Vətən sevgisi, yurd təəssübü milli mənlik şüurunun təməl daşlarıdır. Bu ali hisslərə malik Azərbaycan xalqı işğal altında torpaqların geri alınması zamanı ordunun yanında oldu. Xatırladaq ki, 44 günlük Vətən savaşı zamanı Ermənistanın davam edən təcavüzkar əməllərinə qarşı Azərbaycan xalqı həmrəylik nümayiş etdirdi.
Qeyd edək ki, özünü ən müxtəlif formalarda göstərən ümumxalq həmrəyliyi milli ordumuzun güc mənbəyidir. İkinci Qarabağ müharibəsi dövründə və cari ilin 12-13 sentyabr tarixlərində ölkəmizin ərazi bütövlüyünə qarşı təxribatı zamanı da xalqımız ordu ilə və Ali Baş Komandanla birlikdə olduğunu bir daha göstərdi. Xalqımızın orduya göstərdiyi həmrəyliyin sarsılmaz əsasları var. Ordumuzun böyük rəşadət göstərməsi, bir addım da geri çəkilməməsi, bütün mövqeləri şərəflə qoruya bilməsi, düşməni böyük itkilərə məruz qoyması, səngərlərdə sıravi əsgərlərlə general və zabitlərin yanaşı həlak olması cəmiyyətimizin orduya inam və rəğbətini bir az da artırır və bu da insanların fəal dəstəyini birbaşa müəyyən edən faktorlardır. Vətənpərvər gənclərin orduya könüllü dəstək nümayişləri əyani sübut edir ki, ordumuzla cəmiyyətin birliyi möhkəmdir.
“Hərbçi arxa cəbhədən arxayın olanda daha böyük güclə, həvəslə döyüşür və biz bunu müşahidə edirik”
“Vəfa” Sosial İctimai Birliyinin rəhbəri Fatimə Hacıbəyli qeyd etdi ki, xalqımızın ordumuza güclü dəstəyi, xalq, ordu, Ali Baş Komandanın birliyi - bu üçlük dəmir yumruq kimi birləşdi. Vətən müharibəsi dövründə xalq olaraq güclü birlik və həmrəylik nümayiş etdirdik: “Bu günlərdə ermənilərin təxribatı zamanı da Azərbaycan cəmiyyəti ordunun yanında oldu, ona dəstək oldu. Bundan sonrakı mərhələlərdə də güclü olmalıyıq. Çünki düşmənimizi tanıyırıq. Ona görə də birliyimizi, ordumuzu daha da gücləndirməliyik ki, düşmən bir daha təxribatlar etməsin. Əgər etsələr, yenə də layiqli cavabları veriləcək. Necə ki, bu gün cavablarını alıblar. Artıq düşmən ordusu tamamilə dağılıb, bunu özləri də etiraf edirlər. Həmçinin, Ermənistanda ictimai-siyasi vəziyyət də gərgindir. Onlar bu vəziyyəti yaşamalı idi. Çünki başqasının torpağını işğal etmişdilər, təxribatla məşğuldurlar.
Xatırladım ki, 2020-ci ildə müharibəni getdiyi müddət ərzində kimin əlində nə resursu var idisə səfərbər etmişdi. Mən deyərdim ki, təkcə orduların yox, iki xalqın mübarizəsi gedirdi və ermənilərin arxasında məkrli qüvvələr dayanmışdı. Lakin xalqımızın və ordumuzun birliyi bu savaşda qələbəyə gətirib çıxardı, həmrəyliyimiz erməni faşizminin başını əzdi. Ümumiyyətlə, milli həmrəyliyin əldə olunması zəfərə gedən yolda əsas məsələlərdən biri idi”.
Həmsöhbətimiz onu da əlavə etdi ki, hərbçi arxa cəbhədən arxayın olanda daha böyük güclə, həvəslə döyüşür: “Bu həmrəyliyi ən kiçik elementdə belə görmək olardı, məsələn, cəbhə bölgəsinə yaxın kəndlərdə yaşayan insanların dəstəyindən, onların əsgərlərimizə münasibətindən, yəni hər kəs gücü çatan köməkliyi etməyə çalışırdı. Azərbaycan xalqı heç vaxt demədi ki, şəhidlərimiz var, döyüşü dayandırın, əksinə yalnız irəliyə səslədilər. Biz dünyaya ordu ilə cəmiyyətin həmrəyliyini nümayiş etdirə bildik”.
Birlik sədrinin sözlərinə görə, son döyüşlər də bir daha göstərdi ki, hər bir hərbçimiz ölkə sərhədlərini qorumağa və düşmənə layiqli cavab verməyə hazırdır. Erməniləri ciddi şəkildə narahat edən və qorxu altında saxlayan başlıca amil də elə budur. Danılmaz faktdır ki, bu gün adı güclü ordular sırasında çəkilən Azərbaycan Ordusunda iradəli, əzmli, cəsarətli, qəhrəman və gənc nəslə nümunə olan qeyrətli Vətən oğullarımız var. Vətənin, millətin keşiyini çəkən oğullarımızın arxasında da Azərbaycan xalqı dayanır.
Günel CƏLİLOVA
