Azərbaycan ordusunun Ermənistan silahlı qüvvələrinin təxribatına qətiyyətli cavabı gözlənildiyi kimi Ermənistanda ictimai-siyasi vəziyyəti gərginləşdirib. İndiki vəziyyətdən istifadə etməyə çalışan müxalifət Nikol Paşinyan iqtidarını etirazlar aksiyası təşkil etməklə devirməyə çalışır.
Parlamentin “Hayastan” fraksiyasının rəhbəri Seyran Ohanyan bildirir ki, Ermənistan Paşinyan iqtidarı sayəsində sürətlə məhvə gedir: "Türkiyə və Azərbaycanın maraqlarına xidmət edən Paşinyan Zəngəzur dəhlizinin verilməsi tələbindən başqa, onların bütün tələbləri ilə praktiki olaraq razılaşıb. Amma biz görürük ki, üzük daralır, çünki ordunun bərpası və diplomatiya sahəsində addımların atılması üçün qiymətli vaxt itirilib. Nə qədər ki, Ermənistan məğlubiyyət simvolu kimi təmsil olunacaq, itkilər və təhlükələr durmadan artacaq. Paşinyan öz hakimiyyətini saxlamaq adı ilə Brüssellə Moskva arasında oynayıb, Ermənistanı çətin vəziyyətə salıb, ölkəni geosiyasi qarşıdurmalar teatrına çevirib. Bütün bunlara paralel olaraq Bakının mövqeləri güclənib, çünki heç kim zəif Ermənistanı nəzərə almır. Əksinə, Azərbaycanın tələblərini bizim hesabımız hesabına təmin etməyə cəhdlər edilir". O bildirib ki, Paşinyanın impiçmentini elan etmək üçün deputatlar parlamentə gəlməlidirlər. Əks halda, məcburi şəkildə parlamentə gətiriləcəklər. Paşinyana qarşı impiçment prosesinin başlanması ilə bağlı sənədin altına 35 deputat imza atıb və onlar hamısı müxaliflərdir. Ohanyan bu xüsusda qeyd edib: “Ermənistan və mən həmişə bu barədə danışmaqdan şərəf duyuruq. Baş nazir Nikol Paşinyana qarşı impiçment prosesinin başlanması ilə bağlı sənədə 35 deputat imza atıb. Mən sizə bir zabit sözü verirəm. Prosedura başlamaq üçün müxalifət fraksiyalarından olan deputatların 35 imzası var. Amma bunu başa çatdırmaq üçün “Vətəndaşi müqaviləsi”ndən daha 18 deputatın imzası lazımdır”. O, xalqın Paşinyanı devirmək səlahiyyətinin olduğunu bildirib: “Bizim vəzifəmiz bu uğursuz hakimiyyəti aradan qaldırmaq, beynəlxalq platformada Ermənistanı təmsil edən danışıq aparatını kənarlaşdırmaqdır. Yalnız güclü yumruq Ermənistan və Qarabağı indiki vəziyyətdən çıxara bilər”. Amma müxaliflərdən fərqli olaraq “Vətəndaşi müqaviləsi” partiyasının deputatları Paşinyana istefaya göndərməyə tələsmirlər. “Hayastan” fraksiyasından olan deputat Aram Vardevanyan da bunu etiraf edir: “Həmişə hakimiyyətin xalqa məxsus olduğunu bəyan etmələrinə baxmayaraq, “Vətəndaşi müqaviləsi” fraksiyasının deputatlarından heç biri parlamentdə görünmədi. Xalq tələbini irəli sürdü, amma onlar xalqın tələbini yerinə yetirmədilər. Deputatların xalqın tələbini yerinə yetirməkdən başqa yolu yoxdur. İkinci variant yoxdur. Bu, hər şeyi deyir”. “Şərəf duyuram” fraksiyasının rəhbəri Hayk Mamicanyan bildirib ki, onlar orada hakim fraksiya nümayəndələrini gözləmək niyyətindədirlər. “Hayastan” fraksiyasından olan deputat İşxan Saqatelyan bildirib ki, müxalifətdən 35 deputat sənədi imzalamağa və impiçment prosesinə başlamağa hazırdır, lakin “Vətəndaşi müqaviləsi” fraksiyasının nümayəndələrinin də 18 imzası lazımdır”. O, hakim fraksiya nümayəndələrini Ermənistanın baş naziri Nikol Paşinyana etimadsızlıq elan edilməsi prosesinə qoşulmağa çağırıb və əks təqdirdə onların ev ünvanlarını elan edəcəyini söz verib.
