ABŞ-ın Ukraynadakı səfirinin müavini Alan Persell ölkənin Ermənistandakı səfiri təyin ediləcək. Bu barədə məlumatı öz mənbələrinə istinadən Ermənistanın “Joxovurd” qəzeti yayıb.
Nəşr yazır ki, ABŞ-ın İrəvandakı diplomatik missiyasının hazırkı rəhbəri Linn Treysinin bu vəzifədə mandatının müddəti 2 aydan sonra başa çatır. Bildirilir ki, onu məhz Kiyevdəki səfir Bricit Brinkinin müavini Alan Persell əvəz edə bilər. Qeyd olunur ki, bu, Ermənistan və Ukraynadakı diplomatların “yerdəyişməsi” ilə bağlı ilk belə hal deyil. Belə ki, ABŞ-ın Kiyevdəki diplomatik missiyasının daha əvvəlki rəhbəri Mari Yovanoviç bu vəzifədən əvvəl ABŞ-ın Ermənistandakı səfiri olub. Amma bu dəfə proseslər fərqli məcrada inkişaf edir. Iddialar səslənir ki, Alan Persellin Ermənistana səfir vəzifəsinə gətirilməsi fonunda ABŞ bu ölkədə mövqelərini gücləndirməyə, Rusiyanı buradan sıxışdırıb çıxarmağa çalışır. Bununla bağlı olaraq ABŞ Ermənistanda diplomatik korpusunun fəaliyyətini daha da gücləndirir. Qeyd edək ki, Ermənistandakı səfirlik say baxımından ABŞ-ın dünyada ikinci ən böyük diplomatik korpusudur. Məlumatlar səslənir ki, tərkibində kəşfiyyat qruplarının da fəaliyyət göstərdiyi diplomatik missiyanın indi hədəfi Cənubi Qafqazda Rusiyanın əlindən əsas forpostunu almaqdır. Bu halda Ermənistanın ABŞ və Rusiya arasında növbəti qarşıdurma məkanı olması qaçılmaz sayılır. Əslində, bu haqda fikirlər getdikcə daha fəal şəkildə dövriyyəyə daxil olur. Hələ bu ilin aprelində Ermənistanın “Qraparak” nəşri yazırdı ki, Rusiya-Qərb hərbi münaqişəsinin ikinci cəbhəsi Ermənistan daxilində partlaya bilər. Nəşrə görə, Ermənistanda vəziyyət elədir ki, ölkənin lideri qütbləşmiş dünyanın heç bir hissəsinə təhlükə yaratmadan özünü düzgün istiqamətləndirməyi və öz ölkəsinin problemlərini həll etməyi bacarmalıdır: “Ancaq Nikol Paşinyanın diplomatik təcrübəsi və biliyi erməni “gəmisini fırtınalı dənizdən” sağ-salamat çıxarmağa yetmir. Ona görə də o, Ermənistan daxilində uzun müddət yaxşı işləmiş, cəmiyyətin bir hissəsini “kağız-kuğuzun” təsiri altında özünü doğrultmaqla aldada biləcəyi əyalət “sənət” üsuluna keçdi. Amma dünyanın qüdrətliləri ilə “oynamaq” alınmır. Bu faktdır ki, Paşinyan və komandası açıq-aşkar Qərb oriyentasiyasının daşıyıcılarıdır. Onlar “aşağıdan” anti-Rusiya təbliğatını davam etdirir, Rusiya sülhməramlılarının Qarabağda olmasını dəyərdən salır, üçtərəfli görüşlərə gedirlər”. Nəşr yazır ki, Paşinyan Ermənistana Qərb-Rusiya müharibəsinin ikinci cəbhəsini gətirə bilər: “Bu arada Rusiya-Qərb hərbi münaqişəsinin ikinci cəbhəsi Ermənistan daxilində partlaya bilər. Bu, Rusiya üçün arzuolunan deyil, amma Qərb üçün arzuolunandır”. İndiki halda mümkün səfir dəyişikliyi, xüsusilə Kiyevdə işləyən Persellin gözlənilən təyinatı Ukrayna ssenarisinin Cənubi Qafqaza köçürüləcəyi ehtimalını daha da artırır. “Qraparak” nəşri bu fonda yazır ki, Rusiya öz himayəsi altında Cənubi Qafqazda tərəqqi yaratmağı çox istərdi, lakin bu, nəinki Ermənistanın maraqlarına uyğun gəlməyəcək, hətta Qərbə də lazım olmayacaq: “Avropa və ABŞ Rusiyanın Cənubi Qafqazdakı fəaliyyətinə mane olmağa, onu buradan sıxışdırıb çıxarmağa çalışır. Rusiyanın zəifləməsi və ya getməsi Qərbin güclənməsi və təsdiqlənməsi deməkdir. NATO indi Ukraynaya Rusiyadan Krıma və Donetskədək hərbi yardımı müzakirə edir. Artıq Rusiyanın tərəqqisi məsələsinə ümumiyyətlə baxılmır, çünki Rusiya artıq dayandırılıb və geri çəkilib. Amma Moskva nəzarəti itirdiyini hiss etdiyi anda regionda vəziyyəti alt-üst edəcək”.
Burada daha bir maraqlı məqam Ermənistan müxalifətinin hələ də davam edən etiraz aksiyalarıdır. Ermənistan hakimiyyətində müxalifətin bu aksiyaları Rusiyanın dəstəyi ilə təşkil etməsinə dair əminlik var. Elə bundan irəli gəlir ki, Paşinyan hakimiyyəti Qərbə meyllənir və bu da ABŞ-ın istəkləri ilə uzlaşır. Bu halda İrəvana təzyiq üçün Rusiya xarici işlər naziri Sergey Lavrovun yenidən ABŞ-ın Ermənistandakı bioloji laboratoriyalarını gündəmə gətirməsi də təsadüf hesab olunmur. “RT Arabic”ə müsahibəsində Rusiyanın xarici işlər naziri vurğulayıb ki, Ermənistan, Qazaxıstan və Mərkəzi Asiyada ABŞ tərəfindən maliyyələşdirilən biolaboratoriyalar var. Erməni hüquq müdafiəçisi Artur Sakunts hesab edir ki, ABŞ-ın maliyyələşdirdiyi biolaboratoriyalar mövzusu narahatlıqlar və təhlükələr baxımından sünidir, bunun heç bir əsası yoxdur. Onun sözlərinə görə, bu, Rusiya Federasiyasının müxtəlif ölkələrdə, o cümlədən Ermənistandakı müştəriləri vasitəsilə postsovet regionu ölkələrinə təzyiq göstərmək üçün rıçaq kimi istifadə etdiyi uydurma mövzudur: “Geosiyasi vəziyyətdən asılı olaraq bu mövzu müntəzəm şəkildə qızışır. Yadınızdadırsa, illər əvvəl ciddi suallar qaldırılmışdı, daha doğrusu, mövzu qızışmışdı”. Erməni hüquq müdafiəçisi vurğulayıb ki, Rusiya Ermənistanı da təcrid sahəsinə köçürmək istəyir, biolaboratoriyalarla bağlı bəyanat isə bu halda rüsvayçılıqdır.
Samirə SƏFƏROVA
