Məlum olduğu kimi, ABŞ Nümayəndələr Palatasının spikeri Nensi Pelosi Ermənistana səfər edib. Səfər zamanı N.Pelosi bölgədəki vəziyyətlə bağlı həqiqətə uyğun olmayan açıqlamalar verib.
N.Pelosi tərəfindən Azərbaycana qarşı əsassız və ədalətsiz ittihamları səsləndirilib. Onun məlum fikirləri ölkəmizdə narazılıqla qarşılanıb. Buna etiraz olaraq sosial şəbəkə istifadəçiləri #dovletimizinyanindayam adlı həştəqlə dövlətə dəstək olduqlarını bəyan edirlər.
“ABŞ rəsmisinin Ermənistanda həddini aşan bəyanatlar verməsi, xüsusən də Azərbaycan və Türkiyəyə yüklənməsi ölkə ictimaiyyəti tərəfindən birmənalı qarşılanmamalı idi”
Siyasi şərhçi Azər Həsrət qeyd etdi ki, ABŞ rəsmisinin Ermənistanda həddini aşan bəyanatlar verməsi, xüsusən də Azərbaycan və Türkiyəyə yüklənməsi ölkə ictimai tərəfindən birmənalı anlayışla qarşılanmamalı idi. Belə də oldu: “Hakimiyyətə münasibətindən asılı olmayaraq hər kəs dövlətin yanında olduğunu bəyan edir. Sosial mediada #dovletimizinyanindayam adlı həştəqlə kampaniya başladılıb. Şəxsən məndə bu kampaniya iştirak edirəm. Kimliyindən asılı olmayaraq hər kəs bu kampaniyada iştirak edir. Hətta sadə insanlar belə sosial media vasitəsilə dövlətin yanında olduğunu bəyan edir. Bu kampaniyanın keçirilməsində məqsəd odur ki, ABŞ rəsmisi Azərbaycan və Türkiyəni əsassız fikirlərlə ittiham edə bilməz. Saxta soyqırım və ya güya Azərbaycanın Ermənistanın təcavüz etməkdə ittiham olunması bizim tərəfimizdən sakit qarşılana bilməzdi. Azərbayvan vətəndaşı bu cür məsələlərdə çox həssasdır. Amerika və ya hansı ölkə olur olsun xalqımıza qarşı böhtan fikirlər səsləndirilirsə Azərbaycan xalqı bir yumruq kimi birləşib, həmin qüvvələrə lazımi cavab verəcək və verir”.
Həmsöhbətimiz onu da əlavə etdi ki, ABŞ Təmsilçilər Palatasının sədri xanım Pelosi və onu kimi düşünənlər bilməlidir ki, Azərbaycan xalqının 7-dən 77-yə hər bir vətəndaşı hər qarış torpağı üçün canından və həyatından keçməyə hazırdır: “Azərbaycan xalqının nəyi necə və nə zaman etməyi dəqiq bilən yenilməz və məğlubedilməz Lideri var. Onun sarsılmaz və qətiyyətli siyasi iradəsinin ifadəsi olan “dəmir yumruq”un gücü haqqında da bu gün yetərli məlumatlar var. Ermənistanın ərazi bütövlüyünə belə təəssüb və dəstək nümayiş etdirən Pelosi bu qədər ədalətli və haqqın tərəfindədirsə, 30 illik Ermənistan işğalçılığı dövründə niyə səsini çıxarmadı, Azərbaycana səfər etmədi, ölkəmizə dəstək nümayiş etdirmədi, azərbaycanlılara qarşı erməni vəhşiliyini pisləmədi?! Əgər Pelosi haqqın və ədalətin tərəfdarıdırsa, ermənilər işğal etdikləri ərazilərdə bütün yaşayış məskənlərini, infrastrukturu, qəbirləri, dini-tarixi abidələri dağıdarkən niyə bu vəhşiliyi pisləyən bəyanatlar vermədi?”.
Günel CƏLİLOVA
