“Biz İlham Əliyevdən çox şey öyrənə bilərik”. Bu barədə Serbiya Prezidenti Aleksandar Vuçiç Prezident İlham Əliyevlə birgə Belqradda mətbuat konfransında bildirib.
Onun sözlərinə görə, iki ölkə liderləri arasında möhtəşəm müzakirələr oldu: “Amma müvafiq vəziyyətə görə o bizim ölkədə daha uzun müddət qala bilməyəcək. Ümid edirəm ki, qısa müddət ərzində onu yenə də Serbiyada qəbul etmək imkanımız olacaq. Biz Azərbaycanla bir çox sahədə müxtəlif imkanlara malikik. Biz iki dövlət olaraq ərazi bütövlüyümüzü qorumağa çalışırıq və öz dövlətlərimizi beynəlxalq arenada təqdim edirik. Xüsusilə beynəlxalq hüquq normalarının tətbiqi ilə bağlı iş görürük. Bu da BMT çərçivəsində həyata keçirilir və bu, təqdirəlayiq haldır. Amma mən fikirləşirəm ki, biz Prezident İlham Əliyevdən çox şey öyrənə bilərik”.
Maraqlıdır, Vuçiç “biz İlham Əliyevdən çox şey öyrənə bilərik” deyərkən bununla nə demək istədi? O, Əliyevdən nələri öyrənir?
Sözügedən məsələyə aydınlıq gətirən politoloq Tural İsmayılov bunu bir neçə aspektdən şərh etdi: “Fikrimcə, Serbiya da fərqindədir ki, Azərbaycan bu gün dünyada önəmli siyasi-iqtisadi nöqtələrdən birini formalaşdırır. Eyni zamanda Serbiya həm Azərbaycan torpaqlarının işğalı dövründə, həm 44 günlük müharibə zamanı Azərbaycanın hüquqlarını daim müdafiə edib. Beynəlxalq platformalarda Serbiya hər zaman dürüst davranaraq Azərbaycanın torpaqlarının işğaldan azad edilməsi prosesində tam haqlı olduğunu müxtəlif formalarda vurğulayıb. Eyni zamanda, Serbiya hər zaman BMT qətnamələrinin işləkliyi mövzusunda aktivlik nümayiş etdirib. BMT qərarlarının yerinə yetirilməməsinin bütün dünya üçün təhlükə törədəcəyini bəyan edib. Bu baxımdan Vuçiçin cənab İlham Əliyevlə görüşdə vurğuladığı məqamların xüsusi əhəmiyyəti olduğunu düşünürəm. Bununla Serbiya Azərbaycanın ərazi bütövlüyünü dəstəklədiyini bir daha vurğulamış olur. Biz nəzərə almalıyıq ki, Azərbaycan da Serbiyanın ərazi bütövlüyünü dəstəkləyir. Həm də iki ölkə arasında iqtisadi-siyasi münasibətlər yeni bir müstəviyə daxil olur. Bütövlükdə ölkə başçısının demək olar hər həftə gerçəkləşdirdiyi xarici səfərlərdə görürük ki, Azərbaycanın Balkan ölkələrində böyük nüfuzu var. Cənab Prezident sözünə etibar edilən lider kimi Avropada böyük nüfuza malikdir. Vuçiç xüsusi olaraq vurğuladı ki, İlham Əliyev verdiyi sözləri yerinə yetirir. Hesab edirəm ki, bir siyasi liderin xarizması üçün bu, çox önəmli göstəricidir. Vuçiç görür ki, İlham Əliyev uğurlu siyasi gedişlər edərək Azərbaycanın ərazi bütövlüyünü bərpa etdi. Serbiya da bizim ölkə kimi separatizmdən əziyyət çəkir, amma rəsmi Belqrad bu sahədə ciddi uğur əldə edə bilməyib. Bu baxımdan Vuçiç İlham Əliyevdən öyrəniləsi çox şey olduğunu dedi”.
Vidadi ORDAHALLI
