Məlum olduğu kimi, BMT Baş Assambleyasının 77-ci sessiyasının yüksək səviyyəli həftəsi çərçivəsində, ABŞ dövlət katibi Entoni Blinkenin təşəbbüsü və iştirakı ilə Azərbaycan xarici işlər naziri Ceyhun Bayramovla Ermənistan xarici işlər naziri Ararat Mirzoyan arasında görüş keçirilib. Görüş zamanı, nazir Ceyhun Bayramov post münaqişə dövründə bölgədə sülhün təmin olunması və bu istiqamətdə zəruri addımlar barədə Azərbaycanın mövqeyini diqqətə çatdırıb.
Üçtərəfli görüşdən sonra ABŞ dövlət katibi Entoni Blinken tərəflərə təşəkkür edib: “Ermənistan və Azərbaycan xarici işlər nazirlərinə bu görüş üçün təşəkkür edirəm. Mən son toqquşma zamanı həlak olanların doğmalarına və dostlarına səmimi başsağlığı verirəm. Hər iki liderlə, Azərbaycan Prezidenti İlham Əliyev və Ermənistan Baş naziri Nikol Paşinyanla telefon danışığımda onlar sülh üçün hazır olduqlarını bəyan ediblər. Güclü, davamlı diplomatik çərçivədə işləmək hamı üçün ən yaxşı yoldur. Ermənistan və Azərbaycan arasında fikir ayrılıqlarının hərbi yolla həlli yoxdur, lakin fikir ayrılıqlarını diplomatiya yolu ilə həll edən davamlı sülhə aparan yol var”.
O da məlumdur ki, avqustun 31-də Şarl Mişelin vasitəçiliyi ilə Brüsseldə Azərbaycan və Ermənistan dövlət başçılarının görüşü keçirildi. Həmin görüş zamanı tərəflərə tövsiyə olundu ki, bir ay ərzində xarici işlər nazirləri görüşsünlər. O baxımdan Blinkenin vasitəçiliyi ilə xarici işlər nazirlərinin görüşünü, Brüssel görüşündə əldə olunan razılaşmanın davamı saymaq olarmı? Yoxsa bu, ABŞ-ın vasitəçiliyi ilə ayrı bir formatdır?
“Bayden adminstrasiyası Ermənistanı pozucu addımlar atmağa həvəsləndirir”
Məsələyə münasibət bildirən AMİP funksioneri Əli Orucovun fikrincə, Blinkenin vasitəçiliyi Brüssel görüşünü pozmağa yönəlik bir təşəbbüsdür: “İlk baxışdan bu, təəccüblü görünə bilər. Ona görə ki, hər iki tərəf Qərbi təmsil edir. Belə olan halda ABŞ-ın bu addımı qəribə görünə bilər. Ancaq həqiqətən də ABŞ Brüssel görüşünün nəticələrini pozub təşəbbüsü təkbaşına ələ almaq istəyir. Brləşmiş Ştatlar indiyə qədər Brüsseldə keçirilən 4 görüşə praktiki olaraq dəstək versəydi, sülh danışıqlarıilə bağlı ortada əməli nəticələr olardı. Ancaq biz görürük ki, Bayden adminstrasiyası Ermənistanı pozucu addımlar atmağa həvəsləndirir. Hər vasitə ilə ATƏT-in Minsk Qrupunu yenidən diriltmək istəyirlər. Halbuki, buna ehtiyac belə yoxdur. Ancaq ABŞ Filip Rikeri həmsədr təyin etdi. Postsovet məkanında heç bir separatçı bölgəyə yardım etmədiyi halda, ABŞ Qarabağ separatçılarına milyonlarla dollar yardım edir. Bütün bunlar bir daha onu göstərir ki, ABŞ Qarabağ məsələsinin birdəfəlik həllində maraqlı deyil. Vaşinqtin təşəbbüsü təkbaşına olaraq ələ almaq istəyir”.
Vidadi ORDAHALLI
