Diplomatlarımız və xaricə gedən dövlət adamlarımız "Yeni ASALA"nın terror hədəfində...

Azər Həsrət: "...təhlükəsizlik tədbirləri gücləndirilməlidir"

img

Ermənistanın törətdiyi sərhəd təxribatının ardınca xaricdəki erməni diasporu, erməni lobbisi və erməni terror təşkilatları hərəkətə keçib. Son günlər erməni terror təşkilatlarının hərəkətə keçməsi ciddi narahatlıq törədir.

Bildiyimiz kimi, erməni terrorçuları müxtəlif ölkələrdə fəaliyyət göstərən Azərbaycan səfirliklərinə qarşı hücumlar və təxribatlar təşkil ediblər. Fransada, Londonda, Beyrutda, Tbilisidə erməni terrorçularının həyata keçirdiyi hücumlar və təxribatlar artıq böyük təhlükələrdən xəbər verir.

Qeyd edildiyi kimi, ermənilər xaricdəki səfirliklərimizə də hucumlar edirlər. Bu baxımdan, çox təhlükəli vəziyyət yaranıb. Azərbaycan diplomatlarına və Azərbaycandan xaricə səfərə gedən dövlət rəsmilərinə erməni terroru təhlükəsi var.

Diplomatlarımız və xaricə gedən dövlət adamlarımız "Yeni ASALA"nın terror hədəfindədir. Diplomatlar və xaricə gedən dövlət adamlarımız erməni terrorundan necə qorunmalıdır?

  • "Xarici ölkələrdə fəaliyyət göstərən diplomatlarımıza, xarici ölkələrə səfər edən dövlət adamlarına qarşı da terror aktları təhlükəsi istisna deyil, bu da gözlənilə bilər"

Siyasi şərhçi Azər Həsrət hesab edir ki, erməni terror təşkilatları hər an hər cür təxribata, hücuma əl ata bilər, bu səbəbdən də dövlətimiz başqa ölkələrə ümid olmayıb özü təhlükəsizlik  tədbirləri görməlidir: "Əlbəttə ki, birinci növbədə səfirliklərin təhlükəsizliyini təmin etmək lazımdır. Azərbaycan dövləti öz tərəfindən, eyni zamanda səfirliyin yerləşdiyi dövlətin müvafiq qurumları öz tərəflərindən bu təhlükəsizliyin təminatının qayğısına qalmalıdır. Özəlliklə də son vaxtlar baş verən hadisələrdən belə qənaətə gəlmək olar ki, örnək üçün Fransa kimi bir dövlətdə, yaxud da ki, Böyük Britaniya da Azərbaycan səfirliyi qorunmur. Yəni söhbət əlbəttə ki, o səfirliyin yerləşdiyi ölkədən, dövlətdən gedir. Eləcə də Livanda baş verən hadisə gözümüzün önündədir. Onlar bizim üçün dərs olmalıdır və əlbəttə ki, ikitərəfli münasibətlərdə bu məsələlər həmin dövlətlərin diqqətinə çatdırılmalıdır. Beləliklə, səfirliklərin qorunması üçün yollar, üsullar seçilməli, müzakirələr aparılmalıdır. Bu, məsələnin bir tərəfidir. Digər tərəfdən də, Azərbaycan dövləti o səfirliklərə müvafiq gücləndirmə tətbiq etməlidir. Söhbət nədən gedir? Əlbəttə ki, diplomatlar öz yerində qalır, əlavə olaraq da təhlükəsizliyə məsul olan şəxslərin təlimatlandırılması, hazırlanması, göndərilməsi zərurəti var. Elə ölkələr var ki, orada bizim səfirliklərə, diplomatlara bu cür vəhşi hücumların olması az ehtimal olunur".

A.Həsrətin sözlərinə görə, amma elə ölkələr var ki, orada erməni lobbisi və erməni terror təşkilatları güclü fəaliyyətdədir və aktivdir, belə ölkələrdə ciddi təhlükə yarana bilər.  "ABŞ, Fransa, Almaniya və başqa bu cür dövlətlərdə Azərbaycan səfirliklərinin, diplomatların qorunması üçün əlavə işçilərin, vəzifəlilərin cəlb olunması vacibdir. Eyni zamanda səfirliyin ümumiyyətlə qorunması üçün onun ətrafında bir qoruma çəmbərinin də formalaşmasına ehtiyac var. Baxın, Bakının tən ortasında ABŞ səfirliyi var, ora nəinki insan girə, heç quş belə uça bilməz. Burada heç bir təhlükəsizlik problemi yoxdur. Niyə? Çünki səfirlik elə qurulub, elə yerləşdirilib, elə mühafizə edilib ki, hətta ağır texnika ilə hücum etmək çətindir, mümkünsüz görünür. Demirəm ki, Azərbaycan dövləti də ABŞ kimi tankın belə girə bilməyəcəyi bir səfirlik qursun, ən azından iki - üç nəfər vəzifəli şəxs ola bilər ki, onlar sırf təhlükəsizlik məsələsinə baxsınlar. Siz xatırlayırsız, Böyük Britaniyadakı səfirliyimizdə hücum edənlərin qarşısına çıxacaq bir adam belə olmadı. Yaxud da Fransadakı səfirliyimizdə baş verənlərin qarşısı alına bilmədi. İndi bir nəfərin videosu yayılıb ki, o dirəniş göstərir. Bu artıq çox şeydən xəbər verir ki, demək olar səfirliyimizi özümüz qorumuruq. Elə buraxmışıq başlı-başına ki, həmin dövlət səfirliyin təhlükəsizliyini təmin etməyə borcludur. Bu baxımdan düşünürəm ki, əlavə tədbirlər görülməlidir və biz nəzərə almalıyıq ki, ondan sonrakı mərhələdə ermənilər qisas almaq üçün xarici ölkələrdə azərbaycanlılara hücumlar təşkil edəcəklər. Təbii, xarici ölkələrdə fəaliyyət göstərən diplomatlarımıza, xarici ölkələrə səfər edən dövlət adamlarına qarşı da terror aktları təhlükəsi istisna deyil, bu da gözlənilə bilər.

1918-1920-ci illərdə Azərbaycan Xalq Cumhuriyyətindən sonrakı dövrdə də erməni terror təşkilatları həm Türkiyənin, həm də Azərbaycanın diplomatlarına qarşı hücumlar, terror aktları təşkil edirdilər. Bizim diplomatlara qarşı erməni terror təşkilatları indi də hücumları təkrarlayacaqlar. Eyni zamanda biz unutmayaq ki, hətta ötən əsrin 70-ci illərində də erməni terror təşkilatları Türkiyə diplomatlarını ard - arda öldürürdülər, hava limanlarına hücum edirdilər, həmçinin də diplomatların ailə üzvlərini qətlə yetirirdilər, səfirliklərə hücum edirdilər. Bütün bunları biz eşitmişik, görmüşük, bilirik. Bu baxımdan da, bütün hallarda təhlükəsizlik tədbirləri gücləndirilməlidir"-deyə A. Həsrət qeyd etdi.

İradə SARIYEVA

Peşə etikası

Son xəbərlər