Ermənistan parlamentinin sədri Alen Simonyan bildirib ki, sərhəddə gərginliyin stabilləşməsində əsas rolu ABŞ oynayıb: “Azərbaycanla Ermənistan arasındakı gərginliyi ABŞ dayandırdı”.
Sentyabrın 16-da Səmərqənddə Azərbaycan Prezidenti İlham Əliyevlə Rusiya prezidenti Vladimir Putinin görüşü olub. Sözügedən görüşdə V.Putin “...Əlbəttə, Ermənistan-Azərbaycan sərhədində vəziyyətin kəskinləşməsi bu gün hamımızı çox narahat edir. Biz Sizinlə bu barədə danışmışıq. Mən dünən gecə danışdım. Siz bunu bilirsiniz, mən bu barədə Sizi və Ermənistanın baş naziri Nikol Paşinyanı məlumatlandırmışam. Yaxşı ki, əlaqələndirilmiş səylərimiz sayəsində hər halda eskalasiyanı dayandırmaq mümkün olub, lakin mən belə başa düşürəm ki, hər halda vəziyyət gərgin olaraq qalır...” - deyə bildirib.
Ermənistanın təxribatlarını kim dayandırdı - Putin, yoxsa ABŞ?
Məsələni baki-xeber.com-a şərh edən Azərbaycan Naminə Alyans Partiyasının sədri Abutalıb Səmədov bildirdi ki, Ermənistanın növbəti dəfə Azərbaycana qarşı sərhəddə törətdiyi təxribata ağır cavab vermək və ermənilərə ciddi zərbə vurmaq məcburiyyətində qaldıq. “Bu qarşıdurmanın daha da böyüməməsini kim təmin etdi, atəşkəsi kim saxladı? Heç kimə sirr deyil ki, regionda əsas söz sahibi Rusiyadır. Həm Ermənistanda Rusiyanın hərbi bazası, sərhədçiləri var, həm Laçın dəhlizində və təmas xəttində rus sülhməramlıları var. Bu səbəbdən də təbiidir ki, tərəflərə təsir göstərmək imkanı daha çox Rusiyanın əlindədir. Burada Azərbaycana təsir göstərməyə heç bir ehtiyac yoxdur. Azərbaycan təxribat törətməyib, Azərbaycan təxribata cavab vermək məcburiyyətində qalıb. Əgər kimisə sülhə, atəşkəsə vadar etmək, məcbur etmək lazımdırsa bu Ermənistandır. Ermənistana qarşı hər cür vasitələrdən istifadə edib onu təxribatları dayandırmağa məcbur etmək lazımdır, bunu da Rusiya etdi. Rusiyanın təzyiqləri nəticəsində ermənilər dayanmaq məcburiyyətində qaldılar”.
A.Səmədov qeyd etdi ki, Azərbaycan onsuz da qarşıdurma istəmir, daim bu təxribatlara layiq olduğu cavabı verməyib və bəzi hallarda müxalifət bundan istifadə edib Azərbaycan hakimiyyətini tənqid edib. “ABŞ-ın bu atəşkəsin saxlanmasında rolu oldumu? Təbiidir ki, oldu. Onlar da diplomatik kanallarla əllərindən gələni etdilər. Blinken zeng edib Paşinyanla danışdı, Azərbaycan Prezidenti ilə danışdı və onun da bu atəşkəsin saxlanmasında şübhəsiz ki, təsiri oldu, digər dövlətlərin də. Demək olar ki, bu hadisəyə heç kim laqeyd qalmadı. Ancaq çox təəssüf ki, münasibət bildirənlərin böyük əksəriyyəti yenə də ermənipərəst mövqe tutdular. Xüsusilə Fransanı, Kanadanı, ABŞ-ı, Hindistanı misal göstərə bilərik ki, onlar açıq-aşkar ermənipərəst mövqe tutdular. Bizi burada ağrıdan bir məqam da oldu, o da Ukraynanın tutduğu mövqe. Ukrayna Xarici İşlər Nazirliyi ilk baxışdan neytral görünən bəyanat yaydı, ancaq orada işlənən ifadələr ermənilərə imkan verdi ki, sevinsinlər və “Ukrayna bizim tərəfimizdədir” desinlər. Çünki dünyanın bir sıra ölkələri Azərbaycanı Ermənistan ərazisinə girməkdə, Ermənistanın sərhədini pozmaqda günahlandırır, Ukrayna Xarici İşlər Nazirliyi də sərhədlərin toxunulmazlığından, ərazi bütövlüyünün təmin olunmasından danışır və üstəlik orda “Dağlıq Qarabağ” ifadəsi də işlədir. Güman edirəm ki, Ukrayna bizə 44 günlük müharibədə dəstək verdi deyib nağıllar uyduranlar bu həqiqətləri görməlidirlər. Eyni davranış 44 günlük müharibədə də sərgiləndi və Ukrayna neytral bir bəyanat verdi. Ancaq bu dəfəki bəyanatı artıq neytral bəyanat kimi qiymətləndirmək olmaz. Çox təəssüf ki, Ukraynanın vəzifəli şəxsləri də Azərbaycan əleyhinə son dövrlər bəyanatlar verirlər, Ukrayna mətbuatında da Azərbaycan əleyhinə yazılar gedir. Bu təbiidir ki, bizi son dərəcə narahat edir. Çünki Azərbaycan Ukraynaya qarşı ən cəsarətli mövqe tutan və Ukraynaya daim yardım edən dövlətlərdəndir” - deyə partiya sədri vurğuladı.
İradə SARIYEVA
