Qarabağ separatçılarının buynuzu yenə qaşınır - “Müdafiə ordusunu heç vaxt buraxmayacağıq”...

Bəhruz Quliyev: “Vaxtilə separatçılar Laçın şəhəri, Zabux və Sus kəndlərindən çıxmayacaqlarını da iddia edirdilər”

img

Sülhməramlıların gərəkən addımları atmaması ilə əlaqədar separatçıların təxribat xarakterli addımları durmadan artır. Qarabağdakı qondarma qurumun “təhlükəsizlik şurasının katibi” Vitali Balasanyan Paşinyanın “Qarabağ ətrafında beynəlxalq təminatlarla silahsızlaşdırılmış zona yaradılması və bunun nəticəsində Qarabağda “ordu”ya ehtiyac olmayacağı” fikrinə münasibət bildirərkən deyib ki, silahlı birləşmələr buraxılmayacaq.

Halbuki, bu il noyabrın 10-da Ermənistan hökumətinin iclası zamanı Nikol Paşinyan “Artsaxın müdafiə ordusu”nun buraxılması məsələsi ilə bağlı Qarabağ ermənilərindən təklif aldıqlarını demişdi: “Oktyabrın 31-də üçtərəfli görüş zamanı Soçidə mən “Dağlıq Qarabağ hakimiyyəti”nin təklifini təqdim etdim. Yəni “Dağlıq Qarabağ” ətrafında beynəlxalq təminatlarla silahsızlaşdırılmış zona yaratsaq, nəticədə belə miqyasda “Artsaxın müdafiə ordusu”na ehtiyac qalmaya bilər”.

Ancaq Balasanyan məlum məsələyə münasibət bildirərkən faktiki olaraq Paşinyanı yalançılıqda ittiham edib: “Biz heç vaxt “müdafiə ordusu”nu ləğv etməyəcəyik. Qarabağın “silahlı qüvvələri” buraxılmayacaq. Əksinə, “ordu”nun müasir şəraitə uyğunlaşdırılması üçün struktur dəyişiklikləri aparılıb. Qarabağın “hərbi-siyasi hakimiyyəti”nin vahid nöqteyi-nəzəri “ordu”nu nəyin bahasına olursa-olsun qoruyub saxlamaq, onları həm insan, həm də texniki müasir resurslarla təchiz etmək və döyüş tapşırıqlarını yerinə yetirən silahlı qüvvələrə malik olmaqdan ibarətdir”.

Bütün bunlar onu göstərir ki, Qarabağdakı separatçılar ağıllanmaq istəmir. Bu isə yenidən antiterror əməliyyatları üçün zəmin yaradır.

  • “Nəinki Balasanyanın özü, eləcə də “rəhbər” bildiyi digər şəxslər Silahlı Qüvvələrimizin hədəfində və nişangahındadırlar”

Məsələyə münasibət bildirən “SƏS” Media Qrupunun rəhbəri, politoloq Bəhruz Quliyevin fikrincə, belə sərsəm açıqlamalar separatçılara baha başa gələcək: “Rusiya sülhməramlılarının Qarabağdakı məlum fəaliyyətləri barədə geniş izahat verməyə ehtiyac yoxdur. Hər kəs onların Azərbaycan torpaqlarında hansı oyunlar oynamasından xəbərdardır. Yəni sülhməramlıların üzərlərinə düşən öhdəlikləri tam şəkildə yerinə yetirməmələri, üstəlik onların Qarabağdakı separatçı-quldur dəstələri ilə sıx münasibət qurmaları və s. kimi hallar heç də Bakının diqqətindən kənarda qalmır. Birbaşa müvafiq güc stukturlarımızın diqqət mərkəzindədir. Sadəcə, məsələ ondadır ki, Azərbaycan Ermənistana bu ilin sonuna qədər sülh müqaviləsinin imzalanması üçün vaxt verib və həmin vaxt get-gedə daralır. Məhz həmin vaxta qədər Azərbaycanın tələb və şərtləri yerinə yetirilməzsə, artıq hansı növbədənkənar addımların atılacağını anlamaq məncə elə də çətin deyil”.

