Roma Papası Fransisk Azərbaycan və Ermənistan arasında gərginliyin sülh yolu ilə tənzimlənməsi üçün hər kəsi dua etməyə çağırıb. Bu barədə Papa Qazaxıstanın Nur-Sultan şəhərində keçirilən mərasimdə çıxışı zamanı deyib.
“Narahatlıqla öyrəndim ki, bu saatlarda Qafqaz regionunda yeni gərginlik ocaqları alovlanıb. Hər kəsi sülh üçün dua etməyə çağırıram. Dua edək ki, razılaşma fitnədən üstün olsun” deyə - o bildirib.
Roma Papası ünvansız dua təklifi verincə, hər kəsi buna çağırınca yaxşı olardı ki, təxribatı, qan tökməyi dayandırmaq, tezliklə sülh müqaviləsi imzalamaq üçün Ermənistanın siyasi rəhbərliyinə, onun dini liderinə çağırış edəydi. Belə daha məqsədəuyğun olardı. Unutmayaq ki, dua donuz darıdan çıxmır, gərək donuzu zopa ilə vurub ordan çıxarasan.
“Bu ölkə işağlçılıqdan, təxribatdan, revanşizmdən çəkindirilməlidir”
Papanın dua çağırışını şərh edən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli “Bakı-Xəbər”ə bildirdi ki, Papa nüfuzundan və əlindəki imkanlardan istifadə edib Ermənistanı sülhə yönəldə bilər. “Əlbəttə, Roma Papasının belə bir fikir söyləməsi təqdirəlayiq hesab oluna bilər. Ancaq mesaj ünvanlanacaq, sülhə çağırılacaq tərəf Ermənistandır. Bu ölkə həmişə sülhdən qaçıb, revanşizmə, terrora, işğala, təxribata rəvac verib. Bu ölkə işağlçılıqdan, təxribatdan, revanşizmdən çəkindirilməlidir.
Azərbaycanın mövqeyi bəllidir və bütün dünya bilir ki, biz həmişə sülh istəmişik, bu gün də niyyətimiz sülhə nail olmaqdır. Bilirik ki, Ermənistan hər zaman istər bölgə dövlətlərinin, istərsə də dünya ölkələrinin maşası olaraq çıxış edib. 12 sentyabr təxribatı zamanı da gördük ki, Ermənistan başqa dövlətlər tərəfindən Azərbaycanın üzərinə saldırılır. Bu anlamda Roma Papasının bu məsələləri bilməsi lazımdır. İstər Roma Papası, istərsə də digər sülh çağırışı edənlər olsun, onların əksəriyyəti Ermənistanın yenidən Azərbaycana qarşı qışqırdıldığını bilirlər. Azərbaycan isə həmişə istər müharibə zamanı, istərsə də, sakitlik vaxtlarında öz sözünü deyən dövlətdir. Biz son illər bunun dəfələrlə şahidi olmuşuq. Azərbaycan hər zaman öz ədalətli mövqeyini ortaya qoyub, müharibədə belə ədalətli mövqedən çıxış etdiyi bəllidir. Bunu nəzərə alaq deyə bilərik ki, əsas sülhə çağırılmalı olan tərəf Ermənistandır. Ümumiyyətlə, bir çox hallarda maşa rolunu oynayan Ermənistanın artıq bu statusdan qurtulması lazımdır. İstər Roma Papası, istərsə də iri dövlətlər Ermənistanı maşa kimi istifadə etməkdən də əl çəkməlidirlər. Nə qədər ki, Ermənistan maşa kimi istifadə olunacaq əlbəttə ki, o ölkədə problemlər davam edəcək”.
F. Ələkbərli hesab edir ki, bu davam etdikcə sülh məsələsi də uzanacaq. Onun qeyd etdiyinə görə, Ermənistan üzərində qurulan oyunlardan da əl çəkilməlidir, bölgədə sülhə nail olunsun, əks halda bu hal uzanacaq.
İradə SARIYEVA
