Son dövrlər Azərbaycanın xaricdəki diplomatik nümayəndəliklərinə hücumların sayı kəskin artıb.
Xaricdəki səfirliyimizə ilk hücum avqustun 5-də Böyük Britaniyanın paytaxtı Londonda qeydə alınıb. Gündüz saatlarında hücum təşkil edən radikal dini qruplaşmanın üzvləri diplomatik korpusun içinə daxil olub, binada dağıntılar törədib, daha sonra pəncərəyə çıxaraq, Azərbaycana qarşı hədələyici və dini şüarlar səsləndiriblər. Maraqlıdır ki, radikallar binaya daxil olarkən diplomatik korpusun xaricdən mühafizəsini təmin etməyə borclu olan ingilis polisi qeybə çəkilmişdi. Düzdür, rəsmi Bakının səfirliyə hücumu ədalətli araşdırılması ilə bağlı verdiyi bəyanatlardan sonra İngiltərənin hüquq-mühafizə orqanları 8 nəfəri saxlasa da, bu rəsmi Londonu məsuliyyətdən azad etmir. Vyana Konvensiyasına görə London radikalların səfirliyə daxil olmasının qarşısını almağa borcludur. Nəinki hücuma görə, səfirliyin binasına digər yollarla daxil olmaq istəyən şəxslərə belə xüsusi prosedur tətbiq olunmalıdır.
Səfirlikləri qorumayan Fransaya ayıb olsun
Azərbaycanla Ermənistan arasında yaşanan sərhəd gərginliyindən sonra erməni təşkilatları ölkəmizə qarşı sistemli təxribata başlayıb. ABŞ-dakı ifrat millətçi Amerika Ermənilərinin Milli Komitəsi, Erməni Gənclər Federasiyası və digər erməni təşkilatlarının üzvləri sentyabrın 15-də Azərbaycanın Vaşinqtondakı səfirliyi qarşısında aksiya keçirib. Ermənilər Livanın paytaxtı Beyrutda da Azərbaycanın bu ölkədəki səfirliyinin binasına hücum etmək istəyiblər.
Həmin ölkədə yaşayan min nəfərədək erməni təxribat törətməyə çalışıb. Lakin polis əməkdaşları bunun qarşısını alıb və toqquşma baş verib.
Qeyd edək ki, əvvəlcədən planlaşdırılmış təxribata cəhd Daşnaksütyun və Hnçak partiyalarının çağırışı ilə baş tutub. Azərbaycan səfirliyinin binasına daxil olmağa çalışan ermənilər Beyrut polisinə hücumlar ediblər.
Polis əməkdaşları təxribatın qarşısını almaq məqsədilə gözyaşardıcı bombalardan istifadə edir.
Ardınca radikal ermənilər tərəfindən Azərbaycanın Fransadakı səfirliyinə hücum edilib. Ermənilər diplomatik korpusun binasına yaxınlaşaraq səfirliyə ziyan vurmağa çalışıblar. Səfirliyin mühafizəsini Fransa polisi həyata keçirməli olduğu halda, diplomatik korpusun əməkdaşı ölümlə üz-üzə qalaraq, gözü dönmüş radikal ermənilərin binaya daxil olmasına imkan verməyib. Hücumun ardından Azərbaycanın Fransadakı səfiri Rəhman Mustafayev öz "Twitter" hesabında prezident Emmanuel Makrona xitabən "səfirlikləri qorumayan və təhlükəsizliyimizlə bağlı əsaslı tələblərimizə məhəl qoymayan Fransaya ayıb olsun" yazıb.
