Son günlər respublikamızın xarici ölkələrdəki diplomatik nümayəndəliklərinin binalarına qarşı bu ölkədəki erməni icmaları tərəfindən hücumlar törədilməsi ciddi narahatlıq doğurur.
Fransada ermənilər Azərbaycanın bu ölkədəki səfirliyinə basqın ediblər. Bnunla bağlı görüntülər sosial şəbəkələrdə yayılıb. Fransanın hüquq-mühafizə orqanları isə onlara müdaxilə etməyib.
Azərbaycanın Fransadakı səfiri Rəhman Mustafayev tviter hesabında bunları yazıb:
“Fransanın erməni fanatları Azərbaycanın səfirliyinə basqın edirlər. Amma gəlin erməni barbarlarını bir kənara qoyaq cənab Emmanuel Makron, səfirlikləri qorumayan və təhlükəsizliyimizlə bağlı əsaslı tələblərimizə məhəl qoymayan Fransaya ayıb olsun!”.
Qeyd edək ki, ermənilər dünyanın bir çox ölkələrində Livanda, Gürcüstanda, ABŞ-da Azərbaycan səfirliklərinə hücum edib.
Bir zamanlar ASALA terror təşkilatı Türkiyənın Avropadakı səfirliklərinə hücum edir, səfirləri qətlə yetirirdi. Belə işlərdə kifayət qədər təcrübələri olan erməmilər Azərbaycan diplomatlarını da qətlə yetirmək taktikasını seçə bilərlərmi?
Azərbaycan Respublikası Xarici İşlər Nazirliyi bildirib ki, özündə vandalizm və terror elementlərini ehtiva etməklə bu hücumlar diplomatlara, onların mülklərinə xəsarət yetirmək məqsədini güdür, beləliklə də cinayət məsuliyyəti doğuran əməllər kimi səciyyələndirilir:
"Radikal erməni qruplarının cinayətkar hərəkətlərini qətiyyətlə pisləyirik və müvafiq ölkələrdə bu cür təxribatların qarşısının alınmasına cavabdeh olan qurumların öz vəzifələrinə məsuliyyətlə yanaşmasını gözləyirik.
Azərbaycan tərəfi radikal erməni qüvvələrinin törətdiyi vandalizm aktlarının aidiyyatı dövlətlərin hüquq-mühafizə orqanları tərəfindən araşdırılmasını və bu cinayətləri törədənlərin hərəkətlərinə hüquqi qiymət verilməsini tələb edir.
Xatırladırıq ki, Diplomatik əlaqələr haqqında 1961-ci il Vyana Konvensiyasına uyğun olaraq, diplomatik nümayəndəliyi hər cür hücumlardan və zərər vurulmasından qorumaq və nümayəndəliyin sakitliyinin pozulmasının və ya şərəfinin təhqir olunmasının qarşısını almaq üçün lazımi tədbirlər görmək yerləşmə dövlətinin xüsusi vəzifəsidir", - XİN-dən əlavə edilib”.
Yaranmış vəziyyətlə bağlı fikirlərini “Bakı-Xəbər”lə bölüşən siyasi şərhçi Elşad Həsənovun sözlərinə görə, Ermənistan öz məkirli siyasətini davam etdirir: “Nelsi Pelosinin bir neçə ay əvvəl planlaşdırılan səfəri ərəfəsində ermənilər Azərbatcanla sərhəddə təxribat törətdilər. İki gün ərzində ağır döyüşlər getdi. Bizim 80 şəhidimiz var. Onlardan ölənlərin sayı daha çoxdur, 400-ə yaxındır. Bundan sonra ermənilər öz xislətlərinə uyğun taktikanı seçərək, yalandan ağlayıb, şüvən qoparmağa başladılar ki, güya Azərbaycan onların ərazisinə soxulub. KTMT-yə etdikləri şikayətdən sonra həmin qurumdan da nümayəndə heyəti gəlib, vəziyyətlə tanış oldu. Biz onların sərhəddə olan, hücum məqsədi ilə istifadə etdikləri atəş nöqtələrini susdurduq. Nelsi Pelosi bu səfəri ona görə planlaşdırıb ki, noyabr ayında ABŞ-da keçiriləcək aralıq seçkilərində erməni diasporunun səsini qazana bilsinlər. Nümayəndələrin tərkibi ermənilər tərəfindən ələ alınmış senator və konqtesmenlərdən təşkil olunsun. Bu hadisələrin fonunda xaricdəki erməni lobbisinin dəstəyi ilə müxtəlif ölkələrdəki səfirliklərimizə qarşı aksiyalar həyata keçirildi. Gürcüstanda cəhdləri alınmadı. Həmin ölkənin əlaqədar qurumları buna icazə vermədi. Onlar sadəcə yürüş keçirməklə kifayətləndilər. Ancaq Fransa və Livanda ermənilər səfirliklərimizə qarşı əsl vandal hərəkətləri etdilər. Öz milli xislətlərini açıb ortaya qoydular. Onlar həmişə arxadan zərbə vurublar. Üz-üzə gəlib döyüşə bilmirlər. Tarixdən bildiyimiz kimi, erməni terror təşkilatları bütün dünyaya yayılıblar. Onlar Türkiyə diplomatlarına qatşı silsilə terrorlar həyata keçirdilər. Bu gün isə bu təhlükə bizim diplomatlarımıza qarşı var. Onlar terror yolları ilə öz alçaq niyyətlərini həyata keçirmək istəyirlər. Ancaq müasir dönəmdə bunu etmək elə də asan deyil. Səfirliklərimizin təhlükəsizliyi lazımi səviyyədə mühafizə olunur. Vyana Konvensiyasına görə, həmin səfirliklər, olduqları ölkələrin təhlükəsizlik təminatındadır. Təəssüf ki, Londondakı səfirliyimizə edilən hücumun qarşısı alınmadı. İndi də eyni hərəkət Fransada təkrar edilir. Belə hadisələrin davamlı xarakter alacağını düşünürəm. Ermənilər öz xislətini gizlədə bilmir. Biz də etirazlar etmişik, ancaq belə vandallığa yol verməmişik. Belə etiraz üsulu olmur. Bizim xaricdəki diaspor fəallarımız səfərbər olub, ermənilərin lazımi cavabını verməlidir. Biz sülh yolu ilə etirazlarımızı bildirməliyik. Bundan əlavə, xaricdəki səfirliklərimizin təhlükəsizliyi daha da gücləndirilməlidir. Ermənilərin bu vandallıqlarını geniş şəkildə dünyaya göstərməliyik”.
Məhəmmədəli QƏRİBLİ
