Azərbaycan-Ermənistan sərhədində qanlı döyüşlər İrəvanda siyasi gərginlik dərəcəsini artırıb. Ermənistanın Baş nazirinin Azərbaycanla sənədlər imzalamağa hazır olduğu barədə çıxışı İrəvanda izdihamlı nümayişə səbəb oldu.
Azərbaycanla imzalanmalı olduğu deyilən sənədin qəzəblə qarşılandığı aşkaranə nümayiş olunub.
Erməni KİV-lərində yayılan məlumata görə, sentyabrın 14-də saat 20:00-dan etibarən sərhəddə atəşkəs barədə razılığa gəlinib. Paşinyanın parlamentdəki açıqlamasına görə 105, qeyri-rəsmi mənbələrə görə, 200-dən çox erməni hərbçisi ölüb. Ermənistan rəsmiləri ərazilərinin Azərbaycan tərəfindən işğal edilməsi barədə isterik çıxışlar etsələr də, bir çox ictimai-siyasi fəallar, partiya sədrləri, politoloqlar günah keçisi kimi Paşinyan hakimiyyətini görürlər. Sosial şəbəkələrdə və yerli mediada səsləndirilən və paylaşılan fikirlərin bəzilərini təqdim edirik.
“Şərəfim var” fraksiyasının deputatı Tiqran Abramyan bildirib ki, yeni sərhədlərdə lazımi infrastrukturlar formalaşmayıb və ya çox natamam formalaşıb ki, bu da öz növbəsində ölü sayının kəskin artmasına səbəb olub.
Növbəti açıqlamasında isə Tiqran Abramyan Paşinyan hakimiyyətini tənqid edərək Ermənistanla Azərbaycanın siyasətini müqayisə edib. O bildirib ki, rəsmi Bakının tələbləri daha əhatəli, daha iddialıdır və bu istiqamətdə həm diplomatik, həm də hərbi sahədə fəal iş aparılır.
Siyasi şərhçi Viqen Akopyan isə yerli mediaya açıqlamasında Ermənistanın nə sülh, nə də müharibə üçün resurslarının olduğunu söyləyib. O Paşinyanı nəzərdə tutaraq qeyd edib ki, prosesdə danışıqları aparan şəxsin dəyişdirilməsinin vaxtı çatıb.
Nikol Paşinyan inanılmaz dərəcədə yalan və son dərəcə təhlükəli bəyanat verdi. Bu fikir isə sosial şəbəkələrin erməni seqmentindəki tanınmış “Mika Badalyan” adlı teleqram kanalında paylaşılıb. Qeyd olunub ki, Paşinyanın parlamentdəki çıxışının mənası ondan ibarətdir ki, Ermənistan ordusu tamamilə ləğv edilməlidir. Sitat: Əgər sülh və firavanlıq istəyiriksə, o zaman Ermənistan ordusunu dağıtmalıyıq, əks halda bizə davamlı hücumlar olacaq.
Qeyd edək ki, sosial şəbəkələrdə Ermənistanın ictimai-siyasi xadimlərinin belə anti-hakimiyyət paylaşımları minlərlərdir.
Bu etirazlar Paşinyanın devrilməsi ilə nəticələnə bilərmi?
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, bu hücumlar və mitinqlər Azərbaycana hər tərəfli zərərdi: “Bizdəki KİV-lər də Paşinyan hədəfə götürüb. Paşinyan dəfələrlə Qarabağın Azərbaycan ərazisi olduğunu deyib. Hətta sonuncu açıqlamalarında da etiraf edib ki, Azərbaycanla müqavilə imzalamaq lazımdır. Bu sülh müqaviləsinə işarədir. Yəni tərəflər bu müqaviləni imzalasalar bir-birinə ərazi iddiaları irəli sürməyəcəklər. Paşinyanın bu mövqeyi Rusiyaya bağlı olan revanşist adlanan qüvvələrin istəyi ilə uzlaşmır. Həmin qüvvələr həm Paşinyana, həm də Azərbaycanla imzalanacaq sülh müqaviləsinə qarşı təxribatlara başlayırlar. Mən düşünürəm ki, Şarl Mişelin vasitəçiliyi ilə İlham Əliyev-Nikol Paşinyan arasında keçirilən görüşdən dərhal sonra sərhəddə təxribatların törədilməsi sülh müqaviləsinə qarşı atılan təxribatlardı. Bunu Paşinyanı hakimiyyətdən salmaq istəyən qüvvələr edir. Bu qüvvələrin hakimiyyətə gəlməsi bizə nə vəd edir? Biz ilk növbədə bunu aydınlaşdırmalıyıq. Paşinyanın şəxsi bizə önəmli deyil. Ancaq onu əvəz edəcək qüvvənin kimlərdən ibarət olacağı bizim üçün önəmlidir. Onların hakimiyyətə gəlişi sərhədlərin tanınmasına, torpaq iddialarının olmamasına , Paşinyan kimi Qarabağdan imtinaya cavab verirmi? Təbii ki, yox. Onlar gələn kimi qisasçı siyasət yürüdəcək. Oradakı mitinqlər bizim xeyrimizə deyil. Həmin ölkədə sabitliyin olmaması bizə sərf edir. Bu tam başqa məsələdi. Mən düşünmürəm ki, bu etirazlar Paşinyanı devirə biləcək.Qərb və ABŞ Ermənistana ciddi dəstək verir. Nelsi Pelossinin Ermənistana nəzərdə tutulan səfəri çox ciddi məsələdir. Biz yalnız görünənlə məşğul olsaq uduzarıq. ABŞ -ın yüksək rəsmisinin Paşinyanla görüşə gəlməsi ciddi mətləbdən xəbər verir. Bu addım Paşinyana dəstək, oradakı risiyameyilli qüvvələrə isə tərs sillədir. Mitinqlərin Paşinyanın istefası ilə nəticələnəcəyi versiyası özünü doğrultmayacaq”.
Məhəmmədəli QƏRİBLİ
