziri də “Dağlıq Qarabağ” kəlməsini xüsusi vurğuladı və ermənilərin mövqeyini dəstəklədiklərini göstərdi. Mən hesab edirəm ki, Ukrayna rəhbərliyinə bu məsələdə müəyyən iradlar bildirilməlidir. Bir bəyanatla dünyanın nüfuzlu təşkilatlarının mövqeyinin dəyişməsi qeyri - mümkündür. Biz bu sahədə ardıcıl iş aparmalıyıq. Xüsusilə də Qərbi Azərbaycan İcması fəal olmalıdır və ardıcıl məlumatlar verməlidir. “Öz torpaqlarımıza qayıtmağa bizə kömək edin” kimi müraciətlər vacibdir. Hamı bilməlidir ki, Qərbi Azərbaycan İcması Qərbi Azərbaycandan qovulan həmvətənlərimiz öz dədə - baba torpaqlarına qayıtmaq istəyirlər. Qərbi Azərbaycana qayıtmaq ordan qovulmuş insanların təbii haqqıdır və bu hüquq təmin olunmalıdır. Dağlıq Qarabağ deyilən bölgədə humanitar böhran məsələsinə gəldikdə isə, Azərbaycanın mövqeyi dəyişməzdir. Humanitar yüklər Ağdam-Xankəndi yolu ilə daşınmalıdır. Bu yol Laçın dəhlizinin alternativi deyil, əsas yoldur. Dünya da bu reallığı dərk etməlidir”.
Məhəmmədəli QƏRİBLİ
