Bir neçə gündür ki, Rusiya mediası Türkiyə prezidenti Racəb Tayyib Ərdoğanın Şanxay Əməkdaşlığı Təşkilatının (ŞƏT) Daşkəndə keçirilən növbəti sammitindəki iştirakı və fəallığı ətrafında müzakirələr aparır.
Maraqlıdır ki, bu yöndə olan müzakirələrə artıq Rusiya alimləri də qoşulub. Həmin ölkənin Elmlər Akademiyasının məsul əməkdaşı, tarix elmlər namizədi Stanislav İvanov Ərdoğanın ŞƏT-in tədbirində iştirakını və həmin quruma üzv olmaq niyyətini Türkiyəni eyni anda iki stulda oturtmaq cəhdi kimi dəyərləndirib: “Bir NATO ölkəsinin belə quruma üzv olmaq niyyətinə ŞƏT-in nizamnaməsinin imkan verib-vermədiyi haqda nəsə deyə bilmərəm, bunu zaman göstərəcək. İstisna etmirəm ki, bütün bunlar Ərdoğanın qarşıdan gələn seçkilərdəki piarına hesablanıb. Ərdoğanın eyni zamanda Rusiya ilə Qərb arasında yaranan ziddiyyətdən öz eqoist maraqları üçün istifadə cəhdləri gec-tez onun özünü məhfə aparacaq. Çünki bir var həm Şərq, həm də Qərblə ticarət əlaqəsi qurasan , bir də var silahlı münaqişələrdə barikadaların hər iki tərəfində yer alasan”.
Göründüyü kimi, rusiyalı alim Ərdoğanın yürütdüyü siyasətlə bağlı olduqca qərəzli yanaşma ortaya qoyur. Faktiki olaraq Ərdoğanı öz mənfəətini güdəmək və ikiüzlü siyasət yürütməkdə günahlandırır. Ərdoğanın Rusiya ilə hazırda çox yaxşı münasibətləri var. Belə olan təqdirdə, niyə məhz Rusiyanın rəsmi qurumlarında çalışan şəxslərin onun barəsində dediyi qərəzli fikirlər elə həmin ölkənin mediasında belə geniş tirajlansın?
Politoloq Qabil Hüseynli “Bakı-Xəbər”ə bildirdi ki, Türkiyə çox səmimi şəkildə Şanxay Əməkdaşlıq Təşkilatına can atır: “Niyyəti səmi deyildisə, niyə orada müşahidəçi statusu alırdı? Türkiyənin Avropa Birliyinə almırlar, Türkiyəni bir sıra beynəlxalq təşkilatlarda sıxışdırırlar. Bu da özü üçün alternativ inkişaf yolunu məhz ŞƏT-də görür. Rus alimin Ərdoğanın bu cəhdlərini seçki piarı ilə əlaqələndirməsi başdan ayağa uydurmadır. Ərdoğanın öz ölkəsində reytinqi kifayət qədər yüksəkdi. Bundan əlavə, hər bir siyasətçinin seçkiqabağı öncəsi təbliğat aparmaq, öz reytinüini qaldırmaü hüququ var. Bunun üçün qanunla müəyyən edilmiş bütün vasitələrdən istifadə edilir. Amma Ərdoğanın bu manevr hüququndan ŞƏT-lə bağlı istifadə etməsi inandırıcı deyil. ŞƏT ciddi təşkilatdı, getdikcə də nüfuzu artır. Bu səbəbdən də Türkiyə Özbəkistanın ev sahibliyi etdiyi tədbirdə dedi ki, onun fikiri təşkilata üzv qəbul olunmaqdır. Rusların içərisində belə ürəkbulandıran sözlər danışan tapılacaq. Ərdoğanın reytinqi öz ölkəsində yüksəkdir. Görünür rus alimin Türkiyə barədə məlumatları bəsitdir. Əksinə, hesab edirəm ki, son addımıarı, xüsusilə də Ukrayna ilə Rusiya arasında vasitəçilik cəhdləri Ərdoğanın reytinqini daha da artırıb.
Ərdoğan olmasaydı, Ukrayna taxıllarını Odessa limanından çıxara biləcəydi? Təbii ki, yox! Hansı yollasa o, Putini Odessanı bombalamaqdan çəkindirdi. Bilirsiniz ki, Rusiyanın bütün sahələrində, xüsusilə də elm sahəsində kifayət qədər erməni və onların təsirinə düşən adamlar var. İstisna etmirəm ki, belə anti - türk meyillərinin mənbəyi məhz onlardan qaynaqlana bilər. Bu səbədən də belə fikirləri ciddiyyə almaq lazım deyil”.
Məhəmmədəli QƏRİBLİ
