Bu gün ən çox müzakirə olunan məsələlərdən biri də Ermənistanın sentyabrın 13-də Azərbaycana qarşı törətdiyi genişmiqyaslı təxribatın arxasında hansı dövlətin dayanmasıdır.
Bu arada 13 sentiyabr təxribatından əvvəl ABŞ-ın Ermənistanla bağlı addımları və şübhəli davranışları diqqəti cəlb edir. Məsələ ondadır ki, Mərkəzi Kəşfiyyat İdarəsinin rəhbəri gizli şəkildə Ermənistana səfər etdi. Məhz ondan sonra Ermənistanın Laçın və Kəlbəcərlə sərhəd olan ərazilərdə atəşkəsin pozulması halları artmağa başladı. Daha sonra Birləşmiş Ştatlarda Qarabağ ermənilərinə maliyyə yardımı edilməsinə qərar verildi, Filip Riker Minsk Həmsədr kimi təqdim olundu. O cümlədən, ABŞ səfiri Şuşa səfərindən nümayişkaranə şəkildə imtina etdi. Ondan sonra ermənipərəst konqresmenlər separatçılara 2 milyon dollar yardımın yetərli olmadığını, əlavə humanitar yardım təşəbbüsü ilə çıxış etdilər. Paralel olaraq da Azərbaycana qarşı çağrışlar artmağa başladı. Avrpanı Azərbaycan qazını baykot etməyə çağırdılar. Bütün bunlardan sonra qanlı 13 sentyabr təxribatı baş verdi.
Məlum proseslərdən sonra Ermənistanın 13 sentyabr təxribatına əl atması təsadüfdürmü? Bütün bu şübhəli addımlar o qənaətə gəlməyə əsas verirmi ki, təxribat müəyyən mənada ABŞ-dan qaynaqlanır?
“Vaxtı ilə Azərbaycana qarşı törədilmiş qanlı cinayətlərin arxasnda hansı dövlətlərin durduğu yavaş-yavaş məlum olur”
Məsələyə münasibət bildirən Azərbaycan Kommunist Partiyası MK-nın sədri Rauf Qurbanov bu versiyanı istisna etmədi: “Azərbaycan cəmiyyəti bir dəfəlik başa düşməlidir ki, Ermənistanda hansı yönümlü siyasi qüvvənin hakimiyyətdə olmasından asılı olmayaraq qərb dövlətləri, xüsusi ilə də ABŞ daima Ermənstanın yanında olub. İrəvana və Xankəndinə miliyonlarla təmənnasız maliyyə yardımları göstərib və s. Bu baxımdan ABŞ və Avropa İttifaqına daxil olan əksər dövlətlərin Azərbaycana, Qarabağ məsələsinin həllinə münasibətlərinin qeyri-konstruktiv olduğu Azərbaycan cəmiyyəti üçün tam aydındır. Artıq heç kimə sirr deyil ki, Azərbaycanı təxribata çəkmək istəyən Ermənistan bu istiqamətdə bütün hərəkətlərini Qərbdən aldığı təlimatlar əsasında edir. Çünki bölgədəki mövcud geosiyasi reallıq Qərbin maraqlarına uyğun gəlmir. Onlar iki il bundan öncə 44 günlük zəfər savaşında Azərbaycanın Ermənistan üzərində qazanmış olduğu şanlı qələbəsini və Ermənistanın kapitulyasiya aktına imza atmasını qəbul edə bilmirlər. Bu reallıq ABŞ, Fransa ilə yanaşı digərAvropa Birliyinə daxil olan dövlətləri də qane etmir. Hələ bir qədərdə məsələləri dərindən araşdırsaq onda görərik ki, məhz Birinci Qarabağ savaşında da Azərbaycanın əzəli torpaqlarının işğalının ssenarisi okeanın o tayında hazırlanıb. Daha sonra o vaxtkı Rusiya prezidenti Boris Yeltsinin rejisorluğu ilə Azərbaycan səhnəsində tamaşaya qoyulub. Azərbaycan xalqı bu günə kimidə Qarabağın işğalını, qərbi azərbaycalıların Ermənistandan qovulmasını Rusiya dövlətinin ölkəmizə qarşı qeyri-səmimi münasibəti kimi başa düşürlər. Lakin, bu məsələ əslində belə deyil. Zaman keçir, sular durulur və dibindəki daşlar daha aydın görünməyə başlayır. Vaxtı ilə Azərbaycana qarşı törədilmiş qanlı cinayətlərin arxasnda kimlərin və hansı dövlətlərin durduğu yavaş-yavaş məlum olur”.
Partiya sədri hesab edir ki, həqiqətən də 13 sentyabr təxribatından əvvəl Mərkəzi Kəşfiyyat İdarəsinin rəhbərinin gizli şəkildə Ermənistana gəlməsi, bunun ardınca Ermənistan müdafiə nazirinin ABŞ -a səfəri və Pentaqonda yüksək çinli rəsmilərlə məxfi görüşlər keçirərək danışıqlar aparması bir çox mətləblərə tam aydınlıq gətirir: “Bütün bunlar az imiş kimi, Birləşmiş Ştatlarının dövlət katibi Blinkenin faktiki olaraq fəaliyyətinə çoxdan xitam verilmiş Minsk Qrupuna yeni Amerikalı həmsədrini təyin etməsi, ABŞ Nümayəndələr Palatasının rəhbərinin İravana rəsmi səfəri “qərb demokratiyasının” bariz nümunəsidir. Onu da qeyd etməyi vacib bilirəm ki, Azərbaycan xalqının özündən başqa ona yaxın digər müttəfiqi yoxdur. Biz vətəndaş çəmiyyəti olaraq bir olmalı, belə gərgin məqamda dövlət başçısının ətrafında sıx birləşməli, doğma vətənimizə qarşı uzanmış qara əllərə və cirkin niyyətlərə qarşı birgə mübarizə aparmalıyıq. El bir olarsa basılmaz vətən!”.
Vidadi ORDAHALLI
