Ermənistan terrorçu və işğalçı dövlət olduğunu hər addımda sübut edir. 2020-ci ildə Ermənistan silahlı birləşmələri üzərində qələbəsi ordumuzun gücünü bütün dünyada təsdiqləsə də, terrorçu Ermənistan yenə də aldığı zərbədən dərs götürmək istəməyib təxribatçı əməllərini davam etdirir. Ermənistanın 12 sentyabr hücumu, təxribatı bizi iki il əvvələ, 2020-ci ilin iyul hadisələrinə çəkib apardı.
O günlər hər kəsin yaxşı yadındadır. Ermənistanın 2020-ci ilin iyul ayında Ermənistan və Azərbaycan sərhəddinin Tovuz istiqamətində həyata keçirdiyi sərhəd təxribatı ona hansı itkilər bahasına başa gəldiyi məlumdur. 2020-ci ilin iyulunda Tovuz hadisələri ilə 2022-ci ilin 12 sentyabrdan başlanan gərginliyin arasında ciddi bənzərlik var. Həmin dövrdəki kimi bu dəfə də Ermənistan təxribata cəhd etdi, revanş qazanmaq istədi, amma rəşadətli Azərbaycan oğulları, Azərbaycan Ordusu buna imkan vermədi. Neçə ki, iki il əvvəl doğma torpağımızı qorumaq uğurunda Polad Həşimov, İlqar Mirzəyev və başqa oğullarımız qəhrəmancasına şəhid oldular, 12 sentyabrda da oğullarımız o cür qəhrəmanlıqlar göstərdi və canlarını vətən yolunda fəda etdilər.
Bilirik ki, 2020-ci ilin iyul ayında şanlı Azərbaycan ordusu Ermənistan silahlı birləşmələrinin ağzından vurdu, silah-sursatlarını, hərbi qüvvələrini məhv etdi. Aldığı zərbədən dərs götürməyən Ermənistan 2020-ci ilin 27 sentyabrda da təxribatı təkrarən həyata keçirdilər, Azərbaycan əks hücuma keçib anti-terror əməliyyatı ilə onlara dərs verdi. İndi də Ermənistan son təxribat hücumu ilə bir növ Tovuz hadisələri təkrarlayır. Onlar Azərbaycana qarşı təxribat törətdiyi halda Azərbaycan əks zərbələrlə onları məhv etdi, 200-dən artıq ölü sayları var. Bu dəfəki hadisə 2020-ci il hadisələrinin davamıdır. Ermənistan 2020-ci ilin iyul Tovuz ssenarisini yenidən təkrarladı və yenə həmin əks-zərbəni aldı. Bu məqamı necə qiymətləndirmək olar?
“Ermənistan 2020-ci ildə də, indi də şanlı Azərbaycan Ordusu tərəfindən rüsvayçı şəkildə məğlubiyyətə uğradıldı”
AVCİYA-nın vitse-prezidenti, prosessor, siyasi şərhçi Məhərrəm Zülfüqarlı bizimlə söhbətində bildirdi ki, 12 sentyabrda yaşanan erməni təxribatı bir sıra göstəricilərinə görə 2020-ci ilin iyul hadisələri ilə uyğunluq təşkil edir. “Ermənistanın törətdiyi son sərhəd təxribatı ilə Tovuz hadisələri arasında ciddi oxşarlıqlar mövcuddur. Bu ölkə son 30 ildir ki, özünün separatçı, işğalçı, revanşist niyyətlərini açıq şəkildə bəyan edir. 2020-ci ilin iyulunda Tovuz istiqamətindən hücuma keçən Ermənistanın məqsədi yeni işğalçılıq niyyətlərini gerçəkləşdirmək idi, lakin arzusu gözündə qaldı, Azərbaycan ordusu onlara böyük dərs verdi, darmadağın etdi. Bundan dərs götürməyin 27 sentyabr tarixində yenidən cəbhəboyu hücuma keçdilər, bu hücum da onlara çox baha başa gəldi, minlərlə itki verdilər, orduları tamamilə dağıldı, dizə çökdülər, kapitulyasiya müqaviləsi imzaladılar. Dəmir yumruq başlarını əzdi. Yenə də bir az özlərinə gələn kimi təxribata başladılar. Bu dəfə də layiq olduqları cavabı aldılar”.
M.Zülfüqarlı hesab edir ki, Ermənistan 2020-ci ilin iyulunda da, indi də heç nəyə nail ola bilmədi, əksinə güclü Azərbaycan ordusunun müqaviməti ilə dərindən sarsıldı: “Ermənistan 2020-ci ildə də, indi də şanlı Azərbaycan Ordusu tərəfindən rüsvayçı şəkildə məğlubiyyətə uğradıldı”.
M.Zülfüqarlının sözlərinə görə, Azərbaycan ərazisində Sovet-bolşevik rəhbərliyinin bilavasitə səyi nəticəsində qondarma DQMV-nın yaradılması həmin dövrdən erməni separatizmi üçün bir yuva olub, bu da daim kənardan dəstəklənib. “Bilirsiz ki, Azərbaycan Ermənistan münaqişəsi regiona təzyiq etmək üçün böyük dövlətlərin əlində həmişə bir vasitə olub. Sovet dövründə Sovet rəhbərliyi bundan istifadə edirdi, SSRİ dağıldıqdan sonra bu konfliktin “memarı” Rusiya istifadə etməyə başladı. O cümlədən də Fransa, ABŞ bundan öz məqsədləri üçün yararlanırlar. Çox qəribədir ki, uzun müddət ATƏT-in Minsk qrupunun həmsədrləri olan bu üç ölkənin üçü də bu problemin həllində maraqlı deyildirlər. Bunların məqsədi bu münaqişədən istifadə edib regionda öz maraqlarına uyğun insanların hakimiyyətə gəlməsini təmin etmək idi. Ona görə edirdilər ki, burada özlərinə uyğun bir rejim yaratsınlar. Rusiya indi çətin vəziyyətdədir. Ukraynadakı müharibədə günü-gündən geri çəkilməkdə və böyük itkilər verməkdədir. Belə bir məqamda Avropa Birliyinin vasitəçilik rolunu öz öhtəsinə götürməsi və bu yaxınlıqda iki dövlət başçısının Avropa Birliyi rəhbəri ilə görüşü hesab edirəm ki, Rusiya tərəfi daha da qıcıqlandırdı, indiki proseslərdə qışışdırıcı rol oynadı. Yəni Rusiya imkan vermək istəmir ki, regionda problemin həllinə Avropa Birliyi qoşulsun, təşəbbüsü öz əlinə alsın. Avropa Birliyi ilə yanaşı ABŞ Cənubi Qafqaza xüsusi nümayəndə təyin edib. Onun da missiyasının başlanılması Rusiyanı qane etmir. Rusiya istəyir ki, yalnız onun vasitəçiliyi ilə danışıqlar getsin, o da istədiyinə uyğun olaraq məsələni uzatsın, problem həll olunmasın. Bir qrup yenidən Qarabağa gətirilmiş erməniləri qorumaq adı ilə Rusiya qoşunları burada qalsın...”-deyə M.Zülfüqarlı şərhində bildirdi.
İradə SARIYEVA
