Ermənistanın keçmiş prezidentləri və Qarabağdakı qondarma qurumun eks rəhbərlərinin iştirakı ilə görüş keçirilib. Bu barədə məlumatı Ermənistan mediası yayıb. Bildirilir ki, görüş Ermənistanın birinci prezidenti Ter-Petrosyan və bütün ermənilərin katolikosu II Qareginin istəyi ilə gerçəkləşib. İddialara görə, görüşdə II Qaregin də iştirak edib.
Görüş "Eçmiədzin” adlanan kilsədə baş tutub.
İddialara görə, toplantıda Ermənistanın hazırkı çətin durumu, bu vəziyyətdən çıxış yolları müzakirə olunub. Vurğulanır ki, Levon Ter-Petrosyan keçmiş "Qarabağ klanı"nın "lider"lərini Azərbaycanla imzalanan müqavilələrə əməl etməyə və bunun üçün səyləri birləşdirməyə çağırıb. Həmçinin bildirilir ki, görüşdə məqsəd ölkənin belə çətin durumunda mövcud hakimiyyətə dəstəyin ifadə olunmasıdır. Hazırkı hakimiyyətə düşmən olan Qarabağ klanı bu təşəbbüsə qoşulmağa razılıq verərmi?
Politoloq Qabil Hüseynli “Bakı-Xəbər”ə açıqlamasında bildirdi ki, belə formatda görüşün keçiriləcəyi ilə bağlı məlumatlar bir müddət əvvəl dolaşırdı: “Dünən belə bir görüşün baş tutacağı ilə bağlı məlumat yayıldı. Sonra bildirildi ki, Köçəryan və Sarkisyan gecikdikləri üçün görüş baş tutmayıb. Gecə saatlarında isə bəzi erməni KİV-ləri görüşün baş tutması ilə bağlı material yaydılar, hətta görüş olan yerdən videofraqmentlər də təqdim edilidi. Görüşün əsas təşəbbüskarı Ermənistanın ilk prezidenti Ter-Petrosyan olub. O, Qarabağ məsələsinə rasional baxışı olan siyasətçidir. Bundan bir neçə gün əvvəl isə Qarabağdakı separatçıların başçısı Arayik Arutunyan da öz təşəbbüsü ilə Ter-Petrosyanla görüşdü. Ermənistanın vəziyyəti doğrudan da çox ağırdı. Onlar istəyirlər ki, belə vəziyyətdə milli birlik nümayiş etdirsinlər. Paşinyan Ter-Petrosyana yaxınlığı ilə seçilir. Qarabağ klanı məhz onu devirərək hakimiyyətə gəlib. Son günlər Ermənistanın Rusiya ilə münasibətlərinin gərginləşməsi fonunda Ter-Petrosyana diqqət bir qədər artıb. Məhz bu səbəbdən Qarabağ klanı belə görüşdə iştirak edir.
Onlar artıq anlayır ki, revanşizmi təbliğ etməklə Ermənistanı daha da ucuruma aparırlar. Katolikosun da məsələyə qarışması vəziyyətin ciddiliyindən xəbər verir. Qarabağ separatçılarının keçmiş rəhbərlərinin də görüşdə iştirakı hansısa yekun nəticənin əldə oluna biləcəyinə işarədir. Güman edirəm ki, sülh sazişi ilə bağlı hakimiyyətə dəstəyin verilməsi nəzərdən keçirilir.
Ehtimal edirəm ki, bu məsələdə Sarkisyan və Köçəryanı da razı sala biləcəklər. Onlar Rusiyaya yaxın sayılırlar. Hazırda isə Ermənistanda anti-Rusiya ovqatı hakimdir. Belə bir görüşdə müsbət nəticənin əldə edilməsi ümumi sülh prosesinə öz töhfəsini verə bilər. Erməni KİV-lərində qapalı görüşün geniş təfərrüatı barədə məlumat verilmir. Görüşlərin davam etdirilməsi qərara alınıb. Deməli, görüşün məhsuldar olduğunu deyə bilərik. Bu arada Paşinyan Ərdoğanla görüşmək niyyətində olduğunu açıqlayıb. Bütün bunlar Ermənistanın sülhə doğru getməyə meyl göstərməsindən xəbər verir. Paşinyan bu istiqamətdə inamlı addımları müxalifətin təzyiqinin olacağına görə atmırdı. Artıq müxalifət də bu məsələdə bir araya gəlib prosesə dəstək ifadə edirsə, müsbətə doğru nələrinsə olacağını təxmin edə bilərik”.
Məhəmmədəli QƏRİBLİ
