Ermənistan baş naziri Nikol Paşinyan həyasızcasına yenə danışıqların məzmununu təhrif edərək Azərbaycanı ittiham edib. Bu azmış kimi, Azərbaycana qarşı bəzi çağrışlar edib:
“Azərbaycan Laçın dəhlizini açmır və 9 noyabr 2020-ci il tarixli üçtərəfli bəyanatdan irəli gələn öhdəliyi kobud şəkildə pozur. Bu, Bakının müqaviləni yerinə yetirməyə qadir olmamasından xəbər verir. Ermənistan beynəlxalq ictimaiyyəti Dağlıq Qarabağa və Azərbaycanın blokladığı Laçın dəhlizinə faktaraşdırıcı missiya göndərməyə çağırır. İrəvan beynəlxalq ictimaiyyətdən daha əsaslı addımlar gözləyir. Laçın dəhlizinin blokadası Dağlıq Qarabağa və Laçın dəhlizinə beynəlxalq faktaraşdırıcı missiyanın göndərilməsini daha da zəruri edir və bu istiqamətdə daimi səylər göstərilməlidir. İrəvan beynəlxalq ictimaiyyətdən, o cümlədən BMT Təhlükəsizlik Şurasının daimi üzvü, sülhməramlı qoşunları Dağlıq Qarabağda yerləşdirilən Rusiyadan Laçın dəhlizinin qarşısının alınması üçün daha məzmunlu addımlar gözləyir. Biz beynəlxalq ictimaiyyətdən, o cümlədən Rusiyadan substantiv addımlar gözləyirik”.
“Paşinyan reallığı dərk etsə də, Azərbaycanın haqlı tərəf olduğunu, Qarabağın bizim suveren ərazilərimiz olduğunu...”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, biz Ermənistan rəhbərliyinin yalan və iftiralarını demək olar hər gün eşidirik: “Bu ölkənin baş naziri Paşinyanın Laçın yolunda ekoaktivistlərin etiraz aksiyasına verdiyi reaksiya, faktaraşdırıcı missiyanı dəvət etməsi, üstəlik də Azərbaycan, Rusiya və Ermənistan arasında imzalanmış Üçtərəfli Bəyanatın şərtlərindən danışması absurddur. Paşinyan Ermənistanın 30 il ərzində Azərbaycan torpaqlarını işğal altında saxlamasından, 750 mindən çox azərbaycanlını öz doğma yurdundan didərgin salmasından, 4 minə yaxın mülki vətəndaşlarımızı və hərbçilərimizi əsir alaraq izsiz-soraqsız yox edilməsindən, ekoloji terror törədilməsindən və yeraltı sərvətlərimizin talan edilməsindən xəbəri olmayan birisi kimi davranır, reallığı görməzdən gəlir. Ermənistanın baş naziri Azərbaycanı ittiham etməzdən əvvəl yaxın tarixdə baş verənləri yadına salsın. Ermənistanın reallığı dərk etmədiyini düşünmək sadəlövhlükdür. Paşinyan və komandası dərk edir ki, 30 il ərzində ermənilərin Qarabağı Azərbaycandan qoparmaq cəhdləri heç bir nəticə vermədi. Sələfləri Köçəryan və Sarkisyan beynəlxalq fondlardan, dünya ermənilərindən toplanan milyardlarla dolları yalnız şəxsi maraqlarının təmin etdilməsinə sərf etdilər. Ermənistanın indiki rəhbərliyi hakimiyyətə gəldikləri vaxt Qarabağdan qurtulmağın yollarını axtararkən cəmiyyətin sərt reaksiya verəcəyini bilirdi. Onu da dərk edirdi ki, bu yanaşma ermənilərin maksimalist düşüncəsinin məhsuludur. Ermənilər az qüvvə ilə daha çoxa nail olmaq istəyirlər. Ona görə də Paşinyan reallığı dərk etsə də, Azərbaycanın haqlı tərəf olduğunu, Qarabağın bizim suveren ərazilərimiz olduğunu qəbul etsə də daxili auditoriyanın, erməni cəmiyyətinin sərt reaksiyasından çəkinərək, qorxaraq ittiham dilində danışır”.
Polotoloq hesab edir ki, İrəvan beynəlxalq ictimaiyyətdən, o cümlədən BMT Təhlükəsizlik Şurasının daimi üzvü, sülhməramlı qoşunları Qarabağda yerləşdirilən Rusiyadan Laçın yolunun açılması üçün daha məzmunlu addımlar gözləyir: “Halbuki, Ermənistan 26 il Azərbaycanın 20 faiz torpaqlarını işğal altında saxlayıb və bu barədə BMT TŞ-nin həyata keçməyən 4 qətnaməsi də var. Bəs, Paşinyan niyə o vaxt beynəlxalq təşkilatlara bu ədalətsizliyin aradan qaldırılması ilə bağlı müraciət etmirdi. Bəli, erməni olduğu üçün edə bilməzdi, amma heç olmasa bu gün etdikləri müraciətin məzmununa baxsınlar, Qarabağ Azərbaycanın suveren ərazisidirsə, Ermənistan rəhbərliyinin bizim daxili işimizə qarışması, üstəlik də beynəlxalq təşkilatları bura çağırması hansı məntiqə söykənir? Azərbaycan BMT tərəfindən tanınmış ərazilərində dövlət qanunlarını bərpa etməyə çalışır. Bunun üçün bütün imkanlarını səfərbər edib. Ermənistandan və ermənilərdən fərqli olaraq dünya birliyi ölkələrin suveren hüquqlarına həssaslıqla yanaşır. Ermənistan rəhbərliyinin iftiralarına adekvat cavabın olmamasının səbəblərini də burada axtarmaq lazımdır”.
Vidadi ORDAHALLI
