Azərbaycanda şəhidlərin yaslarında, dəfn mərasimlərində bizim cəmiyyətə, mənəviyyatımıza zidd hallar yaşanmağa başlayıb. Azərbaycanın ərazi bütövlüyü uğurunda canından keçən Vətən oğullarının dəfn mərasimlərində “Ya Hüseyn” deyib mərsiyyə deyən dəstələr ortaya çıxıb.
Bir sözlə, Azərbaycan şəhidlərinin dəfn mərasimlərində fars meyilli, İranın ideoloji rituallarını bilərəkdən qabardan dəstələr peyda olur. Onlar bizim şəhidlərə “Hüseyn” yolunun davamçısı deyib şaxsey-vaxsey döyürlər. Bizim şəhid dəfnlərinə lazımsız müdaxilələr edirlər və “Allah şəhidlərimizi Kərbala şəhidləri ilə məşhur etsin” deyirlər. Bizim şəhidlərin şəhadətini hansısa təriqətlə, yolla bağlamaq olmaz, onlar Azərbaycanın ərazi bütövlüyünü müdafiə edərkən canlarını fəda ediblər. Amma hər şəhidin yas mərasimində gözlənilmədən bir dəstə peyda olur və onlar bu mərasimlərə radikal riəçilik, irançılıq elementləri qatmağa çalışırlar. Şəhidlərimizin “Hüseynçilər” kimi qələmə verilməsi cəmiyyət tərəfindən də, şəhid ailələrinin özləri tərəfindən də etirazla qarşılanır. Maraqlıdır ki, bu adamlar şəhdin adını belə çəkmədən “Hüseyn” deyə vay-şüvən salırlar. Bu günlərdə şəhid dəfnlərindən birində ciyəri yanıb kösöv olan şəhid anası dözə bilməyib “mənim oğlumun adı Hüseyn deyil” deyib və onlara bildirib ki, imkan verin oğlumu ağlayım. Şəhid anası oğlunun yasında təxribat törədən “Hüseynçilərə” etiraz edir: “Heç olmasa bu gün imkan verin, öz şəhidimizə ağlayaq”. Bu barədə videogörüntü yayılıb.
Ekspertlər deyirlər ki, radikal şiəçilər hazırda hər vasitədən istifadə edib irançılıq meyillərini yaymağa çalışırlar. Bu məsələ sosial şəbəkələrdə də ciddi narahatlıqla qarşılanıb. Onlar qeyd edirlər ki, bu dəstə şəhidlərin yas mərasimlərə daxil olaraq fars müsiqiləri üstündə “Əbəlfəz – Hüseyn” mahnılarını oxumaqla şəhidlərimizin ruhunu incidirlər.
Sosial şəbəkə istifadəçiləri hesab edirlər ki, aidiyyatı qurumlar bu məsələni nəzarətə götürməlidir. Bu ziyanlı tendensiyanın geniş miqyas aldığı bir vaxtda o cür dəstələr zərərsizləşdirilməlidir. Bura Azərbaycandır və o oğullar torpaqlarımızı müdafiə edərkən şəhid olubdur, onlar bizə yad olan hansısa bir ideologiyaya uğurunda şəhid olmayıblar.
“Şəhid dəfnlərində hansısa bir məzhəbçi, təriqətçi ritualın aparılması düzgün deyil”
Filologiya üzrə fəlsəfə doktoru Elyar İslamoğlu “Bakı-Xəbər”ə təəssüflə bildirdi ki, bu “dindar” dəstələr hər şəhid dəfnində peyda olur və mərsiyyələr deyirlər, Azərbaycanla, Azərbaycan dövlətçiliyi ilə əlaqəsi olmayan şüarlar səsləndirirlər. “Mən sentyabrın 14-də səhər üzü uşaq evində böyüyən Əhmədovun, axşam isə Ravil Hümbətovun dəfnində iştirak etdim. Bəli, mən də o qrupların davranışlarını gördüm. Şəhid anası özü radikal düşüncəli şəxslərin davranışlarına etiraz edib. Bunu əks etdirən videonu da gördüm. Bu “dinçilərin” hərəkətlərinə bir çox şəxslər narazılığını bildirib. Şəhidlərimiz bizim vətənimizin azadlığı, bütövlüyü, bayrağımızın yüksəklərdə əbədi olaraq dalğalanması üçün öz canlarından keçiblər. Şəhid dəfnlərində hansısa bir məhzəbçi, təriqətçi ritualın aparılması düzgün deyil, bu mərasimlərdə bizim himnimiz səslənməlidir. Onsuz da bizim himnimizin mətnində hər bir təbəqə üçün lazım olan sözlər, fikirlər var. Himnimizin sözləri gənclərimizdə, övladlarımızda ruh yüksəkliyi yaradır. Şəhid yaslarını və şəhid dəfnlərini mərsiyəxanaya çevirmək olmaz. Xüsusən də şəhid dəfnlərində mərsiyyə deyilməsi xoş qarşılanmır. Mən dəfdə olanda bir nəfərə kiçik iradımı bildirdim ki, düzgün etmirsiz. Dəfn mərasimində şəhdin özünün adı çəkilməli, onun qəhrəmanlığı, döyüş yolu barədə danışılmalıdır, sinə döyüb ağı deyilməməlidir”.
E.İslamoğlunun sözlərinə görə, həmin o təriqətçi ritualların yeri Şəhidlər Xiyabanı deyil. “Mən bizim insanlarımızdan diqqətli olmağı xahiş edirəm. Dindar qardaşlarımızdan da rica edirəm ki, şəhidlərin yas mərasimlərini, şəhidlərin dəfnini təriqətçi rituala çevirməsinlər”-deyə E.İslamoğlu vurğuladı.
İradə SARIYEVA
