Məlum olduğu kimi, “Xural” TV-nin rəhbəri, jurnalist Əvəz Zeynallı bir neçə gün əvvəl hüquq-mühafizə orqanları tərəfindən saxlanılıb. Qeyd edək ki, Ə.Zeynallı ilə yanaşı tanınmış vəkil Elçin Sadıqov da həbs edilib.
Sentyabrın 7-də jurnalist Eynulla Fətullayev sosial şəbəkədə və rəhbəri olduğu Haqqın.az saytında “Xural” TV-nin rəhbəri Əvəz Zeynallı haqqında ittihamlar yazıb. Həmin ittihamlarda jurnalistin hazırda həbsdə olan “Baku Steel Company”nin sabiq rəhbəri Rasim Məmmədovun ailəsindən onun müdafiəsi üçün 20 min manat aldığı, amma onu müdafiə etmədiyi yazılıb. Saytın paylaşdığı səs yazısında Əvəz Zeynallının “görüşək, iadə edim” sözü alınan pulun qaytarılması istəyi kimi təqdim edilib. İddiaya görə, Ə.Zeynallı iş adamını tənqid etməkdən əl çəkəcəyi müqabilində onun yaxın adamlarından pul almağa nail olub. Lakin Ə.Zeynallı üzərinə düşən öhdəliyi pozub. Pul mükafatı aldıqdan sonra o, iş adamını təhqir və tənqid etməyə davam edib. Buna cavab olaraq iş adamının yaxın qohumları pullarını geri tələb ediblər. Saytın yaydığı sonuncu məlumata görə, 20 min manat pul geri qaytarılıb. Bu məlumatlar da mətbuatda yer alıb.
Sentyabrın 12-də Baş Prokurorluq Əvəz Zeynallı və Elçin Sadıqovun həbsi səbəblərini açıqlayıb.
Baş Prokurorluqdan verilən məlumata görə, mediada yayımlanmış məlumatlar və cinayət prosessual qanunvericiliyinin tələblərinə uyğun olaraq daxil olmuş müraciət əsasında aparılmış araşdırma zamanı vəzifəli şəxsin külli miqdarda rüşvət almasına əsaslı şübhələr müəyyən edildiyindən fakta görə Baş Prokurorluğun İstintaq idarəsində Azərbaycan Respublikası Cinayət Məcəlləsinin 311.3.3-cü (külli miqdarda rüşvət alma) maddəsi ilə cinayət işi başlanaraq istintaq aparılır.
Baş Prokurorluqdan verilən məlumata görə, istintaqla vəzifəli şəxs olan “Xural Yayınları” Məhdud Məsuliyyətli Cəmiyyətinin baş direktoru Zeynalov Əvəz Tapdıq oğlunun “Baku Steel Company” şirkətinin müşahidə şurasının sabiq sədri, hazırda Bakı Ağır Cinayətlər Məhkəməsində təqsirləndirildiyi cinayət işi üzrə barəsində məhkəmə baxışı davam etdirilən Məmmədov Rasim Hikmət oğlu haqqında təhqiredici məlumatlar yaymamaq, eləcə də barəsində müsbət imic formalaşdırmaq üçün müvafiq verilişlər hazırlamağı vəd edərək 2022-ci ilin avqust ayında onun müdafiəçisi Sadıqov Elçin Əli oğlunun vasitəçiliyi ilə Rasim Məmmədovun yaxınlarından 20.000 manatı rüşvət qismində almasına əsaslı şübhələr müəyyən edilib.
Toplanmış ilkin sübutlara əsasən Zeynalov Əvəz Tapdıq oğlu Cinayət Məcəlləsinin 311.3.3-cü və Sadıqov Elçin Əli oğlu Cinayət Məcəlləsinin 32.5, 311.3.3-cü (külli miqdarda rüşvət almaqda köməkçilik) maddəsi ilə təqsirləndirilən şəxs qismində cəlb edilməklə onlara həmin maddə ilə nəzərdə tutulmuş ittiham elan edilmiş və barələrində məhkəmənin qərarı ilə həbs qətimkan tədbiri seçilib.
