Bu günlərdə Müdafiə Nazirliyinin Daxili Təhlükəsizlik, həmçinin Təhsil-tədris və Elmi tədqiqatlar idarəsinin sabiq baş zabiti Zahid Niftəliyevin həbs olunması ilə bağlı xəbər yayıldı.
Baş Prokurorluğun Mətbuat Xidməti məlumatın doğruluğunu təsdiqləyib.
Zahid Niftəliyevə qarşı Hərbi Prokurorluğun İstintaq idarəsində Cinayət Məcəlləsinin 178.2.1, 178.2.2, 178.2.3, 178.2.4, 32.4, 312.2 maddələri ilə cinayət işi başlanıb. Lakin Z.Niftəliyev istintaqdan yayındığı üçün barəsində axtarış elan edilib və 27 may 2022-ci il tarixdə saxlanılmaqla barəsində məhkəmənin qərarı ilə həbs qətimkan tədbiri seçilib.
Bu maraqlı xəbər bizi vadar etdi ki, Zahid Niftəliyevlə bağlı daha ətraflı bir araşdırma aparaq. Onun adı mediada bir neçə il bundan əvvəl hallanmağa başlayıb. Həmin məlumatlarda bildirilirdi ki, Müdafiə Nazirliyinin Koordinasiya Şurasının əməkdaşı Zahid Niftəliyevin qanunsuz əməlləri orduda ciddi narazılıqlar yaradıb. Azərbaycan Respublikası Silahlı Qüvvələri Baş Qərargahının sabiq rəisi, general-polkovnik Nəcməddin Sadıqova yaxınlığı ilə tanınan, ixtisasca ibtidai sinif müəllimi olan Zahid Niftəliyevun əməlləri nazirliyin peşəkar zabitlərinin narazılığına səbəb olub. Həmin zamankı şikayətlərdə qeyd edilir ki, nazirliyin rəhbərliyi Z.Niftəliyevi dəfələrlə cəbhə bölgəsinə ezam etsə də, o özünə xəstəlik kağızı açdırıb, şəkər xəstəliyi, ayaqlarında tromp olduğunu iddia etməklə, bu qərarı icra etməkdən yayınıb. Halbuki, cəbhədə olmaq, düşmənə güc-qüvvə nümayiş etdirmək hər bir vətən oğlunun müqəddəs borcudur. Görünür, Z.Niftəliyev bu borcu arxada özünə gün-güzəran qurmaqda görüb.
Mənbənin məlumatına görə, Nəcməddin Sadıqovun himayəsinə sığınan Zahid Niftəliyevin qara siyashısına düşən zabitlər az sonra tutduqları vəzifədən azad edilir və ya rütbələri aşağı salınırmış. Z.Niftəliyevdə o dərəcədə özünə vurğunluq, müştəbehlik yaranıb ki, əsgər və zabit kadrlarının hüquq və azadlıqlarını məhdulaşdırmaqdan, onları hərbi korpusun gözləri qarşısında təhqir etməkdən, şərəf və ləyaqətlərini alçaltmaqdan belə çəkinməyib. Halbuki, bu kimi hallar “Hərbi qulluqçuların statusu haqqında” Azərbaycan Respublikası Qanununun tələblərinə ziddir. Qanunun 1-ci maddəsinin 3-cü bəndinə görə, heç kəsin ixtiyarı yoxdur ki, hərbi qulluqçuları və onların ailə üzvlərini Azərbaycan Respublikasının Konstitusiyasında və qanunlarında Azərbaycan Respublikasının vətəndaşları üçün nəzərdə tutulmuş hər hansı hüquq və azadlıqlardan məhrum etsin və ya onların hüquqlarını məhdudlaşdırsın, buna yalnız Azərbaycan Respublikasının Konstitusiyasına və qanunlarına müvafiq surətdə yol verilir.
