Azərbaycan son döyüş əməliyyatlarında ölən 100 erməni hərbçinin cəsədini qarşı tərəfə verməyə hazır olduğunu bildirib. Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyası məlumat yayıb.
Qeyd edilib ki, Azərbaycan beynəlxalq humanitar hüquqa və humanizm dəyərlərinə sadiqliyini nümayiş etdirərək Ermənistanı atəşkəsə çağırır və cari ilin 12-13 sentyabr tarixlərində ölkəmizin ərazi bütövlüyünə qarşı təxribatın qarşısının alınması nəticəsində həlak olmuş 100-ə qədər Ermənistan hərbçisinin cəsədlərini birtərəfli qaydada qarşı tərəfə təhvil verməyə hazır olduğunu bildirir.
Qeyd etdiyimiz kimi, Bakı 100-ə qədər erməni hərbçisinin cəsədini birtərəfli qaydada təhvil verməyə hazır olduğunu bəyan edib. 100 cəsəd təhvil verilirsə, ən azı o qədəri hələ də qalır. Həmçinin, hərbi infrastruktura endirilən zərbələr nəticəsində məhv edilənləri də nəzərə alınsa, rəqəm yüzlərlə ölçülə bilər.
Ermənistan Baş naziri Nikol Paşinyan parlamentdəki çıxışı zamanı Ermənistan ordusunun 107 hərbçisinin öldüyünü etiraf edib. N.Paşinyanın məlum çıxışından bir daha aydın olur ki, Ermənistan tərəfinin itkiləri yüzlərlədir.
“Sosial şəbəkələr və erməni ictimaiyyəti itkilərin 200-dən yuxarı olduğunu iddia edir, yaxın günlər ərzində ölənlərin sayının 300-dən çox olacağı proqnoq edilir”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, Ermənistan Azərbaycana qarşı etdiyi təxribatlardan sonra hər dəfə böyük məğlubiyyətlə üzləşir. Azərbaycan Ermənistan üzərində təkcə hərbi sferada deyil, eyni zamanda, diplomatik sahədə də üstünlüyünü möhkəmlədib: “Son iki həftədir ki, Ermənistanın təxribatlarına beynəlxalq təşkilatlar tərəfindən adekvat reaksiya verilmədiyi üçün sentyabrın 12-dən 13-nə keçən gecə məlum proses baş verdi. Ancaq Ermənistan gözləmədiyi nəticə qarşılaşı, onların itkilərinin sayı deyiləndən qat-qat çoxdur”.
T.İsmayılov onu da əlavə etdi ki, Ermənistandakı revaşist qüvvələrin Erməni xalqını məhv etməsi, uzun illər ərzidə faşizm ideologiyasını cəmiyyətin beyninə yeritməsi, Azərbaycan və Türkiyə ilə münasibətləri normallaşdırmaq yerinə hələ də pozuculuq funksiyasını davam etməklə məşğuldurlar. Onların bu istiqamətdə fəaliyyətlərini davam etməsi Ermənistanın gələcəyini sual altına qoyur.
Siyasi şərhçinin sözlərinə görə, N.Paşinyan ölən hərbçilərin sayını gizlədir. O 100-dən erməni əsgərinin vurulduğunu iddia edir: “Ancaq sosial şəbəkələr və erməni ictimaiyyəti itkilərin 200-dən yuxarı olduğunu iddia edir. Onu da deyim ki, yaxın iki-üç gün ərzində Ermənistanda ölən hərbçilərin sayı daha da artacaq. Bu qədər hərbçini itirilməsi Ermənistan üçün acınacaqlıdır. Danılmaz faktdır ki, həmin ölkədə sərhədlərin qorunmasında hərbçi tapılmırdı. Həmçinin, Ermənistanın hərbi kontigenti də istənilən səviyyədə deyil. Hər təxribatdan sonra Azərbaycan tərəfi onlara lazımi cavab verir”.
Günel CƏLİLOVA