Cinayət işi üzrə hüquqi əhəmiyyət kəsb edən bütün halların tam, hərtərəfli və obyektiv araşdırılması istiqamətində zəruri istintaq-əməliyyat tədbirləri davam etdirilir.
Media nümayəndələri, habelə sosial şəbəkə istifadəçilərinin nəzərinə çatdırılır ki, istintaq olunan cinayət işi ilə bağlı rəsmi mənbələrlə dəqiqləşdirilməmiş məlumatların yayılması qadağandır və qanunvericiliklə müəyyən edilmiş məsuliyyətə səbəb olur.
Əvəz Zeynallının vəkili Aqil Layıc deyib ki, jurnalist Əvəz Zeynallı və vəkil Elçin Sadıqov Dövlət Təhlükəsizliyi Xidmətində (DTX) saxlanılır.
O bildirib ki, Binəqədi Rayon Məhkəməsinin hökmü ilə barələrində 4 ay həbs qətimkan tədbiri seçilən vəkil Elçin Sadıqov və Xural TV-nin rəhbəri Əvəz Zeynallının saxlanması DTX-ya həvalə edilib.
A.Layıc həmçinin Əvəz Zeynallı ilə bağlı apellyasiya şikayəti yazdığını qeyd edib:
"Şikayət sabah Binəqədi məhkəməsində olacaq. Bakı Apellyasiya Məhkəməsindən onun barəsində qətimkan tədbirinin ləğv edilməsi və ya alternativ olaraq ev dustaqlığı qətimkan tədbirinin seçilməsi xahiş edilib".
Qeyd edək ki, Əvəz Zeynallı və Elçin Sadıqov külli miqdarda rüşvət almaqda ittiham olunur. Onların hazırda həbsdə olan iş adamı "Baku Still Company" şirkətinin sabiq rəhbəri Rasim Məmmədovun ailə üzvlərindən 20 min manat aldıqları iddiası və səs yazısı yayılmışdı.
Məlumata görə, sentybarın 13-də Əvəz Zeynallının apellyasiya şikayəti üzrə məhkəmə başa çatıb. Bakı Apellyasiya Məhkəməsində hakim Həsən Əhmədovun sədrliyi ilə keçirilən iclasda onun ev dustaqlığına buraxılması ilə bağlı şikayəti təmin olunmayıb.
Ə.Zeynallı barəsində Binəqədi Rayon Məhkəməsi tərəfindən verilmiş 4 aylıq həbs qətimkan qərarı qüvvədə saxlanılıb.
Onu da qeyd edək ki, sentyabrın 12-də Bakı Ağır Cinayətlər Məhkəməsində "Baku Steel Company” şirkətinin sabiq rəhbəri Rasim Məmmədovun cinayət işi ilə bağlı məhkəmə prosesi keçirilib. Trend xəbər verir ki, prosesdə təqsirləndirilən şəxs Rasim Məmmədov Xural internet televiziyasının rəhbəri Əvəz Zeynallının həbsi ilə bağlı danışıb.
R.Məmmədov bildirib ki, Əvəz Zeynallı onu dəfələrlə hədələyib: "Əvəz jurnalist deyil, cinayətkardır. Neçə illərdir mənə təzyiq edərək, pul tələb edir. İndi şükür Allaha gəlib oturub qonşuluqda ağlı başına gəlir. Əvəz dəfələrlə məni şantaj edir və ailəmə qarşı terror edirdi. 2005-2020-ci illərdə məni şantaj edib. İndi də davam edirdi".
Dövlət ittihamçısı ittiham olunan şəxsin dediklərinə münasibət bildirərək şəxsin cinayət xarakterli məlumatlarlarla bağlı iltizam tətbiq olunmalı olduğunu bildirib: "Şəxs kifayət qədər cinayət xarakterli məlumatlar verdi. Bunlar aktlaşdırılıb Baş Prokurorluğa göndərilməlidir”.
Əvəz Zeynallının DTX-da saxlanması hansı əsaslara söykənir? O nə üçün DTX-da saxlanılır, hüquqşünasların ehtimalları nədir?
