ABŞ Nümayəndələr Palatasının spikeri Nensi Pelosi bu həftə Ermənistana səfər edəcək. Onun Ermənistan Baş naziri Nikol Paşinyan və digər erməni rəsmilərlə görüşü gözlənilir.
Pelosinin Konqres üzvü xanım Ceki Speyerlə birgə Ermənistana gələcəyi bildirilir.
Pelosinin erməni lobbisi ilə əlaqələri məlum faktdır. Çox güman ki, İrəvana gəlib, Azərbaycan əleyhinə açıqlamalar verəcək.
Nensi Pelosinin İrəvana səfəri Bakıdan daha çox, Kremli düşündürəcək. Görünən budur ki, Vaşinqton Ermənistanı Rusiyanın caynağından qurtarmaq üçün var gücüylə çalışır. Kremlin düşmənlərindən sayılan Pelosi İrəvana səfəri ilə Moskvanın Paşinyana olan qəzəbini daha da artıracaq.
Nəzərdə tutulan səfərin başqa hansı hədəfləri ola bilər?
Politoloq Yeganə Hacıyeva “Bakı-Xəbər”ə açıqlamasında bildirdi ki, avqustun əvvəlində Çinin və digərlərinin etirazına baxmayaraq, ABŞ Nümayəndələr Palatasının spikeri Nensi Pelosi Tayvana səfər etdi: “Tayvana səfər Demokratlar Partiyasına ölkə daxilində yerlərdə sürünən reytinqlərini bir az yüksəltməyə imkan verdi.
Səfər beynəlxalq qalmaqala səbəb oldu. Çünki bir ölkənin qanunverici orqanın rəsmisi digər ölkənin bölünməsi ilə nəticələnə biləcək bir prosesi başlayan ölkəyə səfər etməklə, əslində bu proseslərə dəstəyini nümayiş etdirdi.
Səfər bütün dünyada ABŞ rəsmisinin beynəlxalq hüququ heçə saymaması kimi dəyərləndirildi.
Amma məhz bu səfər bəzən anlaqlı olması ilə bağlı mübahisələr səngiməyən 80-82 yaşlarında prezidentin və onun partiyasından olan spikerin daxildə reytinqinin qısa müddətli də olsa yüksəlməsinə xidmət etdi. Nensi Pelosinin Ermənistana son sərhəd gərginliyi fonunda səfəri , sərhəddə baş verənlərin “xeyir duasının” məhz ABŞ-dan alınması təəssüratı yaradır.
Bu isə kəskinləşən İran, Rusiya və ABŞ münasibətləri fonunda Rusiya və İranın sərhədlərində yerləşən strateji ölkə olan Azərbaycana münasibətdə heç də xoş görüntü deyil. “Paşinyanın ŞƏT sammitində iştirak etməməsi, Pellosinin nəzərdə tutulan bu səfəri Ermənistanın son təxribatlarda ABŞ-ın dirijorluğu ilə hərəkət etdiyinə sübut sayıla bilərmi” sualının bir neçə cavabı var.
Bu proseslər birbaşa ABŞ dövləti tərəfindən olmasa da, ABŞ qanunverici orqanlarında kök atmış erməni lobbisinin ruporları, Nensi Pellosinin spikeri olduğu Nümayəndələr Palatası , Demokratlar Partiyasının Mərkəzi aparatı və s. drijorluğu ilə baş tutur. Paşinyanın ŞƏT sammitində iştirak etməməsinin bir neçə başqa səbəbi də var.
Ən vacib səbəb isə ŞƏT nizamnaməsində əks olunan üzv və müşahidəçi statuslu dövlətləri təşkilata ikitərəfli ziddiyyətləri ilə daxil etməməkdir. Bu təşkilata daxil olmaq iddiasında olan bütün ölkələrin yerinə yetirməli olduğu öhdəliklər var. Ermənistan isə təmsil olunduğu bütün təşkilatlarda özünün uydurduğu saxta tarixi və uydurma iddiaları ilə öz maraqlarından təmsil olunmaq adəti var ki, bu ŞƏT daxilində qəbuledilməz bir yanaşmadır. Digər səbəbdən də, Paşinyanın son sərhəd gərginliyindən sonra Azərbaycan, Türkiyə və Rusiya rəhbərləri ilə, habelə son KTMT iclasından sonra riyakar planlarının həyata keçmədiyi üçün qurumun üzvü olan digər ölkələrin rəhbərləri ilə üz - üzə gəlməkdən çəkinib”.
Məhəmmədəli QƏRİBLİ
