Qarabağda Türkiyə-Rusiya Monitorinq Mərkəzi fəaliyyətsiz qurum kimi görünür - bəs həqiqət?

Emin Həsənli: “Monitorinq Mərkəzi hələ də kifayət qədər öz fəaliyyətini yerinə yetirə bilmir”

img

Qanunsuz erməni silahlı dəstələri tərəfindən Sarıbaba yüksəkliyinin şimal istiqamətində basdırılmış, Azərbaycan Ordusunun mühəndis-istehkam bölmələrinin aşkar etdiyi Ermənistan istehsalı olan piyada əleyhinə mina sahəsinə baxış keçirilib.

Bu barədə Azərbaycan Müdafiə Nazirliyi (MN) məlumat yayıb.

Məlumata görə, Azərbaycan Müdafiə Nazirliyinin dəvətinə əsasən Azərbaycan ərazisində müvəqqəti yerləşdirilən Rusiya sülhməramlı qüvvələrinin komandanı, general-mayor Andrey Volkov, Türkiyə-Rusiya Birgə Monitorinq Mərkəzinin Türkiyə kontingentinin rəhbəri, general-mayor Fatih Akpınar və Rusiya kontingentinin rəhbəri, kontr-admiral Oleq Semyonov noyabrın 23-də qeyd olunan ərazidə olublar.

Qeyd edək ki, 2021-ci ildə Ermənistanda istehsal edilmiş 350 ədəd PMN-G tipli piyada əleyhinə mina bölmələrimiz tərəfindən noyabrın 21-də zərərsizləşdirilib.

Diqqət çəkən məqam budur ki, artıq iki ildir yaradılan Türkiyə-Rusiya Birgə Monitorinq Mərkəzi çox passiv bir quruma çevrilib. Onun minalanmış sahəyə baxış keçirməsi heç də yaradılma məqsədinə uyğun gəlmir. Birgə Monitorinq Mərkəzinin bu cür passivliyi nə ilə izah oluna bilər?

Hərbi-siyasi şərhçi Emin Həsənli “Bakı-Xəbər”ə açıqlamasında bildirdi ki, bu məsələdə qardaş Türkiyənin mövqeyi aydındır: “Türkiyə Cümhuriyyəti ilk gündən Azərbaycanın haqlı mübarizəsinin yanında olub. Belə desək, Azərbaycanın yanında olmaqla yanaşı, beynəlxalq hüququn, haqqın-ədalətin yanında olub. Ancaq digər dövlətin məsələyə yanaşması aydındır. Digər dövlətin istər çar Rusiyası zamanı, istər bolşevik Rusiyası zamanı Ermənistana verdiyi dəstək məlumdur. Ermənistan dövlətinin yaranmasında çar Rusiyasının və bolşevik Rusiyasının böyük xidmətləri var. Ermənistan proje dövləti olaraq hər cür dəstək alib. İndi də təəssüflər olsun ki, sülhməramlılar ordadır, əsas səlahiyyət Rusiya dövlətindədir. Monitorinq Mərkəzi  hələ də kifayət qədər öz fəaliyyətini yerinə yetirə bilmir. Rusiya sülhməramlıları Laçın koridoruna nəzarət edir, onlar Azərbaycan ərazisindəki ermənilərin yaşadığı yerlərdə hələ də 10  noyabrda öz üzərlərinə götürdükləri öhdəlikləri yeri yetirmir. Rusiya silahlı qüvvələri bölgəyə gələndə Ermənistan separatizmi ölkədən çıxıb getməli idi. Hələ də bu baş verməyib. Əgər baş versəydi, Rusiya həqiqətən də prosesə nəzarət edib, silahları yığsaydı bir ay ərzində məsələni həll edərdi. Necə ki, əks bir iş görüb, Ermənistandan Qarabağda yaşayan erməniləri avtobuslara yığıb Qarabağa gətirdi,   onlara  ev tikilməsi, ərzaq və tibbi yardım göstərilməsini təmin etdi. Qaçqınlar əraziyə qayıtsın fikrilə niyə xocalılıların qayıtmasını təmin etmədi? İstəsəydi o bölgədə çox normal bir münasibət yaradardı. Orada yaşayan, zamanında Azərbaycan vətəndaşı olmuş şəxsləri, terror törətməmiş, Azərbaycana qarşı cinayət fəaliyyətində olmayan, 91 - ci ilə qədər yaşamış, yaxud 91 - ci ildən sonra həmin şəxslərin övladları olmuş şəxsləri çıxmaq şərtilə digərlərini çıxarardı ərazidən. Onları da yavaş - yavaş Azərbaycana inteqrasiya edərdi. Xankəndidə üçrəngli bayrağı qaldırıb deyərdi ki, bura və istər Əsgəran, istərsə Xocəvəndin mərkəzi, Ağdərənin qəsəbəsi hamısı Azərbaycan ərazisidir. Burada Azərbaycan bayrağı qalxacaq. Bunların heç birini etmir. Əksinə, orada separatizmlə məşğul olanları qızışdırır, qondarma qurumun bayrağı altında oturur, görüşlər keçirir. Beynəlxalq hüquqa, öz üzərinə götürdüyü sülhməramlı missiyaya zidd fəaliyyət həyata keçirir. Ancaq bu uzun sürə bilməz. Azərbaycan torpaqlarının böyük hissəsinin işğalda saxlanması uzun müddət çəkmədiyi kimi, bu proses də belə davam edə bilməz. Azərbaycan dövləti qətiyyətli addımlar ataraq torpaqlarını işğaldan azad etdi, oranı erməniləşdirə bilmədilər. İndi də bu məsələyə bir yekun qoyulacaq və yaxınlarda öz həllini tapmalıdır. Yaxşı olar ki, bunu Rusiya etsin. Beynəlxalq aləmə özünü bu münaqişədə sülh yaradan qüvvə kimi göstərərək, itirdiyi imicini qazana bilər. İstəmədiyi halda isə böyük məğlubiyyətlə qarşılaşacaq, bu proseslərdə istədiyi məkrli siyasəti həyata keçirə bilməyəcək”.

Məhəmmədəli QƏRİBLİ

Peşə etikası

Son xəbərlər