Prezident İlham Əliyev Zəngilan rayonunun Ağalı kəndində ictimaiyyətin nümayəndələri ilə görüşdə çıxış edərkən bildirib ki, biz Ermənistanla sərhədləri müəyyən etməliyik:
“Ermənistan bundan imtina edirdi, ilyarım imtina edirdi. Amma nəticə nə oldu? Mayın 24-də Azərbaycan-Ermənistan sərhədində komissiyaların birinci görüşü keçirildi. Bunun çox böyük mənası var. Həm o nöqteyi-nəzərdən ki, biz bu sərhədləri müəyyən edəcəyik və bu, çox vacibdir. Çünki ermənilər o sərhədləri də zəbt etmişlər. Digər tərəfdən bu, avtomatik olaraq Ermənistanda revanşist, faşist qüvvələr tərəfindən Azərbaycana qarşı irəli sürülən ərazi iddialarına da rəsmən son qoyur. Çünki əgər biz sərhədləri müəyyən ediriksə, hansı dırnaqarası “Dağlıq Qarabağ” statusundan söhbət gedə bilər?! Qarabağ zonası var, Qarabağ diyarı var. Bu, Azərbaycan ərazisidir və bütün dünya bunu qəbul edir. Ona görə Azərbaycan-Ermənistan sərhəd delimitasiyası üzrə komissiyaların birinci iclasının çox böyük əhəmiyyəti var. Digər məsələ, biz demişdik ki, Ermənistan ilə Azərbaycan arasında sülh müqaviləsi imzalanmalıdır. Ermənistan bundan boyun qaçırmağa can atırdı. Çünki sülh müqaviləsi ölkələrin ərazi bütövlüyünün qarşılıqlı surətdə tanınması deməkdir. Amma nəticə etibarilə biz buna da nail olduq və artıq Azərbaycan öz işçi qrupunu müəyyən edib".
Prezidentin sərhəd danışıqlarının unikal mənasını belə ifadə etməsindən hansı nəticəni çıxarmaq olar?
Politoloq Rəşad Bayramov “Bakı-Xəbər”ə açıqlamasında bildirdi ki, Ermənistan rəsmiləri verdikləri açıqlamalarda yenə də Qarabağın "statusunun” müəyyənləşməsi məsələsini qaldırırlar və onlar bunu daxili auditoriyanı, separatçıları sakitləşdirmək üçün səsləndirirlər:
"Ancaq Ermənistan rəsmiləri qapalı görüş və müzakirələrdə verdikləri vədi yerinə yetirməyəcəklərsə, iki ölkə arasında sülh mümkün olmayacaq. Brüsseldə həm sərhədlə, həm də sülh müqaviləsinin hazırlanması ilə bağlı işçi qrupların yaradılması razılaşdırıldı. İndi əsas məsələ işçi qrupların fəaliyyətə başlamasını sürətləndirməkdir. Çünki bu prosesə mane olmaq istəyən qüvvələrin sayı çoxdur. Bu, Ermənistanın "Qarabağ klanının” simasında radikal müxalifət, Qarabağdakı separatçılar, dünyadakı erməni lobbisi və Rusiyadakı mərkəzlərdir. Bunlar birləşərək Azərbaycanla Ermənistan arasında birbaşa dialoqa və müzakirələrə mane olmağa çalışacaqlar. Qərbi Zəngəzur və Ermənistanın indiki ərazilərinin böyük əksəriyyəti, hətta belə demək mümkünsə, tamamı Azərbaycanın tarixi torpaqlarıdır. Lakin bu gün Azərbaycan BMT platformasında tanınmış dövlətin ərazisinə iddia qaldırmır. Sadəcə, Ermənistanı 10 noyabr 2020-c i ildə bağlanmış bəyanata və ondan sonra Soçi, Moskva, Brüsseldə həyata keçirilən anlaşmalar istiqamətində fəaliyyət göstərməyə çağırır. Ali Baş Komandan İlham Əliyev müharibə dövründə olduğu kimi, postmüharibə dövründə də diplomatiya sahəsində çox uğurlu və faydalı proses aparır. Yalnız Azərbaycan üçün yox, Rusiya, İran, Ermənistan, Gürcüstan üçün çox rentabelli bir ortam yaranıb. Yenə də Ermənistan bu ortamı pozmaq təşəbbüsü göstərir. Təklif edilən 5 təməl prinsipi qəbul etdiyini söyləməklə yanaşı oyunpozanlıq edərək özünün həyata keçirilməsi mümkün olmayan təkliflərini irəli sürür. Bunların timsalında dövlətimiz bəyan edir ki, bu oyunların nə olduğunu bilirik, xəbərdarlıq edirik. Bu xəbərdarlıq doğrudur, məsələnin tam həllinə uyğundur. Bu baxımdan da Prezidentin dediyi sxem tam olaraq Ermənistanı ərazi iddialarından əl çəkməyə sövq edəcək. Ermənistan bu mexanizmdən yayınsa, sülh danışıqları pozulacaq. Bunun da ən böyük ziyanı məhz Ermənistana dəyəcək”.
Məhəmmədəli QƏRİBLİ
