Ukrayna Xarici İşlər Nazirliyinə bağlı sanctions.nazk.gov.ua internet saytı Rusiyada fəaliyyət göstərən Türkiyənin dövlət və özəl banklarına, rəhbər şəxslərə və iş adamlarına qarşı sanksiya tətbiq edilməsini istəyib.
İnternet saytı türkiyəli iş adamlarına, dövlət Ziraat Bankına, İş Bankının rəhbərlərinə və Rusiyada fəaliyyət göstərən Credit Europe Bank-ın sahibi iş adamı Hüsnü Özyeğinə qarşı sanksiya tələb edib.
Ziraat Bankı, İş Bankı və Credit Europe Bank rəhbərlərinin siyahısı onların fotoşəkilləri ilə birlikdə adıçəkilən internet saytında dərc olunub.
Siyahıda Hüsnü Özyeğin də daxil olmaqla, bir çox iş adamı yer alıb. Bu şirkət və şəxslərin sanksiyaya məruz qalması ilə bağlı açıq çağırış edilən saytda, profilinə kliklədiyiniz şəxsin səhifəsində aşağıdakı ifadələr yer alıb: “Dünya hökumətlərini Rusiyanın Ukraynaya qarşı müharibəsinə dəstək verdikləri üçün bu şəxslərə qarşı sanksiya tətbiq etməyə çağırın. Mesajınızı sosial mediada paylaşın”.
Qeyd edək ki, Türkiyə höküməti bu məsələ ilə bağlı kəskin etirazını bildirib. Ukraynanın Türkiyədəki səfirindən bu hadisə ilə bağlı rəsmi izahat istənilib.
Ukraynanın Türkiyə iş adamları və banklarına qarşı tutduğu bu mövqeni nə ilə izah etmək olar?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Rusiyanın apardığı işğalçılıq müharibəsi Ukraynanı kifayət qədər çətin vəziyyətə salıb: “Bu səbəbdən də Ukrayna bütün dövlətlərdən onun istədiyi kimi rəftar etməyi istəyir. Ukrayna deyir ki, bütün dünyanın maraqları üçün Rusiyaya qarşı vuruşduğu səbəbindən , ölkələr də onun maraqlarını düşünməlidir. Ancaq hər dövlətin Ukraynanın maraqlarına uyğun gələn və gəlməyən öz iddiaları var. Bu baxımdan Ukrayna Türkiyənin Rusiya ilə hesablaşmadan ona “Bayraqdar” verməsini alqışlayır. Onun “Krım Platforması”nda iştirakını təqdir edir. Ancaq Rusiyaya qarşı sanksiyalara qoşulmamasını qəbul etmir. İstəyir ki, Türkiyə dövlət olaraq, öz şirkətlərindən bu sanksiyalara qoşulmağı tələb etsin. Türkiyənin Rusiya ilə çox ciddi ticarət əlaqələri var. Buna görə də, Ankara müəyyən reallıqları nəzərə almaq məcburiyyətindədir. Bu səbəbdən də, Ukrayna hakimiyyətində türk şirkətlərinə qarşı narazılıq mövcuddur. Türk hökümətinin izahat tələb etməsi də bununla bağlıdır. Çox təəssüflər olsun ki, Ukrayna höküməti bəzi reallıqları başa düşmək istəmir. Anlamaq istəmir ki, Avropa da bu məsələdə ABŞ-ın yanında olmaq məcburiyyətindədir. Ancaq ABŞ-dan fərqli olaraq, Avropa ciddi problemlərlə üz-üzədir. Türkiyənin belə bir məcburiyyəti yoxdur. Avropa ABŞ-ın yedəyində gedir. Türkiyə isə müstəqil siyasət yürütdüyü üçün həm ABŞ-da, həm də Avropada ciddi narazılıq doğurur. Çox təəssüf ki, Ukrayna da narazılardan biridir. İctimai rəydə Türkiyə əleyinə təbliğata start verib. Bunun nəticəsi olaraq Ukraynada türk şirkətlərinə qarşı münasibət arzu olunan səviyyədə deyil. Narazılıq bundan sonra bir az da artacaq. Rusiya bütün arsenalı ilə qanlı müharibıyə start verəcək. Bu da ciddi dağıntılara səbəb olacaq. Nəticədə Ukraynanın tələbləri bir az artacaq. Onlar daha dözümsüz olacaq. Həm Türkiyə şirkətləri, həm də dövləti bu reallıqları nəzərə almaq məcburiyyətində qalacaq”.
Məhəmmədəli QƏRİBLİ
