30 illik həsrət… İllərdir vətən həsrəti çəkən xalqımız nəhayət ki, öz torpaqlarının işğaldan azad olunduğunu gördü. Bu sevinci isə bizə elə Azərbaycanın mərd oğulları, illərdir vətən həsrətilə böyüdülən qəhrəmanlar yaşatdı. Azərbaycan ordusunun cəsur əsgərləri canlarından keçdi, çoxu isə Vətən yolunda sağlamlığını qurban verdi…Hər birinin dediyi tək bir söz var - Vətən sağ olsun!
Sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib. Sosial şəbəkələrdə erməni təxribatı nəticəsində vətən uğrunda canını verən şəhidlərin dəfn mərasimlərindən videolar paylaşırlar. Görüntülərdə dəfn mərasimlərinin bəzilərinin gecə saatlarında keçirilməsi narahatlığa səbəb olub. Ümumiyyətlə, şəhidlər necə dəfn olunmalıdır? Bununla bağlı xüsusi qayda, dövlət standartı varmı? Olmalıdırmı?
Üzeyir Cəfərov: “Şəhidlərin gecə saatlarında dəfn olunması o demək deyil ki, şəhidə hörmətsizlik edirik, əsla, belə düşünmək olmaz”
Hərbi ekspert Üzeyir Cəfərov bildirdi ki, şəhidlərin dəfni ilə bağlı dövlət üzərinə düşən bütün işlərin hamısına əməl edir. Şəhidlər Azərbaycanın üçrəngli bayrağına bükülən tabutda gətirilir. Dövlət himni səslənir, havaya atəş açılır, sonra şəhid məzara qoyulur. Axşam saatlarında dəfn müsəlman qaydalarına ziddir? Yoxsa necə? Yəni onların narazılığına səbəb nədir? Bu gün şəhidlərimiz çoxdur, onların hər birinə vaxt ayrılır. Əgər onların hər birinə saatlarla vaxt ayrılsa, izdihamlı vida mərasimləri həftələrlə vaxt aparan prosesdir. Bunu da anlamaq lazımdır. Onların gecə saatlarında dəfn olunması o demək deyil ki, şəhidə hörmətsizlik edirik. Əsla, belə düşünmək olmaz. Məsələ ilə bağlı sosial şəbəkələrdə yazırlar, onların hər birini görürük. Yaxşı gecə dəfn etməyək, saxlayaq, hava da istidir, aparaq hansısa bir mədəniyyət evinə, izdihamlı mərasim keçirək, çıxışlar olsun, xatirələr söyləsinlər və s. Necə olacaq? Şəhid artıq uca məqama yüksəlib, yuyulub və kəfənlənib, dualar oxunub, dəfnə hazırdır. Mən şəhidlərin gecə saatlarında dəfn olunmasında bir qəbahət görmürəm. Dövlətin qaydaları var. Sosial şəbəkələr az qala sifarişlər bürosu olub. "Bunu belə elə, onu elə eləyək” və s. deyə tələblər qoyurlar. Yaxşı onda gündüz dəfn olunanlarla da bağlı onların fikirləri nədir? 71 şəhid var, yarısı Bakıda, yarısı valideynlərin istəyi ilə rayonlarda dəfn olunub. Bunların hər birinə rəsmi adamlar ayrılıb. Onların son mənzilə yola salınması ilə bağlı dövlət himninin ifa olunması üçün orkestr, atəş açılması üçün qarovul dəstə ayrılır. O qədər məsələlər var, bunun hər birini nəzərə almaq lazımdır. Gəlin, şəhidimizi ən yüksək hörmətlə yola salaq. Kim istəyirsə, şəhid dəfnində iştirak edə bilər. Səbuhinin dəfn mərasimini gördünüz. Heç kəsi yox idi, amma bütün xalq onu son mənzilə yola salırdı. Bu, xalqın şəhidə olan münasibətdir.
Cəmişid Əliyev: “Şəhidin axşam və ya gündüz vaxtı dəfn olunmasının elə bir böyük mahiyyəti yoxdur”
Ilahiyyatçı Cəmişid Əliyev qeyd etdi ki, şəhidə sayğı təkcə şəhid ailələrinə qoyulan hörmət deyil, insanın həm də öz-özünə qoyduğu hörmətdir. Hər kəs başa düşməlidir ki, o insanlar vətən üçün, bizim üçün canlarından keçib: “Şəhid dəfni xüsusi qaydada həyata keçirilir. Belə ki, dövlət himni səslənir, havaya atəş açılır, sonra şəhid məzara qoyulur. Şəhidin axşam və ya gündüz vaxtı dəfn olunmasının elə bir böyük mahiyyəti yoxdur. Nəzərə almaq lazımdır ki, hava elədə sərin deyil, həmçinin şəhid sayı da az olmadığı üçün vəfat edən hərbçilərin bir qismi axşam vaxtı dəfn edildi”.
Günel CƏLİLOVA
