Ermənistanın Azərbaycana qarşı 12 sentyabr təxribatına Azərbaycan ordusunun uyğun cavab verməsi və düşməni darmadağın etməsi İrana sığınmış bəzi azərbaycanlıları ciddi narahat edib.
Belə ki, yerli medianın yazdığına görə, İran mediası Azərbaycan şəhidlərinə qarşı hörmətsizlik edib. Qeyd edilənə görə, İrana sığınmış azərbaycanlılar tərəfindən idarə olunan “Nardaran313” Teleqram kanalı Azərbaycanın ərazi bütövlüyü və torpaqlarımızın azad edilməsi uğrunda həlak olan hərbçilərin guya bundan sonra şəhid sayımayacağı kimi cəfəng fikirlər səsləndirib. Mediamız yazır ki, öz vətənlərini sataraq İranda gizlənmiş və molla rejiminin maliyyə və siyasi himayəsi altında doğma ölkələri və dövləti olan Azərbaycana dil uzadan "Hüseynçilər" terror təşkilatının ünsürlərinin idarə etdiyi kanal indi də Vətən və iman uğrunda canlarından keçənlərin şəhid olmasını sual altına almaq cəsarətini tapıblar. Belə ki, istifadəçilər həmin kanalın Azərbaycanın tarixi Zəngəzur bölgəsini Ermənistanın "Sünik" vilayəti adlandırmasına, habelə orada döyüşlərdə həyatını itirmiş azərbaycanlı əsgərlərə “şəhid” sözü əvəzinə “öldürülmüş” sözünün işlədilməsinə etirazlarını bildiriblər. Kanalın idarəçiləri isə cavabında bunu İranın dini rəhbəri Xameneyinin fətvası ilə əlaqələndirib, gülünc və məntiqsiz şəkildə əsaslandırmağa cəhd ediblər. Özlərini "Azərbaycan İslam Müqavimət Cəbhəsi" adlandıran qrup daha sonra yazır: "Əgər kanalımızı izləyirsinizsə, bu döyüşdən əvvəllə qədər biz Qarabağ müharibəsi qurbanlarını şəhid adlandırırdıq. Protokol və siyasətə görə yox, sırf inanc və dini əsasa görə. Onlar İslam torpağının azad edilməsi uğrunda vuruşurdular və "vəliye fəqihin" (ali rəhbər Xameneyi) dolayısı ilə buna icazəsi var idi. Əgər bundan sonra beynəlxalq sərhədi pozmaq üçün döyüşüb öldürülsələr, şəhid sayılmayacaqlar, çünki vəliye fəqihin (ali rəhbərin) əmri budur ki, bölgənin geosiyasi sərhədləri dəyişməsin və bu yolda kim öldürülərsə, ölüdən başqa bir şey sayılmayacaq. Dünya və axirətdə ziyana uğrayanlardan olacaq". Bunlar da mediada öz əksini tapıb.
“Ermənistanın özü də bilir, müəyyən siyasətçiləri də zaman-zaman etiraf ediblər ki, Zəngəzur Azərbaycan ərazisidir”
Məsələyə münasibət bildirən Milli Cəbhə Partiyasının (MHP) sədr müavini, tanınmış ilahiyyatçı Tural İrfan “Bakı-Xəbər”ə bildirdi ki, əslində o kanalda səsləndirilən fikirlər İran mətbuatının yox, elə İran dövlətinin, siyasi rəhbərliyinin fikridir. “Həmişə də bu fikirdə olublar. Sadəcə müəyyən vaxtlarda hiylə işlədərək guya bizimlə dostmuşlar kimi davranıblar, bizim şəhidlərə zahirdə şəhid deyiblər və belə bir aldanışlar ediblər. Amma bu əvvəldən məlumdur ki, Xocalı şəhidlərinə, təhqir olunan məcsidlərimizə İranın ümumiyyətlə hansı nəzərlə baxdığı sübut olunub. İran həmişə ermənilərin tərəfində durub, torpaqlarımıza təcavüz edən Ermənistanın yanında olub. Qeyd edim ki, bu cür şəxslər də bizim millətdən olsalar da gedib İranda sığınacaq alıblar, İran da onları bizim dövlətimizə qarşı yetişdirib, onlar bizim əleyhimizə işləyirlər. Onlar haqqında da tədbir görülməlidir və nı vaxtsa yəqin ki, görüləcək. Məlumatlara görə, onların Azərbaycana təhvil verilməsi ilə bağlı da İrana müraciətlər olub. Hərçənd ki, bu cür şəxslər və bu cür çıxışlar hər iki dövlətin arasındakı münasibətə də mənfi təsir göstərir. Ona görə də bu həllini tapmalıdır. İran bizim adamları “özəlləşdirib” onları agentə çevirib. Biz nə edək? Biz də o cür addım atmalıyıq ki, İranın hanısa adamını onun haqqında bu cür fikirlər səsləndirməyə məcbur edək? Bir daha qeyd edirəm ki, sözügedən kanalda səsləndirilən fikirlər İran dövlətinin mövqeyidir. Bu əsla və əsla islamla uzlaşmayan və anti-islam bir mövqedir. Bu tək Azərbaycana qarşı deyil. Bunu da unutmaq olmaz ki, İran həm Kəşmir məsələsində də Hindistanın tərəfindədir. Kəşmirdə şəhid olan müsəlmanları da bu cür adlandır, Çin hökumətinin uyğurları soyqırım etməsini də bu ölkə dəstəkləyir. Qarabağ məsələsində də bütün dünyaya məlumdur ki, əvvəl bir gündən İran dini terminlə desək kafir Ermənistanın tərəfindədir. Baxmayaraq ki, onlar dini qiyafə geyərək özlərini din dövləti adlandırlar və təəssüf ki, dünyada da bir çox müsəlmanlar buna inanırlar”.
T.İrfanın sözlərinə görə, artıq bu faktın özü sübut edir ki, onların əsla və əsla islamla, dinlə, Quranla əlaqəsi yoxdur. Onların davranışlarını təbii qarşıladığını deyən T.İrfan bildirdi İrandan bundan başqa heç nə gözləmək olmazdı. “Onların verdiyi hökmlərin, fətvaların da əsl islama aidiyyatı yoxdur. Görsənən odur ki, onlar açıq – aydın ermənilərin ölülərinə “şəhid” deyirlər. Bunu medialarından görürük. Guya bir neçə ermənini də saxtakarlıqla öz dinlərinə gətiriblər, guya onlar müsəlmandır, onlar “şəhid” sayılır, Azərbaycan tərəfdən şəhid olanlar şəhid sayılmır. Bu təbii ki, cəfəngiyyatdır. Əlbəttə, bütün dünya bilir ki, o ərazinin adı Zəngəzurdur və “Sünik” deyil. Ermənistanın özü də bilir, müəyyən siyasətçiləri də zaman-zaman etiraf ediblər ki, Zəngəzur Azərbaycan ərazisidir. Bütün tarixi, dini abidələr də sübut edir ki, Zəngəzur Azərbaycana məxsusdur, türk dünyasına məxsusdur. Zəngəzurun məqsədli şəkildə “Sünik” adlandırılması ermənidən çox ermənilik etməyə cəhddir. Bunu bu cür qiymətləndirmək olar”.
T.İrfan sözügedən kanalda səsləndirilən fikirləri əhəmiyyətsiz hesab edir və xüsusilə də inanclı insanları belə söhbətlərə inanmamağa səsləyir.
İradə SARIYEVA
