Çap mediası subyektinin təsisçisi ola bilən dövlət orqanlarının (qurumlarının) siyahısı təsdiqlənib. Bununla bağlı Prezident İlham Əliyev fərman imzalayıb.
Fərmana əsasən, Azərbaycan Respublikası Prezidentinin İşlər İdarəs, Azərbaycan Respublikasının Elm və Təhsil Nazirliyi. Azərbaycan Respublikasının Ədliyyə Nazirliyi, Azərbaycan Respublikasının Müdafiə Nazirliyi, Azərbaycan Respublikasının Daxili İşlər Nazirliyi, Azərbaycan Respublikasının Mədəniyyət Nazirliyi, Azərbaycan Respublikasının Dövlət Sərhəd Xidməti, Azərbaycan Respublikasının Dövlət Neft Şirkəti, Azərbaycan Milli Elmlər Akademiyası və Azərbaycan Respublikasının Dövlət İmtahan Mərkəzi çap mediası subyektinin təsisçisi ola bilər.
Təbii ki, bütün dövlət qurumları media orqanı təsis edə bilməz. Maraqlıdır, media təsisçiliyi hüququ hamıya verilərdisə nə baş verərdi? Bunun nə kimi mənfi təsirləri olardı?
Şakir Ağayev: “Həmin qurumların öz mediası olarsa onlar məlumatı onlara aid olan mediaya verəcəklər və bununla da öz işlərini bitmiş hesab edəcəklər”
"Novoye vremya" qəzetinin baş redaktoru Şakir Ağayev bildirdi ki, dövlət qurumlarının media təsis etməsi düzgün deyil. dünyanın heç bir ölkəsində dövlət qurumu media təsis etmir. Bununda məlum səbəbləri var: “Məlumdur ki, əksər dövlət qurumlarından məlumat almaq heç də asan deyil. Həmin qurumların öz mediası olarsa onlar məlumatı onlara aid olan mediaya verəcəklər və bununla da öz işlərini bitmiş hesab edəcəklər”.
Akif Aşırlı: “Artıq icra hakimiyyətləri çap mediası təsis edə bilməzlər, bu isə o deməkdir ki…”
“Şərq” qəzetinin baş redaktoru Akiş Aşırlı bildirdi ki, Mətbuat haqqında yeni qanunda media subyektlərinin təsisi ilə bağlı xüsusi bir maddə var. Prezident İlham Əliyevin imzaladığı məlum fərmanda həmin qanunun elementlərinin əks etdirən müddəalar var: “Həmişə dövlətin media üzərində nəzarətinin olmadığını deyilib. Tənzimlənmə prosesi Mətbuat Şurası və ya digər jurnalist qurumları tərəfindən həyata keçirilir. Dövlət qurumlarına çap mətbuatı və onlayn media subyektləri təsis etmək hüququ veriləcək. Müdafiə Nazirliyi, Mədəniyyət Nazirliyi və digər qurumlar media təsis edə bilərlər. Dövlət qurumlarının media təsis etməsi o deməkdir ki, dövlətin özünün informasiya siyasəti və cəmiyyətə verəcəyi konkret mesajlar var”.
Həmsöhbətimiz onu da əlavə etdi ki, yerli icra hakimiyyətlərinə və digər dövlət qurumlarına belə bir səlahiyyət verilməyib. Artıq icra hakimiyyətləri çap mediası təsis edə bilməzlər: “Məlumdur ki, regionlarda elə qəzet var ki, onların təsisçiləri rayonun icra strukturları çıxış edir”.
Elçin Mirzəbəyli: “Məlum fərmanla ayrı-ayrı dövlət qurumlarının nəzdində media subyekti yaratmaq ənənəsinə son qoyulacaq”
“Xalq Cəbhəsi” qəzetinin baş redaktoru Elçin Mirzəbəyli bildirdi ki, “Media haqqında” qanunun tələblərindən irəli gələrək, belə bir fərman imzalanıb: “Fərmanda elə təsisatların adları yer alıb ki, onların media təsis etmələri zəruridir. Məsələn, Azərbaycan ordusunda şəxsi heyətlə bağlı məlumatların yayılması və ya ideoloji işin aparılması üçün xüsusi bir mətbuat orqanının olması vacib şərtlərdən biridir. Eyni aspektdən, digər media subyekti yaratmaq imkanı verilən təsisatları da dəyərləndirmək olar. Bu baxımdan sərhədlər müəyyənləşib. Bu önəmli məsələdir. Təbii ki, media subyekti yaratmaq bütün dövlət qurumlarına şamil edilmir. Digər qurumların media subyekti yaratmaq hüquqi yoxdur. Bu “Media haqqında” qanunda da qeyd edilib. Həmin qurumlar özlərinə aid media yaratmaq istəyə bilərlər. Ancaq bu media subyekti hesab edilməyəcək. Bununla da ayrı-ayrı dövlət qurumlarının nəzdində media subyekti yaratmaq ənənəsinə son qoyulacaq. Bu ölkə mediasının çəkisinin artmasın deməkdir”.
E.Mirzəbəyli hesab edir ki, məlum fərman media sahəsində aparılan islahatların fəaliyyətinə müsbət təsir edəcək. Media sahəsində aparılan islahatların mahiyyəti ondan ibarətdir ki, fəaliyyətdə olan media subyektlərinin həm maddi texniki bazası yenilənsin, həm yayım imkanları genişlənsin, onların oxucu, dinləyici və ya tamaşaçı kütləsi artsın. Bu aspektdən fərman mühum əhəmiyyət daşıyır. Bütövlükdə media arenasında mənzərənin durğunlaşması müşahidə olunacaq.
Günel CƏLİLOVA
