Son vaxtlar Ukraynada Azərbaycana mənfi mənada münasibətin dəyişməsi yönündə bəzi təzahürlər özünü göstərir. Xoş gəlməyən məqamlar özünü göstərir.
Bu günlərdə Ukrayna Milli Təhlükəsizlik və Müdafiə Şurasının katibi Oleksiy Danilov Azərbaycana qarşı qərəzli mövqe il çıxış etdi. Bəyan etdi ki, Rusiya ermənilərə xəyanət edib: “Mən dəqiq bilirəm ki, Böyük Britaniya bunu etməyəcək, onlar və ABŞ xəyanət etməyəcək. Lakin ruslar bunu edə bilər: çünki onlar ermənilərə də belə xəyanət etdilər. Beləliklə də, Azərbaycan özünün hesab etdiyi ərazilərə daxil oldu”.
Bundan başqa Ermənistanın 13 sentyabr təxribatından sonra Ukraynanın əsas xəbər və ən aparıcı agentliyi UNİAN belə məlymat yaydı ki, guya Azərbaycan ordusu Ermənistanın sərhəd boyunda yerləşən yaşayış məntəqələrini bombalayır. Azərbaycan Ordusu artileriya qurğuları ilə, minaatanlarla mülkü yaşayış məntəqələrini atəşə tutur. Daha sonra Ukraynadan olan müğənni Maks Barskix ermənilərə dəstək oldu. O, instaqram hesabında paylaşım edərək ermənilərə dəstək olub. Bunun ardından Azərbaycanda sosial şəbəkələrdə müğənninin dekabrın 10-da başa tutacağı gözlənilən Bakı konsertinin ləğvi tələbi ilə çağırışlar edilib və nəticədə sözügedən tədbir ləğv edilib. Qeyd edək ki, Bakı Konqres Mərkəzində keçiriləcəyi gözlənilən konsertə biletlərin qiyməti 40-230 manat arası idi. Konserti ləğv olunandan sonra müğənni M.Barskix üzr istəmək əvəzinə, bir az da irəli gedərək ermənilərin tərəfini tutub: “Azərbaycandakı konserti ləğv etmək qərarına gəldik. Başqasına qarşı təcavüzə yol verən hər hansı bir ölkə mənim konsertlərim üçün yer deyil”.
Maraqlıdır, son vaxtlar Ukraynada özünü göstərən antiAzərbaycan təzahürləri nə ilə bağlıdır? Düzdür, vəziyyət hələlik o dərəcədə qorxulu deyil. Dövlət səviyyəsində hansısa mənfi gedişlərdən söhbət gedə bilməz. Ancaq belə xoşagəlməz hallar davamlı hal alsa, bu, müəyyən tendensiyaya çevrilə bilər.
Maraqlıdır, Azərbaycana, Türkiyəyə belə münasibətin sərgilənməsinin səbəbi nədir?
“Ölkəmizə yönəlik bir sıra xoşagəlməz tendensiyalar bundan qaynaqlanır”
Məsələyə münasibət bildirən Yeni Yol Partiyasının sədri Ramil Hüseynov bunun səbəbini əsasən Ukraynadakı müharibə ilə əlaqələndirdi: “Məsələ ondadır ki, həm Azərbaycan, həm də Türkiyə Azərbaycanın ərazi bütövlüyünü dəstəkləyir. Ancaq Rusiya ilə müharibə məsələsində neytral mövqedən çıxış edirlər. Üstəlik, müharibə başlayandan bəri Azərbaycan bir neçə dəfə Ukraynaya humanitar yardım göstərib. Bununla belə, Azərbaycan ictimayəti Ukraynanın haqq işini dəstəkləyir. Ölkədəki əksər siyasi təşkilatları Ukraynanın yanında olduqlarını bəyan edirlər. Başqa bir tərəfdən Ukrayna hakimiyyəti Azərbaycanın uzun illər erməni separatizmdən əziyyət çəkdiyini yaxşı bilir. Üstəlik, bunun arxasında Rusiyanın da dayandığının fərqindədilər. Ancaq əfsuslar olsun ki, Ukraynada müəyyən dairələr bununla kifayətlənmirlər. Onlar istəyirlər ki, Azərbaycan Rusiya-Ukrayna müharibəsində tərəf olsun. Yəni, açıq şəkildə Ukraynanın yanında olsun, Rusiyaya qarşı mövqe sərgiləsin. Bax Azərbaycana yönəlik bir sıra xoşagəlməz tendensiyalar bundan qaynaqlanır. Başqa bir tərəfdən, Ukraynadakı erməni lobbisinin də bu işdə əli ola bilər”.
Vidadi ORDAHALLI
