Skobeyevanın məşhur “60 dəqiqə”sində Ukrayna barədə həqiqəti demək çağırışı - “NATO güclüdür”
Rusiyada maraqlı proseslər gedir. Məsələ ondadır ki, Rusiya bu ilin 24 fevralında Ukraynaya qarşı xüsusi əməliyyatı elan edəndə ölkənin bütün media resursları dövlət təbliğatına köklənmişdi. Belə rəy formalaşdırıldı ki, hansı dövlətin yardım etməsindən asılı olmayaraq Kiyev öz məqsədlərinə çata bilməyəcək. Ukrayna Rusiyanın qarşısında duruş gətirməyəcək və təslim olmağa məhkumdur.
Ancaq Rusiya Ukraynada öz məqsədlərinə çatmadıqca və proses uzandıqca bu, aparılan təbliğat kampaniyasına da öz təsirini göstərir. Dövlətin təbliğatında fərqli elementlər özünü göstərir. Məsələn, Rusiyanın “Rossiya 1” telekanalında dövlətin bir nömrəli təbliğat verilişi olan “60 dəqiqə” proqramında qarşı tərəfin güclü olması etiraf edilib. Verilişin aparıcısı Olqa Skobeyeva cəmiyyətə həqiqəti deməyin lazım olduğunu qeyd edib: “Xalqa həqiqəti demək lazımdır. Amerika silahları normaldır. NATO güclüdür, onların yaxşı mütəxəssisləri var, Ukraynanın stavka etdiyi mərkəz çox güclüdür. Demək doğru olmaz ki, ABŞ HAYMARS-ları bizim üçün təhdid deyil. HAYMARS-lar Rusiya üçün təhdiddir”.
Halbuki, indiyə qədər tam fərqli informasiya siyasəti aparılırdı. Maraqlıdı, ölkədə nə baş verir?
- “Ola bilsin, ictimai rəy yavaş-yavaş Ukrayna ilə sülhün əldə edilməsinə hazırlanır”
Sözügedən məsələyə aydınlıq gətirən media eksperti Yadigar Məmmədli hesab edir ki, Rusiya telekanallarının Ukrayna ilə bağlı ənənəvi mövqedən kənara çıxması bir sıra məsələlərdən irəli gəlir: “Əvvəla, Rusiyanın Ukraynada hərbi əməliyyatlar aparmasının bu ölkə üçün ciddi fəsad yaradacağı gözlənilən idi. Ona görə ki, Qərb ciddi və böyükmiqyaslı sanksiyalara qərar verib. Daha sonra Ukraynaya edilən hərbi yardımların miqyası genişləndirildi. Rusiyanın təbliğat resursları isə bunun əksini deyirdi. İddia edirdilər ki, müharibə nə qədər uzansa da, bu, Rusiyanın maraqlarına işləyəcək. Ancaq proseslərin gedişi gözləntilərin əksini göstərdi. Avqustda Ukrayna əks-hücumları genişləndirdi. Nəticədə bir sıra ərazilər azad edildi. Bunun bir səbəbi Qərbin müasir silahlar verməsi idisə, digər faktor Ukrayna xalqının döyüş əzmi idi. Cəmiyyətin belə fədakarlığını istər ABŞ, istərsə də Avropa İttifaqı ilk dövrlərdə gözləmirdi. Bütün bunlar ona gətirib çıxartdı ki, Rusiya qarşısına qoyduğu məqsədlərin hamısına çata bilmədi. Proses çox uzandı. Ukraynada proseslər uzandıqca, Rusiyada mərkəzdənqaçma meylləri artır. Ölkənin təbliğatı ilə məşğul olan ekspertlər fərqli fikirlərlə çıxış edirlər. Bəzən elə olur ki, Ukrayna ilə bağlı məyusedici məqamları açıq dilə gətirirlər. Gör vəziyyət nə yerə çatıb ki, “60 dəqiqə” verilişində kampaniya xarakterli deyil, həqiqətə söykənən məlumatlar verirlər. Fikrimcə, Rusiya zəiflədiyi üçün artıq informasiya siyasətini tam idarə edə bilmir. Yoxsa sırf təbliğata köklənmiş proqramlarda belə fikirlər səslənməzdi. Digər tərəfdən, ola bilsin ictimai rəy yavaş-yavaş Ukrayna ilə sülhün əldə edilməsinə hazırlanır. Bu da ola bilər. Çünki Putin Ukraynadakı xüsusi hərbi əməliyyatın əsas məqsədini açıqladı. Onun fikrincə, xüsusi əməliyyatın əsas məqsədi Donbasın azad olunmasıdır. Donbasın da böyük hissəsi Rusiya nəzarətindədir”.
Vidadi ORDAHALLI