Mehman Muradlı: “...Kürdəxanıda və Şüvəlanda yerlərin darısqal olması səbəbindən onu DTX-nın təcridxanasında saxlayırlar”
Tanınmış vəkil Mehman Muradlı “Bakı-Xəbər”ə şərhində bildirdi ki, burada qanunsuz heç nə yoxdur. “DTX-da müvəqqəti saxlanma təcridxanası var. Onun saxlandığı yer də müvəqqəti saxlama təcridxanalarından biridir. Ədliyyə Nazirliyinin təcridxanası olmasa da belə məhkəmələr o şəkildə qərar qəbul edib DTX-ya da, Kürdəxanıya da, Şüvəlana da göndərə bilərlər. Ehtimal edirəm ki, son dövrlər narkotiklərlə bağlı əməliyyatların keçirilməsi nəticəsində Kürdəxanıda və Şüvəlanda yerlərin darısqal olması səbəbindən onu DTX-nın təcridxanasında saxlayırlar. Həm də ki, Əvəz Zeynallı və Elçin Sadıqovun ictimai nüfuzu var. Bu baxımdan da, onları aparıb narkomanlarla bir kamerada saxlayası deyillər. Burada qanunsuz heç nə yoxdur. DTX-nın müvəqqəti saxlanma təcridxanasında həm şərait fərqlidir, həm şəhərin mərkəzində yerləşir, işlərin daha operativ görülməsi baxımından da əlverişlidir. DTX-nın təcridxanası da bu dövlətin qurumlarından biridir, Penitisyar Xidmət də dövlətin qurumudur”.
M. Muradlı hesab edir ki, məhkəmə statistikanı götürüb 1 saylı və 3 saylı müvəqqəti saxlama təcridxanasında yer olub olmadığını da araşdıra bilər. Amma onun ehtimalı odur ki, Ə.Zeynallının və E.Sadıqovun DTX-nın təcridxanasında saxlanılması Kürdəxanı və Şüvəlandakı müvəqqəti saxlama təcridxanasındakı yer darlığı ilə bağlıdır. “Əvəz Zeynallı tanınmış şəxsdir, Elçin Sadıqovun da bir vəkil kimi ictimai çəkisi var. Onların DTX-nın təcridxanasında saxlanılmasını normal qarşılanmalıdır, burada hanısa bir qanunsuzluqdan söhbət gedə bilməz”.
Şəmsəddin Əliyev: “Onun DTX-nın təcridxanasında saxlanılmasında cəmiyyətin sezə bilmədiyi məqam var”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyevin də öz ehtimalları yanaşmaları var: “Bir hüquqşünas kimi deyim ki, maddələr kifayət qədər ciddi maddələrdir. Maddələr rüşvətlə, sui-istifadə, müxtəlif yollarla, şantajla və sairlə müəyyən vəsaitləri əldə etməklə bağlı olduğundan istintaq gedir. Həmin o maddələrlə cinayət tədqiqinə başlanılıb. İstintaqda prosesual araşdırma zamanı müstəntiqin hansı fərziyyələrlə, mənbələrlə, şahid ifadələri ilə addımlar atması mənə öncədən bəlli deyil. Düşünürəm ki, ictimaiyyətə də bəlli olmadığından mən ahıl yaşında olan bir hüquqşünas kimi rəy verməkdə çətinlik çəkirəm. Mənim ehtimallara söykənib rəy verməyimin özü istintaqı yanlış məcraya yönəldə, ədalətli, obyektiv istiqamətdən çəkindirə bilər. Bu baxımdan, səbr edək deyirəm. Onsuz da ictimaiyyət üçün açıqlamalar olacaq və onun DTX-nın təcridxanasında saxlanılmasında cəmiyyətin sezə bilmədiyi məqam var. Mənim ehtimalım belədir ki, ola bilsin, onların təhlükəsizliyinin təmin olunması, digər məlumatların kənara sızmaması üçün belə edilib. Bu istintaqın ədalətli və obyektiv gedişi ilə də bağlı olduğu üçün onun orada saxlanılması təbii ki, istintaq orqanı üçün önəm kəsb edir. Amma bütün hallarda mən Allah Taladan hüquqşünas həmkarımın da, Əvəz müəllimin də qapılarını açmasını diləyirəm”.
Ş.Əliyev ümid edir ki, istintaq obyektiv və ədalətli olacaq.
İradə SARIYEVA