Bildirilir ki, general-polkovnik Nəcməddin Saqıqovun yaratdığı Koordinasiya (yoxlama) Şurasının əməkdaşı olan Z.Niftəliyev şübhəli yollarla böyük sərvətə sahib olub. O, Qəbələ rayonunun Vəndam kəndinin girəcəyində hərbi hissənin materialları hesabına özünə çox böyük həyəti olan ev tikdirib. Yasamal rayonu Şərifzadə küçəsində generalların binasında evi, böyük sahəyə malik olan qarajı var. Yasamalda Su Doldurma Məntəqəsinin yaxnlığında tikilən binada 4 otaqlı mənzili, Fəhlə prospektində -“Həzi Aslanov” metrosunun yaxınlığında keçmiş hərbi hissənin ən yaxşı yerində 10 sot torpaq sahəsi, Siyəzəndə (doğulduğu yerdə) böyük villası var. Oğlu şəhər qeydiyyatında olduğu halda, Zığ qəsəbəsində yerləşən Hərbi Dəniz Qüvvələrində xidmət edib. Keçmiş vergilər naziri Fazil Məmmədovla qurulan işbirliyi hesabına hərbiyə kömək məqsədilə “Atabank”dan Z.Niftəliyevin adına 90 milyon manat pul götürülüb. Sonradan qanunsuz maliyyə maxinasiyasını hərbi prokurorluq aşkarlayıb, iş araşduruldıqdan sonra məhkəməyə verilib. İlkin istintaq zamanı məlum olub ki, ayrılan 90 milyon manat vəsaitin 38 milyon manatını Z.Niftəliyev mənimsəyib.
Zahid Niftəliyevin geniş fəaliyyəti Müdafiə Nazirlyinin strukturlarına rəhbər şəxslərin təyinatı ilə də davam etdirilib. Məlum olur ki, onlarla korpus və birliklərə komandirlərin təyinatını Z.Niftəliyev həyata keçirib. Məhz onun dəstəyi hesabına dayısı oğlunun komandir olduğu 1-ci korpusa bacısı oğlu da gizir təyin olunub.
Nəcməddin Sadıqovun yaxın adamı hesab olunan bu şəxs daima şlyapada gəzdiyi üçün hərbçilər arasında “şlyapa” ləqəbi ilə də tanınıb.
Baş Prokurorluq Zahid Niftəliyevin qanunsuz əməllərindən zərər çəkmiş şəxslərə Hərbi Prokurorluğa müraciət etməyi tövsiyə edir.
Müdafiə nazirinin sabiq müavini, ehtiyatda olan polkovnik Mehman Səlimovun “Şlyapa Zahid” deyilən bu şəxslə bağlı maraqlı qeydlərinə rast gəlmək mümkündür: “ Zahid Niftəliyevi hələ I Qarabağ savaşı zamanı, 1992- ci ilin yayından o vaxt 703 saylı briqadanın komandiri olan Nəcməddin Sadıqovun yanında görmüşdüm. Onda Zahid Nəcməddinin sürücüsü idi. Bir müddət keçdikdə korpus komandiri və Baş Qərargah rəisi olandan sonra Nəcməddin ona qol-qanad verdi, bütün “qara” işlərini; kadr “siyasət”ini, hərbi komissarlıqlardan haqq alıb-verməyi Zahid həll edirdi. Pul-paranın hamısını o toplayıb çatdırırdı. Özü də Zahid Niftəliyev hərbçi deyildi, mülki idi. Son illərədək “Şlyapa Zahid” hər hansı idarə rəisi, hərbi hissə komandiri, eləcə də hərbi komissarlıq rəhbərinin və s. yanına girib ona Nəcməddinin adından istənilən göstərişi verir, birini vəzifəyə qoydurur, o birini çıxardır, “hesab” alırdı. O, Baş Qərargah rəisinin qeyri-rəsmi səlahiyyətli nümayəndəsi idi. Hansısa idarə rəhbəri, komandir, hərbi komissar nəyəsə yox deyəndə Nəcməddin Sadıqov onu bir neçə gün içərisində sıradan çıxarırdı. Ona görə də hamı bilirdi ki, Zahid gəldi, yaxud Nəcməddin gəldi – fərqi yoxdur”.
Mehman Səlimov daha sonra bildirib ki, 1990-cı illərin əvvəllərindən bəri Azərbaycan Silahlı Qüvvələrinin inkişaf prosesini əngəlləyən yalnız Nəcməddin Sadıqov olmayıb, bəzi keçmiş nazirlərin özü də ona yardımçı olub: “Bu, Rusiyadan, Moskvadan idarə olunan proses idi. Əvvəllər Nəcməddin bəzi məsələlərdə nazirlə qarşıdurmaya getsə də, əslində hər ikisi bir yerdə Kremlə işləyir, eyni vəzifəni – Azərbaycan ordusunu çökdürmək vəzifəsini icra edirdilər. Amma Zahid Niftəliyevin həbsindən sonra mənim də haqq-ədalətin bir az gec də olsa, qalib gələcəyinə inamımı artırıb”.
Göründüyü kimi, “Şlyapa Zahid”in barəsində verilən həbs qərarı Nəcməddin Sadıqovun da başının üstünü qara buludların aldığına bir işarə sayıla bilər.
Məhəmmədəli QƏRİBLİ
