İran Ordusunun Baş Qərargah rəisi, general Məhəmməd Baqiri İran-İraq müharibəsinin başlanmasının növbəti ildönümünə həsr edilən paradda deyib ki, İran regionda sərhədlərin dəyişməsinə və qeyri-sabitliyə imkan verməyəcək:
"İranın silahlı qüvvələri mehriban qonşuluq prinsiplərinə və beynəlxalq normalara hörmət edərək bəyan edir ki, heç bir qeyri-sabitliyə və sərhədlərdə dəyişikliklərə yol verməyəcəklər. Biz Ermənistan və Azərbaycana problemlərini sülh yolu ilə həll etməyi məsləhət görürük".
General qeyd edib ki, İran regionun inkişafında maraqlıdır:
“Tehran münaqişələr və müharibələr törətmir, lakin onlar başlayanda da susmur. İranın hərbi gücü yalnız müdafiə üçün nəzərdə tutulub”.
Maraqlıdır ki, İran rəsmiləri bundan əvvəl də Zəngəzur dəhlizinin keçəcəyi ərazi ilə bağlı gedən müzakirələri özünün “qırmızı xətti” adlandırıb.
İran rəsmisi həmçinin bildirib ki, Fars körfəzi ölkələrindən sionist rejimin fitnə-fəsadlarına qarşı diqqətli olmalarını gözləyirlər: “Özümüzə qarşı təhlükə hiss etsək, sionist rejimin ünsürləri və onların havadarlarını cəzalandıracağıq”.
Baqirinin bu açıqlamadına hansı adı vermək olar?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, İran buna bənzər addımlarını müharibə bitəndən sonra da atmağa başlamışdı, ancaq lazımi cavabını alandan sonra yerinə oturdu: “Həmin vaxt işğaldan azad edilən ərazilərimizdən keçib Ermənistana gedən yük maşınlarını yoxlamağımıza etiraz edirdilər. Prinsipiallıq göstərib öz mövqeyimizdə qaldıq və geri addım atmadıq. İran hərbi rəhbərliyi səviyyəsində dəfələrlə belə təhdidlərə yol verib. Tez-tez sərhədlərin dəyişməsindən danışırlar. Açıq şəkildə bizi təhdid edirlər. Çünki bu regionda onun qonşuluğunda konfliktdə olan ölkələrdən biri bizik. Azərbaycan öz haqqını tələb edir. Deyir ki, Ermənistan öz üzərinə götürdüyü öhdəliyi yerinə yetirsin. Zəngəzur dəhlizinin açılması sərhədlərin güc yolu ilə dəyişdirilməsi deyil. Ola bilər ki, bu layihə İranın marağına uyğun deyil. İstəyir ki, yol yalnız onun ərazisindən keçsin. Ancaq İran hərbi rəhbərliyi bilməlidir ki, Azərbaycan belə hədələrdən qorxan deyil. Bizim özümüzün güclü ordumuz olmaqla yanaşı, həm də güclü müttəfiqlərimiz var. Biz İranla hər zaman normal qonşuluq etmişik. Qərb və ABŞ onun ərazisini bombardman edəcəyi anonsunu verəndə, biz dedik ki, ərazimizdən bu məqsədlər üçün heç kəsə icazə vermərik. Ancaq görün onlar nə edir? İran rəsmilərinin “sərhədlərin zorla dəyişməsi qəbuledilməzdi” tezisi məntiqsizdi. Çünki Azərbaycan-İran sərhədinin böyük bir hissəsi 30 il Ermənistanın işğalında qaldı. Sərhədi zorla dəyişmək həmin hadisəydi. İran onda niyə etiraz etmirdi? Əksinə, elə həmin ərazilərdən ermənilər üçün əlavə nəfəslik açmışdı. Belə yersiz təhdidlər bizi sarsıda bilməz. Biz öz haqqımızı bundan sonra da tələb edəcəyik. Ermənistan sülhün bərpasını istəmir, ona görə müxtəlif təxribatlar törədir. İran Ermənistanın vəkili rolunda çıxış edirsə, onda zəhmət çəkib qanunları yaxşı öyrənsin. Kiminsə hədə-qorxusuna görə biz öz haqlı tələblərimizdən əl çəkən deyilik”.
Məhəmmədəli QƏRİBLİ
