Ermənistanın sentyabrın 12-dən 13-nə keçən gecə sərhəddə törətdiyi təxribatın ardınca İrandan Azərbaycana qarşı müxtəlif təhdidlər səsləndirilməyə başlayıb. Son iki-üç gündə müxtəlif şəxslərin dili ilə Azərbaycanla bağlı hədyanlar, cəfəng fikirlər, hədələr gündəmdə yer alıb.
Məsələn, İran parlamentinin keçmiş deputatı, “North Drilling” neft şirkətinin sabiq icraçı direktoru Hidayət Xadimi öz Twitter hesabında yazıb ki, Azərbaycanın ağzına yumruq vurmaq zamanıdır. “Hazırda İran ordusu və İslam İnqilabı Keşikçiləri Korpusunun (SEPAH) Azərbaycanın ağzına yumruq endirməsinin zamanıdır. Əmin ola bilərsiniz ki, o zaman nüvə danışıqlarında vəziyyət daha da yaxşı olacaq...”
Onun ardınca isə İranın Azərbaycandakı keçmiş səfiri Möhsün Pakain da İLNA agentliyinə müsahibəsində iddia edib ki, Ankara İsrail adından Bakını Ermənistana qarşı müharibəyə təhrik edir.
Seyid Əli Xamneyinin Ərdəbil vilayəti üzrə nümayəndəsi Həsən Amili yenə də öz ənənəsinə sadiq qalaraq Azərbaycana “sonuncu xəbərdarlıq” edib. Bu barədə Teleqram kanallarında məlumat yayılıb.
İranın son günlər Ermənistanın xeyrinə fəallaşmasını və Azərbaycana təhdid dolu mesajlar verməsinin səbəblərini şərh edən siyasi şərhçi Azər Həsrət bildirdi ki, əslində bu İrandan gözlənilən idi. “Əlbəttə, İrandan gələn bu cür açıqlamalar bizi təəccübləndirmir. İstər dövlət rəsmiləri, istərsə də qeyri-dövlət təmsilçiləri vaxtaşırı belə təxribatçı açıqlamalar verirlər, Azərbaycana bir növ diş göstərmək istəyirlər. Ancaq Azərbaycan dövləti və Azərbaycan Respublikasının əhalisi hər zamankı kimi, yerindədir, qətiyyətlə öz mövqeyində dayanmaqdadır. İran bunu niyə edir? Əlbəttə, xain xoflu olar deyiblər. İran xain bir dövlətdir. Ərazisindəki 30-40 milyon Azərbaycan türkünü, ümumiyyətlə türkləri əsarət altında saxlayır. Onların da xeyli hissəsi İranın bu əsarətindən qurtulmaq istəyir. Vaxtaşırı İran belə bəyanatlar verməklə əslinə qalanda daha çox daxildəki türklərə bir növ göstərmək istəyir ki, baxın, biz güclüyük, sizin ümid bəslədiyiniz Azərbaycan Respublikasının da üzərinə gedə bilərik. Amma unudurlar ki, onların bu fikirləri bizim üçün milçək vızıltısından başqa bir şey deyil. Azərbaycan dövləti də, Azərbaycan vətəndaşları da, Güney azərbaycanlılar da İranın nə mal olduğunu yaxşı bilirlər”.
A.Həsrətin sözlərinə görə, İran belə bəyanatlar verməklə sadəcə olaraq eyni zamanda özünün sırasını, cərgəsini müəyyənləşdirir, kimin yanında olduğunu göstərir: “İran bununla kimin yanında durduğunu, kimin maraqlarını müdafiə etdiyini açıq şəkildə ifadə edir. Ona görə də, düşünürəm ki, Azərbaycanda özəlliklə də İrana rəğbət bəsləyənlər bundan nəticə çıxarmalıdırlar. Din adı altında bizə sırınan Qum ideologiyası əslinə qalanda İran rəsmilərinin bu bəyanatlarında öz mahiyyətini açıq-aşkar göstərir. Əgər kimlərsə bunu görməyib yenə də İrana daha çox rəğbət bəsləyəcəksə, İranın çaldığı havaya oynayıb Azərbaycan dövlətinə arxa çevirəcəksə, əlbəttə ki, bu xəyanət də uyğun şəkildə qiymətləndirilməlidir. Ümumilikdə, götürdükdə bu kimi bəyanatlar nə Azərbaycan dövlətini, nə də Azərbaycan xalqını ciddi bir şəkildə narahat etmir. Sadəcə olaraq, təəssüf yaradır ki, özünə müsəlman deyən bir dövlət müsəlmanların yanında deyil, onların torpağını 30 il işğalda saxlamış, bir müsəlman xalqını terror etmiş dövlətin və xalqın yanındadır. Yəni bundan hər kəsin dərs çıxarması lazımdır”.
İradə SARIYEVA
