Paşinyan hakimiyyəti rəsmi Tehranın əsas düşməni olan ABŞ-a öz ərazisində geniş qol-qanad verməyə hazırlaşırlar. Erməni politoloqların özləri belə , Nensi Pelosinin İrəvana Ermənistanı İran əleyhinə düşərgəyə çəkmək üçün gəldiyini açıq şəkildə etiraf edirlər. Maraqlıdır ki, bəzi erməni politoloqlar N.Pelosinin səfərindən narahat olduqlarını da qətiyyən gizlətmirlər.
Rəsmi Tehran Ermənistan sərhədlərinin İran üçün “qirmızı cizgi” olduğunu vurğulayır. Rəsmi İrəvan isə həmin “qirmızı cizgi”nin daxilində İranın deyil, məhz onun əsas düşməni olan ABŞ-ın yerləşdirilməsinə cəhd göstərir. Paşinyan hakimiyyəti İranın regional maraqlarını ABŞ-a satmağa tamamilə hazırdır. ABŞ-ın Ermənistanla hərbi əməkdaşlığı gücləndirmək niyyətini biruzə verməsindən sonra İranın mövqeyi böyük maraq doğurur. İran regionda baş verən istənilən Azərbaycan-ABŞ və ya Azərbaycan-İsrail yaxınlaşmasına rəsmi şəkildə sərt etiraz edibsə onun ABŞ-Ermənistan tandeminə niyə sərt reaksiya vermədiyi sual doğurur.
Böyük Dayaq Partiyasının sədri Mirkazım Seyidov “Bakı-Xəbər”ə açıqlamasında bildirdi ki, son günlər Cənubi Qafqazdakı proseslərin gərginləşdiyinin şahidi oluruq: “Elə əməkdaşlıq modelləri var ki, ondan qıcıqlanan ölkələr olur. Məsələn, Türkiyə-Azərbaycan əməkdaşlığından qıcıqlanan İran var. ABŞ-ın Ermənistanla yaxınlaşması İranı qıcıqlandırmaya bilməz. Sadəcə, elə davranırlar ki, Ermənistanla açıq konfrantansiyaya getməsinlər. Çünki Ermənistan Azərbaycanla konfliktdə olan ölkə kimi İran üçün önəmlidir. Ancaq İran Azərbaycanın Qərb və ABŞ-la olan əməkdaşlığına daha sərt reaksiya verirdi. Sərhəddə baş verən hadisələrlə bağlı İran birmənalı olaraq Ermənistanı dəstəkləyir. İran açıq şəkildə deyir ki, Zəngəzur dəhlizinin açılmasında maraqlı deyil. İran uzun illərdi ki, Ermənistan üçün nəfəslik rolunu oynayıb. Ola bilər ki, ABŞ-ın Ermənistanla bağlı planlarının içində İranın da müəyyən razılığı var. İran bu tandemə sözdə etirazını edir, amma əməldə məmnun olduğunu biruzə verir. Artıq Ermənistanda Putinin şəkili olan posterləri yığışdırırlar. Anti-Rusiya ritorikasına rəsmi şəxslər belə qoşulub. ABŞ Ermənistanın vasitəsilə regionda yerləşmək istəyir. Özü də silahı və sürsatı ilə. Açıq etiraf edirlər ki, Ermənistana hərbi yardım da göstərərəcəklər. Ukrayna müharibəsi böyük güclərin bizim regiona da marağını artırıb. Ancaq Rusiya İranı ABŞ-ın regiona təşrif buyurmasına sərt etiraz etməyə vadar edəcək. Regionda gedən bu oyunlar bizim üçün ciddi problemlər vəd edə bilər. Biz elə etməliyik ki, böyük güclər məhz bizim ərazimizdən bir-biri ilə mübarizə aparmasınlar. Belə bir məqamda biz cəmiyyət olaraq dövlətin yanında yer almalıyıq. Ancaq təəssüf ki, bizim Qərbə bağlı olan bəzi siyasilərimiz Ermənistandan daha çox, Azərbaycanı qınayırlar. Hətta güya bizim Ermənistana təcavüz etdiyimizə dair fikir formalaşdırmağa çalıırlar. Təəssüf ki, onların sırasında İrana meyilli olan dindarlar da az deyil. İran anlamalıdır ki, ABŞ-ın regionda yerləşməkdə ən böyük maraqlarından biri də İrana nəzarətdi gücləndirməkdi. Ermənistan da buna iki əlli razıdır. Ancaq Azərbaycan hər zaman bəyan edir ki, biz heç bir dünya gücünə öz ərazimizdən İrana qarşı fəaliyyətə imkan verən deyilik. Yaxşı olar ki, zəngin dövlətçilik təcrübəsi olan İran bu məsələlərə bir qədər soyuqqanlı yanaşsın”.
Məhəmmədəli QƏRİBLİ
