“Azərbaycan Çin ilə Avropa arasında nəqliyyat prosesində mühüm rol oynayır”. Bunu Prezident İlham Əliyev Səmərqənddə Çin Xalq Respublikasının Sədri Si Cinpin ilə görüşündə deyib.
Azərbaycan Prezidenti “Orta dəhliz”, “Bir kəmər, bir yol” layihələri çərçivəsində də əməkdaşlıq və tərəfdaşlıq üçün böyük perspektivlərin olduğunu vurğulayıb. Dövlətimizin başçısı bildirib ki, Azərbaycan Çin ilə Avropa arasında nəqliyyat prosesində mühüm rol oynayır və ölkəmizin nəqliyyat-logistika imkanları beynəlxalq yük daşımalarında böyük əhəmiyyətə malikdir. Azərbaycan Çindən Avropaya və əks-istiqamətdə qatarlarla və digər yükdaşımaların artırılmasını tam şəkildə dəstəkləyir.
Görünən odur ki, Çin də Azərbaycanın vacib vacib logistika məkəzi olduğunun fərqindədir. Bu səbəbdən Azərbaycanın roluna xüsusi önəm verir. Bütün bunlar bir daha ölkəmizin dünyada nəqliyyat-logistik əhəmiyyətini ortaya qoyur.
“Çindən Avropaya yükdaşımalarda Azərbaycan mühüm logistika mərkəzi olacaq”
Məsələyə münasibət bildirən millət vəkili Aydın Hüseynovun fikrincə, Azərbaycanın önəmi hər keçən gün artır: “Prezident İlham Əliyevin Şanxay Əməkdaşlıq Təşkilatının tədbirinə dəvət olunması Azərbaycanın önəmindən irəli gəlir. Məsələ ondadır ki, Azərbaycan Şimalla Cənub, Şərqlə Qərb arasında mühüm coğrafi mövqedə yerləşir. “Orta dəhliz” Çindən başlayır Qazaxıstandan, daha sonra Azərbaycandan, Gürcüstandan keçməklə Avropaya gedir. Bütün bunlar ölkəmizin dünya iqtisadiyyatında çəkisini ortaya qoyur. Çin tərəfi yaxşı bilir ki, Avropaya, bir sıra yaxın Yaxın Şərq ölkələrinə ən qısa yol Azərbaycandan keçir. Üstəlik, Ələt limanında müasir infrastrukturun yaradılması daşınan yüklərin vaxtında qəbul olunmasına əlverişli şərait yaradır. Digər tərəfdən, Ermənistan nə qədər müqavimət göstərsə də Zəngəzur dəhlizi reallaşacaq. Bu isə son nəticədə daşımaların həcminin daha da artmasına gətirib çıxaracaq. Nəzərə almaq lazımdır ki, Çinlə Avropa İttifaqı ölkələri arasında ticarət dövriyyəsinin həcmi olduqca böyükdür. Azərbaycanın tranzit ölkə rolunu oynaması həm vaxta qənaət baxımından, həm də daşıma xərclərinin azalması baxımından mühüm əhəmiyyətə malikdir. Yəni, görünən odur ki, Çindən Avropaya yükdaşımalarda Azərbaycan mühüm logistika mərkəzi olacaq. Əsas məsələ həm də odur ki, Azərbaycanın beynəlxalq müstəvidə etibarlı tərəfdaşdır. Bu günə qədər həyata keçirilən bir sıra meqa layihələr buna əyani sübutdur. Sözügedən məsələlərdə həm də təhlükəsizlik baxımından Azərbaycan etibarlı ölkədir. O üzdən hesab edirəm ki, Azərbaycanın Çinlə əlaqələri daha da inkişaf edəcək”.
Millət vəkili onu da əlavə etdi ki, bütün bunlar Azərbaycanın dünyada önəmini daha da artıracaq.
Vidadi ORDAHALLI