Müxaliflərin fəallaşmasına və aksiyalara səbəb Paşinyanın parlamentdə keçirdiyi brifinqdə dedikləridir. Burada o bildirib: “Mən sülh naminə çətin qərarlar vermək məsuliyyətini öz üzərimə götürdüm. Amma çətin qərarlar Ermənistanın dövlət maraqlarına zidd qərarlar demək deyil. Biz Ermənistan Respublikasının təhlükəsizliyini, davamlı sabitliyini və sülhünü təmin etmək üçün bu qərarları qəbul etməliyik. Biz bu gün elə sülh müqaviləsi imzalaya bilmərik ki, bunun nəticəsində 6 ildən sonra yeni müharibə olsun. Biz bir sənəd imzalamaq istəyirik ki, bunun nəticəsində çoxları bizi qınayacaq, çoxları söyəcək, çoxları bizə “satqın” deyəcək, hətta xalq bizi hakimiyyətdən uzaqlaşdırmaq qərarına gələ bilər. Nəticədə, 29,8 min kvadrat kilometr əraziyə malik Ermənistan davamlı sülh və təhlükəsizlik əldə edərsə, biz daha da məmnun olacağıq. Bunu təmin edəcək qərarı, çox açıq deyirəm, imzalayacağam. Məni başıma nə gələcəyi maraqlandırmır, məni Ermənistanın başına nə gələcəyi düşündürür”. Bu da etiraz aksiyalarına səbəb olub. Elə bunun ardınca Paşinyan dediklərini təkzib edərək bildirib ki, Emənistan və Azərbaycan arasında imzalanacaq sənəd yoxdur. O, sosial şəbəkə hesabında aksiyalara cavab olaraq qeyd edib: “Əziz həmvətənlər, sizi manipulyasiyaya getməməyə səsləyirəm. Heç bir sənəd imzalanmayıb və imzalanmayacaq. Bu, ölkənin müqavimətini qırmaq üçün düşmən xarici qüvvələrin istiqamətləndirdiyi informasiya təxribatıdır”. Paşinyan daha sonra canlı yayıma çıxaraq, niyə belə dediyini izah edib: “Niyə mən bu haqda danışdım? Bu gün Ermənistana təcavüz edilir. Biz deyirik ki, ərazi bütövlüyü müzakirə olunmur. Bizə deyirlər, “dəhliz”! Biz deyirik, Ermənistan ərazisindən dəhliz verməyəcəyik. Biz ərazi bütövlüyünü hər hansı şəkildə şübhə altına qoyan sənədə imza atmayacağıq. Bu gün sərhəddən əsgərlər zəng edirlər ki, düzdür ki, sənədə imza atılıb, yəni sərhədi qorumayaq? Mənə deyirlər ki, Azərbaycan saytları belə başlıqlarla çıxışımı yayıb. Biz deyirik ki, kompleks həllə hazırıq. Bizim vətənimiz müqəddəsdən də artıqdır, o, müzakirə edilmir”. O bir daha vurğulayıb ki, nə sənəd var, nə layihə: “Əgər müzakirələrin gedişində sənəd hazırlansa, o sənəd bizim arzuladığımız olmasa da, ancaq analizdən sonra hesab etsək ki, o, Ermənistanın uzunmüddətli təhlükəsizliyini və sülhü təmin edir, biz bu istiqamətdə davam edəcəyik. Xalq deyəcək, niyə belə sənəd imzaladınız, amma fakt odur ki, o, Ermənistanın yaxın 100 ildə təhlükəsizliyini və sülhü təmin edəcək. Qərar yalnız bizim xeyrimizə olmamalıdır. 2018-ci ildə də demişdim, qərar hər kəs üçün xeyirli olmalıdır ki, davamlı olsun”.
Tahir TAĞIYEV
