Düşmənlə mübarizədə vacib faktorlardan biri də informasiya müharibəsidir. Döyüşdə uğur qazanmaqla yanaşı, informasiya cəbhəsində də uğur qazanmaq vacib faktorlardan biridir. Etiraf edək ki, əvvəllər informasiya müharibəsində biz çox vaxt ermənilərə uduzurduq. Xüsusən də Birinci Qarabağ müharibəsi dönəmində sözügedən amil özünü daha çox göstərdi.
Bu, təkcə o demək deyildi ki, ermənilər təbliğatda bizdən güclü idilər. Sadəcə, problem onda idi ki, biz zəif idik, həm də operativ deyildik. Uzun illər xaricdə məskunlaşmış ermənilərin köməyi onların təbliğat işinə yarıyırdı.
Azərbaycanın dünyaya çıxan təbliğatı əsasən son 15-20 ildə formalaşmağa başladı və son nəticədə öz sözünü dedi. Söhbət ondan gedir ki, 44 günlük Vətən müharibəsində dönəmində Azərbaycan təkcə hərbi müstəvidə deyil, informasiya cəbhəsində də ermənilər üzərində üstünlüyü təmin edə bildi. Erməni lobbisi nə qədər çalışsa da ölkəmizi informasiya blokadasına sala bilmədi. Dünyanın aparıcı informasiya vasitələrində Ermənistanın işğalçılıq fəaliyyəti ifşa edildi və s.
O da məlumdur ki, Ermənistan sentyabrın 13-də Azərbaycanla sərhəd ərazilərdə genişmiqyaslı təxribatlar törədib. Bu dəfə də düşmənin layiqli cavabı verildi. Maraqlıdır, Vətən müharibəsi dövründə və Ermənistanın budəfəki təxribatları və Azərbaycanın cavab reaksiyaları özünü necə göstərdi? Bu mərhələdə Azərbaycanın informasiya cəbhəsində əldə etdiyi nəticələr məqbul sayıla bilərmi? İnformasiya savaşı müstəvisində Vətən müharibəsi dövrü ilə müqayisədə Azərbaycan Ermənistanı necə üstələyə bildi? Qarşı tərəfi necə zərərsizləşdirə bildik?
“Mediamız İkinci Qarabağ müharibəsi vaxtı informasiya cəbhəsində əldə etdiyi təcrübədən bu dəfə səmərəli istifadə edə bildi”
Məsələyə münasibət bildirən media eksperti Yadigar Məmmədli hesab edir ki, prinsipcə, bu dəfə informasiya müstəvisində Azərbaycan uğurlu performans sərgiləyə bildi: “Əvvəla, İkinci Qarabağ müharibəsi 13 sentyabr təxribatından fərqli olaraq müddət baxımından daha uzun çəkdi. Sözügedən savaşda Birinci Qarabağ müharibəsində üzləşdiyimiz məğlubiyyət sindromu aradan qaldırıldı. İnformasiya cəbhəsində ən böyük xidmət Prezident İlham Əliyevə məxsusdur. Ölkə başçısı dünyanın 30-a yaxın aparıcı televiziya və media resursuna müsahibə verdi. Məhz bu amil, Azərbaycanın informasiya savaşında uğur qazanmasında mühüm rol oynadı. Bu dəfə ilkin mərhələdə müəyyən informasiya qıtlığı olsa da, çox keçmədən aradan qaldırıldı. Bu da təbii idi. Ona görə ki, rəsmi informasiya nə qədər verilirsə, bu, o qədər də cəmiyyətə ötürülməli idi. Ermənilər bu dəfə nə qədər vay-şivən qoparsalar da dünya ictimayəti onların təsiri altına düşmədi. Zamanında Xarici İşlər Nazirliyi və digər müvafiq qurumlar gərəkən reaksiyanı verdilər. Mediamız İkinci Qarabağ müharibəsi vaxtı informasiya cəbhəsində əldə etdiyi təcrübədən bu dəfə səmərəli istifadə edə bildi. Mediamız bunun altında qalmadı və gərəkən məlumatlar dünyaya çatdırıldı. Hesab edirəm ki, bu dəfə informasiya cəbhəsində mediamız çeviklik və operativlik göstərdi”.
Bir sözlə, media eksperti bu dəfə mətbuatın fəaliyyətini və informasiya siyasətini məqbul hesab edir.
Vidadi ORDAHALLI
