Ramil Hüseynov: “Zatulin Azərbaycanın ərazi bütövlüyünə qarşı açıqlamalarla çıxış edir”
Sentyabrın 16-18-də Rusiya Federasiyası Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini Konstantin Zatulin Ermənistanda səfərdə olub. Rusiyalı parlamentari İrəvan, sonra isə Azərbaycanla sərhəddəki Cermux şəhərində müşahidələr aparıb.
Zatulin dəfələrlə səfər etdiyi Ermənistana gələn kimi dərhal Ermənistanın eks-prezidenti Robert Köçəryanı “ziyarət” edib. Digər görüşlərdə Zatulin rəsmi olaraq daxili və xarici siyasət gündəmini, Rusiya-Ermənistan münasibətlərinin inkişafını müzakirə edib. O cümlədən, Qarabağla bağlı qızışdırıcı və provokativ fikirlər səsləndirib: “Çətin vaxtlarda Ermənistana səfər etmək zərurətinə cavab verməyə bilməzdim. Azərbaycan və Türkiyə ermənilərdən və Ermənistandan Dağlıq Qarabağdakı soydaşlarından tam imtinanı gözləyir və bunu güc yolu ilə xatırladırlar. Ermənistana bütün region kimi sülh lazımdır, lakin daimi rüsvayçılıq bahasına deyil. Sülh müqaviləsi və Ermənistan-Azərbaycan sərhədinin demarkasiyası 30 ildir beynəlxalq münasibətlərin gündəmində olan Dağlıq Qarabağın statusu problemini aradan qaldırmır”.
Görünən odur ki, Zatulin açıq-aşkar provokasiya ilə məşğuldur. Açıq bəyan edir ki, sərhədlərin demarkasiyasının Qarabağ məsələsinə dəxli yoxdur.
- “Bu, iki ölkə münasibətlərinin pozulmasına xidmət edir”
Məsələyə münasibət bildirən Yeni Yol Partiyasının sədri Ramil Hüseynovun fikrincə, Zatulinin məlum təxribat xarakterli addımları Kremlin təlimatlarına uyğundur: “Düzdür, Zatulin uzun illərdir Azərbaycana qarşı aqressiv mövqe sərgiləməkdədir. Ancaq elə məsələlər var ki, birbaşa Rusiya hakimiyyəti tərəfindən idarə olunur. Moskva görür ki, Ermənistanda güclü anti-Rusiya ovqatı var. Üstəlik, Nensi Pelosinin səfərindən sonra bu daha da güclənib. Ona görə də Rusiya hakimiyyəti bütün rıçaqlarını işə salır ki, erməniləri yenidən öz tərəfinə çəksin. O üzdən, Zatulin həyasızcasına demarkasiyanın Qarabağ məsələsinə heç bir dəxli olmadığını deyir. Məsələnin qəribə tərəfi həm də odur ki, Zatulin hakim Vahid Rusiya Partiyasında təmsil olunur. Bu o deməkdir ki, Zatulin müəyyən mənada həm də partiyası adından danışır. Ancaq qəribədir ki, Rusiya hakimiyyəti ona irad bildirmir. Bu isə tamamilə anormal bir haldır. Ona görə ki, Azərbaycan-Rusiya münasibətləri normaldır. Azərbaycan hakimiyyəti bütün vasitələrlə çalışır ki, şimal qonşumuzla münasibətlər stabil olsun. Bu ilin fevralında iki ölkə arasında strateji müttəfiqlik haqqında müqavilə imzalanıb. Ancaq bu və digər amilləri nəzərə almadan Zatulin Azərbaycanın ərazi bütövlüyünə qarşı açıqlamalarla çıxış edir. Bu isə iki ölkə münasibətlərinin pozulmasına xidmət edir. Ona görə də Kreml Zatulinə dur deməlidir”.
Partiya sədri onu da qeyd etdi ki, Zatulinin nə sərsəmləməsindən asılı olmayaraq, Azərbaycan Qarabağ məsələsində geri addım atmayacaq.
Vidadi ORDAHALLI
