Ermənistan müharibə hazırlığını gücləndirdi - Pelosinin gəlib-getməsindən sonra təsadüfdür?

Ramil Məmmədli: “Ermənistan bu addımları ilə gələcəkdə dinc dayanmaq fikirində olmadığını sübut edir”

img

Ermənistan növbəti müharibəyə hazırlaşır. Erməni mediasının verdiyi məlumata görə, Ermənistanın hər yerində əhali üçün bomba sığınacaqlarının təchizatla təmin olunmasına başlanıb. Bu barədə Ermənistan Fövqəladə Hallar Nazirliyindən məlumat verilib.

Nazirliyin məlumatına görə, onlar Ermənistan boyu bomba sığınacaqlarına baxışlar keçirib, lazımi avadanlıqlarla təchiz edirlər. Xüsusilə evlərin zirzəmiləri sığınacaq üçün yararlı hala salınır.

Ümid edirik ki, Ermənistan Azərbaycana qarşı növbəti təxribata hazırlaşmır. Belə olacağı halda bunun bütün məsuliyyəti həmin ölkənin öz üzərinə düşmüş olacaq.

Ermənistanın bu addımları nəyə hesablana bilər?

Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, 1988-ci ildən başlayaraq Azərbaycana qarşı ərazi iddiasında olan Ermənistan 1991-ci ildən müharibə ritorikasına keçib və Azərbaycan ərazilərinin işğal edilməsi prosesinə başladı: “Ötən bu dövrdə Ermənistanda özlərinə qarşı bir eqoizm  formalaşmışdı. Ermənistanı toxunulmaz bir dövlət kimi təqdim edirdilər. Hər zaman KTMT-ni və bir sıra başqa ölkələri Ermənistanın təhlükəsizliyinin qarantı kimi yozurdular. Onlar elə bilirdilər ki, yaratdıqları status-kvonu uzun müddət qoruyub saxlaya bilərlər. Əsas da düşünürdülər ki, Ermənistan ərazisindəki hər hansı mövqeyə qarşı əməliyyat keçirə bilmərik. İkinci Qarabağ müharibəsinin gedişi zamanı Azərbaycan Ermənistanın dövlət sərhədi anlayışına bir qədər fərqli yanaşdı. Buna görə də, həmin ölkənin ərazisində heç bir əməliyyat həyata keçirmədi. Bu da onlarda belə bir inam yaratdı ki, ərazilərindən bizə istənilən həmləni edə bilərlər. Bu ayın 12-də hər şey dəyişdi. Açıq deyə bilərəm ki, Ermənistanla Azərbaycan arasında olan münaqişə Qarabağ müstəvisindən çıxaraq, konkret iki ölkə arasındakı savaş müstəvisinə keçdi. Sentyabr ayının 12-də Ermənistanın Azərbaycanın Kəlbəcər və digər istiqamətlər üzrə sərhədlərində etdiyi təxribat stereotipləri darmadağın etdi. Azərbaycan haqlı olaraq, Ermənistanın dərinliklərində yerləşən və bizi hədəfə alan hərbi obyektlərinə zərbələr endirdi. Demək olar ki, həmin nöqtələri sıradan çıxardı. Bu da onlarda ciddi narahatlıq yaratdı. Paşinyan gördü ki, onun yersiz çığır-bağırına reaksiya yoxdur.  Artıq Ermənistan dərk edir ki, Azərbaycan onun istənilən təxribatına layiqli cavab verəcək. Buna görə də, ərazisində olan sığınacaqları təmir edib hazır vəziyyətə gətirir. Belə addımları biz illər əvvəl atmışdıq. Hazırda buna ciddi zərurət görmürük. Bu hadisə Ermənistanın Azərbaycandan hansı səviyyədə qorxduğunun göstəricisi sayılır. Artıq Ermənistan anlayır ki, istənilən təxribata Azərbaycan sərt cavab verəcək. Məsələnin digər tərəfi isə budur ki, Ermənistan bu addımları ilə gələcəkdə dinc dayanmaq fikrində olmadığını sübut edir. Ancaq bilməlidirlər ki, bundan doğacaq istənilən nəticələrə görə bütün  məsuliyyət birbaşa Ermənistanın üzərindədir”.

Məhəmmədəli QƏRİBLİ

Peşə etikası

Son xəbərlər