Cavabdeh olan qurumların öz vəzifələrinə məsuliyyətlə yanaşmasını gözləyirik
Azərbaycan Respublikası Xarici İşlər Nazirliyi Azərbaycanın xarici ölkələrdəki diplomatik nümayəndəliklərinə qarşı erməni icmalarının hücumları ilə bağlı açıqlama yayıb: “Son günlərdə Azərbaycanın xarici ölkələrdəki diplomatik nümayəndəliklərinin binalarına qarşı bu ölkədəki erməni icmaları tərəfindən hücumlar törədilməsi ciddi narahatlıq doğurur. Özündə vandalizm və terror elementlərini ehtiva etməklə bu hücumlar diplomatlara, onların mülklərinə xəsarət yetirmək məqsədini güdür, beləliklə də cinayət məsuliyyəti doğuran əməllər kimi səciyyələndirilir. Radikal erməni qruplarının cinayətkar hərəkətlərini qətiyyətlə pisləyirik və müvafiq ölkələrdə bu cür təxribatların qarşısının alınmasına cavabdeh olan qurumların öz vəzifələrinə məsuliyyətlə yanaşmasını gözləyirik. Azərbaycan tərəfi radikal erməni qüvvələrinin törətdiyi vandalizm aktlarının aidiyyəti dövlətlərin hüquq-mühafizə orqanları tərəfindən araşdırılmasını və bu cinayətləri törədənlərin hərəkətlərinə hüquqi qiymət verilməsini tələb edir.
Xatırladırıq ki, Diplomatik əlaqələr haqqında 1961-ci il Vyana Konvensiyasına uyğun olaraq, diplomatik nümayəndəliyi hər cür hücumlardan və zərər vurulmasından qorumaq və nümayəndəliyin sakitliyinin pozulmasının və ya şərəfinin təhqir olunmasının qarşısını almaq üçün lazımi tədbirlər görmək yerləşmə dövlətinin xüsusi vəzifəsidir".
Yeri gəlsə, səfirliklərimizin önündə çadır qurub, keşik çəkməlidir
Beynəlxalq Diaspor Mərkəzinin rəhbəri İsmayıl Ağayev “Bakı-Xəbər” ə açıqlamasında bildirdi ki, 2020-ci ilin Tovuz hadisələrindən sonra da ermənilər xaricdə səfirliklərimizə və soydaşlarımıza qəfil hücumlar edir, döyürdülər: “Nəticədə azərbaycanlılar quduzlaşan ermənilərə adekvat reaksiyalar verməyə başladılar, bir sıra ölkələrdə - Rusiyada, Belçikada, Moldovada böyük qarşıdurmalar oldu. Biz görürük ki, Ermənistanla münasibətlərdə Vyana konvensiyası keçərli deyil. Tarixən Daşnaksütyun Partiyası, həmçinin ASALA tərəfindən onlarla türk diplomatı şəhid edilib. Bu gün də eyni təcrübəni tətbiq etməyə davam edirlər. Bu, beynəlxalq cinayətdir, beynəlxalq diplomatiya hüququnun pozulmasıdır. Son hadisələr göstərir ki, Azərbaycan diplomatlarının həyatı mühafizə edilmir. Hanı bizim diasporumuz? Araşdırsanız görərsiniz ki, məhz səfirliklərimizə hücum olan ölkəlırlə bağlı diaspor təşkilatlarının qurulması, bu yöndəki layihələrə ciddi vəsaitlər xərclənib. O pul dövlət büdcəsindən ayrılıb ki, belə kritik məqamlarda diasporumuzun səsinin çıxdığını görək. Təkcə şəkil çəkdirib qrant hesabatı verməklə işi bitmiş sayanda nəticə belə olur. Diasporumuz məhz belə məqamda fəallıq nümayiş etdirməlidir. Yeri gəlsə, səfirliklərimizin önündə çadır qurub, keşik çəkməlidir. Səfirliklərimizin önündə izdihamlı dəstək, erməni səfirliklərinin önündə etiraz mitinqləri olmalıdır. Hesab edirəm ki, Diaspor Komitəsinin bu istiqamətdə olan fəaliyyətini daha səmərəli təşkilinə zərurət var”.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
