Tural İsmayılov: “Onlar məqsədyönlü şəkildə aparılan qanunsz məskunlaşmaya göz yumub”
“Laçın şəhərinin böyük hissəsi tamamilə viran qoyulub, dağıdılıb. Ancaq yenə də bəzi yerlərdə qanunsuz məskunlaşma aparılmışdır. Dünya ictimaiyyəti, beynəlxalq təşkilatlar, o cümlədən bu məsələ ilə birbaşa məşğul olan Minsk Qrupunun həmsədrləri buna, sadəcə olaraq, göz yumurdular”.
Bunu Prezident İlham Əliyev Laçın şəhərində çıxışı zamanı deyib.
Ölkə başçısının fikrincə, həmsədrlər həm qanunsuz məskunlaşmaya göz yumurdular, həm də bir növ bununla razılaşırdılar: “Halbuki, dəfələrlə bu mənzərəni görürdülər, dəfələrlə. Bax, bu yolla Ermənistandan Qarabağa, Qarabağdan Ermənistana gedərək görürdülər ki, burada qanunsuz məskunlaşma aparılır. Görürdülər ki, Azərbaycan toponimləri sıradan çıxarılır. Görürdülər ki, bizim tarixi, qədim Azərbaycan torpağı olan Laçın erməniləşdirilir, burada qanunsuz məskunlaşma aparılır. Ancaq buna göz yumurdular, sanki bununla razılaşırdılar. Biz Azərbaycan xalqı isə bununla heç vaxt razılaşa bilməzdik. Mən hər dəfə deyirdim ki, heç vaxt imkan verə bilmərik bizim torpağımızda ikinci erməni dövləti yaradılsın”.
Görünən odur ki, bir sıra beynəlxalq təşkilatlar və həmsədr ölkələr ermənilərin Laçında qanunsuz məskunlaşmasında maraqlı olublar. Maraqlı olmasaydılar, buna hansısa formada etiraz edərdilər.
- “Bütün bu haqsızlıqları ona görə edirdilər ki, Azərbaycan işğal faktı ilə barışsın”
Məsələyə münasibət bildirən politoloq Tural İsmayılovun fikrincə, Minsk Qrupu məqsədyönlü şəkildə aparılan qanunsuz məskunlaşmaya göz yumub: “Təəssüflər olsun ki, uzun illər Ermənistan tərəfindən işğal altında saxladıqları ərazilərdə qanunsuz məskunlaşma siyasəti aparıblar. Livandan, Suriyadan olan erməniləri qanunsuz olaraq Laçında məskunlaşdırıblar. Ermənistanın qanunsuz məskunlaşma siyasəti təkcə Azərbaycan qanunlarının deyil, eyni zamanda beynəlxalq hüququn total şəkildə pozulması idi. Ancaq əfsuslar olsun ki, bütün bu pozuntuları həmsədr ölkələr görməzdən gəldilər. Halbuki, Laçın rayonunun keçmiş Dağlıq Qarabağ Muxtar Vilayətinə daxil olmadığını yaxşı bilirdilər. Bütün bu haqsızlıqları ona görə edirdilər ki, Azərbaycan işğal faktı ilə barışsın. Baxmayaraq ki, Azərbaycan dəfələrlə qanunsuz məskunlaşmaya öz etirazını bildirib. O üzdən, cənab Prezidentin toxunduğu məsələ bir daha dünya ictimaiyyətinə göstərdi ki, qanunsuz məskunlaşmanın arxasında birbaşa Ermənistan dayanır. Əfsuslar olsun ki, Ermənistanın bu qanunsuz addımlarına qarşı bugünə qədər hansısa addım atılmayıb. Günü bu gün də Azərbaycanın mədəni irsinin dağıdılması ilə bağlı YUNESKO hansısa mövqe ortaya qoymayıb. O cümlədən, məhv edilən ekologiyamızla bağlı da heç nə deyilmir. Bütün bunlar, əlbəttə ki, ikili standartların bariz göstəricisidir”.
Politoloq onu da əlavə etdi ki, məlum biganəlik bəzi beynəlxalq təşkilatların əsl simasını ortaya qoydu.
Vidadi ORDAHALLI
.jpg)