B.Quliyevin sözlərinə görə, son zamanlar istər Ermənistan hakimiyyətinin, istərsə də Qarabağdakı erməni quldurlarının “ruhlanmalarının” əsasında İran və Fransa motivləri var: “Və həmin motivlərə Rusiyanın da müəyyən təsirləri mövcuddur. Onlar elə bilirlər ki, İran səlahiyyətlilərinin boğazdan yuxarı verdikləri bəyanatları, yaxud Fransa senatının qəbul etdiyi hər hansı bir kağız parçası, eləcə də Kremlin Ruben Vardanyan kartı bütövlükdə ermənilərin yenidən işğalçılıq faktorlarının ayaq açmasına geniş imkanlar yaradacaq və s. Ancaq onlar unudurlar ki, bütün bunlar növbəti erməni utopiyasıdır və başqa heç nə deyil. Yəni erməni tərəfi istədiyi fikirlərini səsləndirə bilər, amma həmin fikirlərin ayaq açıb yeriməsinin nə qədər mümkün olub-olmamasını da araşdırmaq lazımdır. Bu xüsusda təkcə bir faktı xatırladım. Əvvəlcə Fərrux yüksəkliyinin, daha sonra isə Laçın şəhərinin, eləcə də Zabux və Sus kəndlərinin erməni quldurlarından boşaldılması ərəfəsində məhz bu gün Xankəndidə rus sülhməramlılarının arxasından boylanan Balasanyan, Babayan və s. tipli separatçı canilər bənzər bəyanatlar verirdilər. Vaxtilə erməni separatçılar Laçın şəhəri, Zabux və Sus kəndlərindən çıxmayacaqlarını da iddia edirdilər. Ancaq nəticəsi nə oldu? Onlar bu əraziləri tərk etdilər və necə deyərlər, “azərbaycanlılar yalnız meyitimizin üzərindən keçməklə buraya daxil ola bilər” kimi hay-küylər havada qaldı. Bu gün qəhrəman Azərbaycan əsgəri həmin ərazilərə tam nəzarət edir və üstəlik, Xankəndi də bütün strateji yüksəkliklərdən nəzarətimiz altındadır. Əgər bu gün Vitali Balasanyan iddia edirsə ki, “müdafiə ordusunu” daha da “təkmilləşdirəcəklər”, yaxud silahlanmağa davam edəcəklər - onda həmin quldur bir faktı bilməlidir, nəinki onun özü, eləcə də “rəhbər” bildiyi digər şəxslər Azərbaycan Silahlı Qüvvələrinin hədəfində və nişangahındadırlar. Bütün bu kimi məsələlərin tam, birdəfəlik həll edilməsi üçün qısa zaman qaldığına şübhə etmirəm. Prezident İlham Əliyev dəfələrlə və qətiyyətlə bəyan edib ki, səbrimiz tükənməz deyil və əgər Ermənistan hakimiyyəti, həmçinin Qarabağdakı separatçılar bu bəyanatı görməzdən, eşitməzdən gəlirlərsə, onda günahı da özlərinə axtarsınlar. İlin sonuna isə çox az zaman qalıb və Azərbaycan qarşıya qoyulan məqsədlərinə nail olmaq qüdrətində olduğunu səbrlə, təmkinlə nümayiş etdirməkdədir. Əgər Qarabağdakı cinayətkar rejim bunu anlamazsa, onda heç kimin şübhəsi olmasın ki, “Dəmir yumruq 2” planı dərhal işə salınacaq. Bu dəfə onlar düşdükləri fəsadlardan, vəziyyətlərindən ümumiyyətlə yaxa qurtara bilməyəcəklər”.

Bu baxımdan politoloq hesab edir ki, separatçılar üçün nəticə ağır olacaq.

Vidadi ORDAHALLI

Peşə etikası

Son xəbərlər