Ermənistanda müxalifət və hakimiyyət sərhəddəki vəziyyətlə bağlı vahid bəyanatla çıxış edə bilməyiblər. Bu açıqlama ilə Ermənistanda hakimiyyətdə olan “Vətəndaş sazişi” partiyasının deputatı Vladimir Vardanyan çıxış edib. “Ermənistan parlamentində müxalifətdə olan “Mənim şərəfim var” və “Hayastan” fraksiyaları ilə hakim partiya Azərbaycan-Ermənistan dövlət sərhədindəki vəziyyətlə bağlı bəyanatın mətnini razılaşdıra biməyiblər”.
“Sputnik” Ermənistanın məlumatına görə, Vardanyan qeyd edib ki, hər iki fraksiya parlamentə təkliflər paketini təqdim etsə də, sərhəddəki gərginliklə bağlı birgə bəyanatın mətnində konsensus əldə olunmayıb.
“...Qarşıdurmanın bir qanadı da parlamentdədir”
Bu məsələyə şərh verən Azad Vətən Partiyasının sədri Akif Nağı “Bakı-Xəbər”ə bildirdi ki, Ermənistanın sərhəd təxribatına bu ölkədə münasibət birmənalı olmadı, müxtəlif münasibətlər sərgiləndi və dünəndən yenidən etiraz aksiyaları keçirilməyə başladı. “Görünür ki, müxalifət bu hadisədən öz xeyri üçün istifadə etmək istəyir. Paşinyan da bu prosesləri görürdü, amma bilə-bilə nə üçün bu addımı atdı, bu təxribatı törətdi? O bu gərginliyi başa düşməli idi. Belə görsənir ki, bu təxribatı törətməkdə Paşinyanın başqa maraqları və məqsədləri var. Sülh prosesi gedirdi, özü də etiraf edirdi ki, bu ilin sonuna qədər sülh müqaviləsi imzalanmalıdır. Bu prosesi pozmaq üçün təxribat yolunu seçdi. Ümid edir ki, bundan sonra gərginlik olacaq, bir növ yeni danışıqlar başlaya bilər. Bilirsiz ki, BMT Təhlükəsizlik Şurasında da müzakirələr gedir, KTMT-də senytabrın 13-də gecə bu məsələ müzakirə olundu və qərara gəldilər ki, həmin qurumun baş katibinin rəhbərliyi ilə Azərbaycan –Ermənistan sərhəddinə nümayəndə heyəti göndərilsin, hadisələr yerində araşdırılsın. Yəni Paşinyanın da istədiyi o idi ki, müəyyən araşdırmalar getsin, müzakirələr aparılsın. Paşinyan ümid edir ki, ATƏT-in Minsk qrupu həmsədrliyi yenidən “dirilə” bilər və sair. Digər tərəfdən də kütləvi şəkildə erməni hərbiçilərinin ölməsindən müxalifət də istifadə edə bilərdi. Ona görə də, bilməz olmaz ki, hadisələrin hansı istiqamətdə gedəcəyini bilmək olmaz. Müxalifət əhalini qıcıqlandırıb küçələrə çıxara bilsə başqa məqsədlərinə də nail ola, Paşinyanın istefası istiqamətində addımlar ata bilər. Bu hadisələrin gedişindən asılıdır. Amma Ermənistan cəmiyyətinin ciddi şəkildə qıcıqlandığı hiss olunmur, ciddi reaksiya yoxdur. Aksiyalara Ermənistanın təxribatı nəticəsində ölənlərin yaxınları və bir az müxalif qüvvələr çıxıb. Bütövlükdə, erməni toplumunun qəzəbi hiss olunmadı. Həmin qarşıdurmanın bir qanadı da parlamentdədir, bu qarşıdurma nəticəsində parlamentdə müxalifət və iqtidar bir mövqedən çıxış edə bilmədilər. Bu da Ermənstanın vəziyyətini bir daha nümayiş etdirir ki, orada Azərbaycandan fərqli olaraq vahid mövqe yoxdur. Azərbaycanda Qarabağ məsələsi ilə bağlı vahid milli mövqe var. Sərhədd təxribatından bu günə qədər Azərbaycanın siyasi qüvvələri də, cəmiyyətdə vahid mövqedən çıxış edir, baş verənlər hər kəsi narahat edir, şəhidlərimizin olması bizi kədərləndirib. Amma ümumi dövlətçilik xəttinə, ümummilli maraqlara sədaqət özünü daha çox göstərir. Ən radikal partiyalar belə bu məsələdən öz maraqları naminə istifadə etməyə cəhd göstərmir. Azərbaycan cəmiyyətində belə bir rəy var ki, bu kimi məsələdən qrup və partiya maraqları üçün istifadə etmək olmaz. “Azad Vətən” Partiyası olaraq bəyanat verdik və mövqeyimizi göstərdik. Digər pıartiyalar da yəqin ki, bəyanat verib mövqe bildirəcək. Bu birlik Ermənistan cəmiyyətində yoxur, orada dövlət maraqlarından çox qrup və partiya maraqları üstünlük təşkil edir. Ermənistan parlamentində də vahid mövqeyə gəlinməməsinin və bəyanatın qəbul olunmamasının səbəbi də qrup maraqlarının nəticəsidir. Müxalifət baxır, müşahidə edir və ola bilsin, öz məqsədlərinə çatmaq üçün bundan istifadə etsin”.
O, qeyd etdi ki, əgər hərbiçilərin ölümünə Ermənistan cəmiyyətində ciddi reaksiyaya nail olunsa müxalifət bir az da fəallaşacaq, kütləvi aksiyalara başlayacaq, bunu genişləndirməyə çalışacaq, yox, əgər bu olmasa Paşinyan öz ssenarisi üzərində işlərini davam etdirəcək: “Çalışacaq ki, planlarını həyata keçirsin. Paşinyanın da müxalifətlə bağlı planları var. Xalqın içindən ciddi narazılıq olmasa müxalifətin mövqeyini zəflətmək üçün ola bilsin Paşinyan bundan istifadə etsin. Yəni hadisələrin yaxın günlərdə gedişi məsələlərə aydınlıq gətirəcək”.
İradə SARIYEVA
