Son günlər Göyçə-Zəngəzur Respublikasının (GZR) yaradılması ilə bağlı məlumat yayılıb. Hətta qardaş Türkiyə mediası da məlum məsələyə yer ayırıb. GZR-in yaradılması xəbəri bizə maraqlı gəldi. Göyçə-Zəngəzur Respublikası deyilən qurumun adından yayılan məlumatda bildirilir ki, adıçəkilən dövlət guya Ermənistanla əldə etdiyi razılaşma əsasında Qafanı, ya Basarkeçəri paytaxt edəcək.
Həmçinin bu qurumun Azərbaycan ictimaiyyəti tərəfindən necə qarşılanacağı da maraqlıdır. Göyçə-Zəngəzur Respublikası deyilən qurumun adından yayılan məlumatlarda o da bildirilir ki, guya Azərbaycanın müəyyən dövlət qurumlarına da müraciət olunub və edilən müraciətlər əsasında Bakı və ya Gəncə şəhərlərində GZR-in ofisi olacaq.
Bəyanatda qeyd edilir ki, Göyçə-Zəngəzur Respublikasına paytaxt olaraq, Ermənistan Respublikası hökuməti ilə razılaşdırılmaqla, Qafan şəhəri, yaxud Vardenis (Basarkeçər) şəhəri nəzərdə tutulur. Qeyd edilir ki, Göyçə-Zəngəzur Respublikası Ermənistanın ərazisində yaradılacaq. Maraqlıdır, Ermənistan buna razı olacaqmı? Bütün bunların real olacağına necə inanmaq olar?
Bu kimi suallara cavab tapmaq üçün özünü Göyçə - Zəngəzur Respublikasının (GZR) prezidenti elan etmiş Rizvan Talıbova müraciət etdik.
“Ermənistan hökumətinin məlum məsələyə razı olub-olmaması bizi qətiyyən narahat etmir”
R.Talıbov “Bakı-Xəbər”ə açıqlamasında qeyd etdi ki, rəhbərlik etdiyi təşkilat 10 mart 2021-ci il tarixində yaradılıb. Qərbi Azərbaycana Qayıdış Birliyinin ali məşvərət şurasının 200 ziyalı üzvünün iştirakı və qərarı ilə Göyçə - Zəngəzur Respublikası yaradılıb: “Ötən müddət ərzində yaradılan respublikanın dövlət struklarının formalaşması üçün bir çox işlər görülüb. Nazirlər Kabinetinin, Milli Məclisin və digər strukturların formalaşdırılması üçün həmin bəyannamə ilə tənzimlənir. Eyni zamanda, yeni şəraitə uyğun olaraq cari ilin 3 avqust tarixində Qərbi Azərbaycana Qayıdış Birliyinin ali məşvərət şurasının ikinci bəyannaməsi qəbul edildi. Həmin bəyannamə legitim sənəd olaraq bizim bu dövlətin idarə edilməsində istifadə etdiyimiz sənəddir. Həmin sənədə əsasən biz fəaliyyətimizi davam etdiririk. Bizim dövlət olaraq ortaya qoyduğumuz əsas məsələ Göyçə gölündən başlayaraq İran sərhədinə qədər olan ərazilərdir. Göyçə, Qaraqoyunlu, Dərələyəz, Zəngi, Vedibasar, Zəngəzur və digər mahallarını əhatə edən ərazilərdən söhbət gedir. Məlumdur ki, bu ərazilər 1918-1920-ci illərdə qurulmuş Azərbaycan Xalq Cumhuriyyətinin sərhədi olub. Dünya dövlətləri də həmin sərhədləri daxilində Azərbaycan Xalq Cumhuriyyətini müstəqil dövlət olaraq tanımışdır. Məlum sonra baş verən proseslərə görə həmin ərazilər qeyri-qanuni şəkildə yerli əhalinin rəyi nəzərə alınmadan Ermənistana verildi. Məlumat üçün bildirim ki, qeyd edilən ərazilərdə 85 faiz azərbaycanlı yaşayıb. Azərbaycanlıların sayca çoxlu təşkil etmələrinə baxmayaraq bu ərazilər Ermənistana verildi”.
R.Talıbovun sözlərinə görə, elan edilən Göyçə - Zəngəzur Respublikasının tanıdılması istiqamətində müəyyən işlər görülür: “Dövlətin tanınmması üçün qardaş ölkə Türkiyə, türk dövlətlərinə, ABŞ və digər dünya dövlətlərinə müraciət etmişik. Məlumat üçün bildirim ki, Türkiyənin paytaxtı Ankarada bizim dövlətin ofisi belə açılıb. Orda çox böyük səmərəli görüşlər keçirdik”.
Həmsöhbətimiz onu da əlavə etdi ki, Göyçə - Zəngəzur dövlətinin paytaxtı Qafan şəhəridir. Coğrafi regional baxımından Qərbi Zəngəzur mahalına aid bir şəhərdir, uyğun bir seçimdir: “Ermənistan hökumətinin məlum məsələyə narazı olub-olmaması bizi qətiyyən narahat etmir. Onların son təxribatçı hərəkətləri, sülh müqaviləsini imzalamaqdan imtina etməsi, regionda sülh və əminliyə daim təhdid olaraq qalmasına görə onların hansı düşüncədə olması bizi maraqlandırmır. Göyçə - Zəngəzur Respublikasının Nazirlər Kabinetinin toplantısında Ermənistanla hər hansı bir danışıqların aparılmaması, Azərbaycan və Türkiyə dövləti ilə danışıqların aparılacağı qəbul edilib. Həmçinin, Göyçə - Zəngəzur Respublikasının bərqərar olması üçün Azərbaycan və Türkiyədən də dəstək istəyəcəyik”.
R.Talıbov bildirdi ki, yaradılan dövlətin mərkəzi iqamətgahının olması vacibdir. Artıq Ankara şəhərində GZR-nın nümayəndəliyi fəaliyyət göstərir: “Azərbaycanda isə Qərbi Azərbaycana Qayıdış Birliyinin ofisi mövcuddur. Ancaq dövlət üçün həmin ofis uyğun deyil. Bu istiqamətdə Bakı şəhərində iqamətgahın olması üçün yer axtarırıq”.
Özünü GZR prezidenti kimi təqdim edən Rizvan Talıbov onu da vurğuladı ki, onlar Azərbaycan və Türkiyə dövlətinin məlum işə ciddi şəkildə qarışmasının tərəfdarı deyil: “Məlumdur ki, Azərbaycanı istəməyən qüvvələr yetərincədir. Onlar Ermənistanın regiondan davamlı olması üçün çalışırlar. Hətta bu günlərdə Amerikanın nümayəndələr palatasının sədri Nensi Pelosinin də Ermənistana səfəri və orda Azərbaycana qarşı çıxışları bunun əyani sübutudur. Bu səbəbdən də biz müstəqil dövlət olaraq tarixi torpaqlarımız uğrunda dövlət olaraq mübarizə aparmağın tərəfdarıyıq”.
Günel CƏLİLOVA
