Ermənistanın Baş naziri Nikol Paşinyanın parlamentdəki çıxışından sonra Ermənistan parlamentinin və hökumət evinin binaları qarşısında etiraz aksiyaları keçirilir.
Bu barədə Ermənistan mediası məlumat yayıb. Parlamentin yaxınlığında keçirilən aksiya zamanı mitinqçilər Baqramyan prospektini bağlayıb, nəqliyyatın hərəkəti dayandırılıb.
Qeyd edək ki, Ermənistan hökumətinin başçısı Nikol Paşinyan parlamentdə bəyan edib ki, erməni tərəfi müəyyən sənəd imzalamaq niyyətindədir, ondan sonra çoxları yəqin ki, onu satqın elan edəcək. Aksiyaçılar parlament binasına daxil olublar. Onlar Paşinyana qarşı impiçment prosedurunun başladılmasını tələb edirlər.
Ölmüş əsgər Ruben Poqosyanın qohumlarından biri Milli Assambleya yaxınlığında keçirilən etiraz aksiyası zamanı deyib ki, bu hakimiyyətlə birlikdə yenə də məğlub olacaqlar:
“Parlament artıq yeni güzəştlər barədə xəbərdarlıq edib. Biz bu hakimiyyətə maksimum təzyiq göstərməliyik və bu zəif şəxsiyyəti istefaya məcbur etməliyik. O, xalqımızın mənafeyini qoruya bilməz. Hər kəsi bizə qoşulmağa çağırırıq”.
Paşinyanın istefasını xaricdəki ermənilər də tələb edir. Erməni diasporunun bir qrup nümayəndəsi Ermənistanın ABŞ-dakı səfirliyinin binası qarşısında Baş nazir Nikol Paşinyanın istefası tələbi ilə etiraz aksiyası keçirib. Məlumata görə, aksiyaçılar Paşinyanın Ermənistan parlamentində hökumətin iclası zamanı səsləndirdiyi bəyanatlardan hiddətlənib. Etirazçılar İrəvanın mərkəzində, Baqramyan prospektində keçirilən çoxminlik aksiyanın iştirakçılarına dəstək ifadə ediblər.
Ermənistanın Baş naziri Nikol Paşinyan deyib ki, Ölkəfəhərbi vəziyyətin elan olunması istisna edilmir. Onun sözlərinə görə, bu barədə qərar istənilən an qəbul edilə bilər.
Paşinyanın indiki məqamda hakimiyyətdən uzaqlaşdırılması hansı yenilikləri vəd edə bilər?
Demokratik Dəyişim Partiyasının rəhbəri Əli Mustafa “Bakı-Xəbər”ə açıqlamasında bildirdi ki, Paşinyanın əleyhinə kütləvi etirazların olması başa düşüləndi: “Çünki ermənilərin son təxribatına ciddi cavab verildi. Azərbaycan Ordusu demək olar ki, onların hərbi infrastrukturunu məhv etdi. Söhbət bizə təhdid yaradan hərbi qurğular və postlardan gedir. Necə ki, vaxtı ilə ABŞ Əfqanıstanda “Əl Qahidə”, “Talibanı”n məhv edilməsini legetim hədəf sayırdı, bunlar da bizim üçün həmin mahiyyəti daşıyırdı. Bu hal Ermənistanda ciddi effekt yaratmalıydı və yaratdı da. Düşünürəm ki, Paşinyan bu torbadan da sağ çıxmağı bacaracaq. Onun Qərbdəkk havadrları imkan verməz ki, Paşinyan belə asanlıqla devrilsin. Ermənistanda Rusiyaya bağlı olan revanşist qüvvələrin də yetərincə nüfuzu yoxdur. Onları hamı korrupsioner və daha yararsız kimi tanıyır. Bu baxımdan Paşinyanın bəxti gətirib ki, onun siyasi oponentləri səviyyəli siyasətçilər deyillər. Paşinyanın özünün də problemləri var. O, olduqca ikiüzlü və qətiyyətsiz bir adamdır. Onun gündə bir qərar verib, sonra geri çəkilməsi sonunu yaxınlaşdırdı. Belə səhvlər siyasətçi üçün intihara bərabərdir. Paşinyan həmin səhvləri yenə də davam etdirir. Onun bir siyasi etimad paketi vardı, hansını ki, xalq ona vermişdi. Bundan qətiyyətlə və zamanında istifadə etməliydi. O, isə həmin dividenti sürətlə xərclədi və siyasi bankrot həddinə gəldi. Bizə Paşinyanın qalması daha sərfəlidir. Çünki onu tanıyırıq və zəiflərini bilirik. Etiraf etmək lazımdır ki, o, zəif fiqur olsa da, demokratdır. Paşinyan hərdən bir xəyala düşən siyasi tipdir. Buna görə də özünə problem yaradır. Hər halda onun hakimiyyətdə qalması bizim maraqlarımıza cavab verir. Mümkündür ki, onun yerinə revanşist yox, başqa Qərb yönümlü bir siyasətçi gəlsin. Sülhü anlayan bir demokrat olarsa, Paşinyanın əvəzlənməsini arzulaya bilərik. Rusiyapərəst revzanşistlərin hakimiyyətə qayıdışı bizə yalnız zərər verə bilər”.
Məhəmmədəli QƏRİBLİ
