Azərbaycan Zəngəzuru yox, Zəngəzurda dəhliz istəyir - İran səfirinə xatırlatma...

Ermənistanın baş prokuroru Anna Vardapetyan noyabrın 22-də İranın bu ölkədəki səfiri Abbas Badaxşan Zohurinin başçılıq etdiyi İran nümayəndə heyəti ilə görüşüb. Prokurorluğun mətbuat xidmətinin məlumatına görə, Vardapetyan iki ölkənin hüquq-mühafizə orqanları arasında əməkdaşlığı yüksək qiymətləndirib və əmin edib ki, səmərəli qarşılıqlı fəaliyyət əsasında bu genişlənəcək və yeni keyfiyyət alacaq.

Zohuri isə qeyd edib ki, Ermənistan və İran arasında 3000 illik tarixi və mədəni əlaqələr bütün istiqamətlərdə əlaqələrin inkişafı üçün yaxşı əsasdır və bunu xüsusilə son illərdə müşahidə etmək olar. Səfir vurğulayıb ki, Ermənistanla münasibətlər İran üçün prioritetdir və onların qarşılıqlı olması iki ölkənin liderləri tərəfindən təsdiqlənib.

İranın Qafanda konsulluğunun açılmasının yüksək qiymətləndirilməsinə cavab olaraq Zohuri bildirib ki, Sünik (Zəngəzur-red.) bölgəsi Tehran üçün mühüm rol oynayır:

O vurğulayıb ki, heç bir dövlətin regiona qarşı iddiası olmamalıdır.

Vardapetyan və Zohuri həmçinin məhkumların ekstradisiyası, hüquqi yardım, narkotik vasitələrin qanunsuz dövriyyəsi ilə mübarizədə əməkdaşlıq kimi məsələləri də müzakirə ediblər. Dünən məlum olub ki, Ermənistan və İran Xarici İşlər nazirlikləri arasında siyasi məsləhətləşmələr olub.

Yəqin ki, səfir “heç bir dövlətin regiona qarşı iddiası olmamalıdır” deyəndə məhz bizi nəzərdə tutur. Ancaq o bilməlidir ki, biz Ermənistandan Zəngəzuru istəmirik, götürdüyü dəhlizlə bağlı öhdəliyin yerinə yetirilməsini tələb edirik. O halda İran niyə bu ritorikanı seçir?

Siyasi şərhçi Sahil Kərimli “Bakı-Xəbər”ə açıqlamasında bildirdi ki, Ermənistan Zəngəzurla bağlı öhdəliyini yerinə yetirmək istəmir:

“Ermənistan kapitulyasiya aktına imza atarkən üzərinə götürdüyü öhdəliklərdən biri də Zəngəzur dəhlizinin açılması, Azərbaycanın əsas hissəsindən Naxçıvana quru yolunun açılmasına şərait yaradılması idi. Amma təəssüf ki, Paşinyan bu günə qədər bu öhdəlikləri yerinə yetirməyib. Azərbaycan dövləti dəfələrlə bəyan edib ki, nəyin bahasına olursa-olsun, Zəngəzur dəhlizi açılacaq.

Ermənistanın bu qeyri-konstruktiv mövqeyinə dəstək verən qüvvələr Zəngəzur dəhlizinin açılmasına mane olurlar. İran İslam Respublikasının Ermənistandakı səfrinin son sərsəm və məsuliyyətsiz bəyanatı da buna bir sübutdur. Görünür, səfir Zəngəzur dəhlizi ilə Azərbaycanın tarixi torpaqları olan Zəngəzur mahalını eyniləşdirməklə siyasi manipulyasiya etməyə çalışır. Hazırda söhbət Zəngəzur dəhlizinin açılmasından gedir. Azərbaycanın indiki Ermənistan ərazilərinə hər hansı iddiası yoxdur. Baxmayaraq ki, Ermənistan adlanan ölkə tarixi Azərbaycan torpaqlarında yaradılıb. Ümumiyyətlə, İran rəsmilərinin bu tip bəyanatları bölgədə sülhün əldə edilməsinə zərbələr vurur. İran dövlətini təmsil edən şəxslər bu açıqlamalarla bir növ Azərbaycanın daxili işlərinə qarışır, suveren hüquqlarına hörmətsizlik edir. 10 noyabr üçtərəfli bəyanatının icrası konkret olaraq Ermənistanın məsuliyyət daşıdığı məsələdir. İranın bu məsələlərə ümumiyyətlə aidiyyatı yoxdur. Odur ki, İrəvana təsir etmək, qızışdırıcı ritorikadan istifadə edərək sülh prosesinə mane olmaq Azərbaycan tərəfindən qəbuledilməzdir. Yaxşı olar ki, İran səfiri öz səlahiyyətlərinə aid olan məsələlərlə məşğul olsun”.

Məhəmmədəli QƏRİBLİ