Ermənistandan Rusiyaya gedən yüzlərlə TIR iki həftədən çoxdur ki, Gürcüstan ərazisində, Yuxarı Lars keçid məntəqəsində qalıb, sərhədi keçə bilmir.
Ermənistanın daşıma şirkətlərinin rəhbərləri mövcud vəziyyətin siyasi proseslərlə bağlı olduğunu bildirirlər.
Lakin erməni hökumətinin səlahiyyətliləri bu iddianı qəbul etmir, problemin sərhəd-keçid məntəqəsinin məhdud imkanları ilə əlaqəli olduğunu deyir.
Ermənistanın “Green Way” logistika şirkətinin direktoru Yevgeniya Kazumyan qeyd edib ki, onların yük maşınları iki həftədən çoxdur Gürcüstanda qalıb. Onun sözlərinə görə, Belarus və Rusiyadan gələn ağır yük maşınları da oxşar vəziyyətdədir, lakin türkləri tez buraxırlar:
“Gürcüstan tərəfi bunun səbəbini açıqlamır, ola bilsin ki, problem siyasi müstəvidədir”.
O vurğulayıb ki, Ermənistan hakimiyyəti növbədə dayanan və müxtəlif problemlərlə üzləşən daşıyıcılara kömək etmək üçün heç bir iş görmür. Kazumyan qeyd edib ki, erməni yük maşınlarının 12 kilometrlik növbəsi yaranıb. Bundan əlavə, sürücülər Gürcüstanda fasilələrə görə gündə 80 lari (təxminən 28 dollar) ödəyirlər.
Göründüyü kimi, erməni daşınma şirkətləri yaranmış vəziyyətin səbəbini siyasi motivlə izah etməyə çalışırlar. Bu yöndə Gürcüstanın hansı məqsədlə edilən siyasi təzyiqindən söhbət gedə bilər?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, yaranmış vəziyyətdə siyasi amillərin böyük rolu var: “Gürcüstan uzun müddətdir ki, Avropaya doğru yön götürüb. Hətta bu istiqamətdə ciddi addımlar da atıb. Hazırda Ukrayna ilə bağlı yaşananlar Gürcüstanın başına
2009-cu ildə gəldi. Həmin vaxtda Rusiya Gürcüstana açıq müharibə elan etdi. Hətta hərbi təcavüz də oldu. Hazırda Rusiya bənzər addımları Ukraynada atır. Avropa və ABŞ buna müqavimət göstərir. Rusiyaya hər cür təzyiqləri göstərirlər. Bunlatdan ən başlıcası sanksiyalardı. Gürcüstan yaxın coğrafiyada olduğu üçün konkret anti-Rusiya mövqeyi sərgiləyə bilmir. Ancaq bu məsələdə Avropa ilə birlikdə olduğunu nümayiş etdirir. Gürcüstan Prezidenti Salome Zurabişvilinin Müstəqillik Günü münasibətilə Tbilisidə Azadlıq meydanında keçirilən təntənəli mərasimdə çıxışı zamanı dediklərinə diqqət edək:
“Gürcüstan üçün Avropa yolunda tarixi imkan yaranıb. Bu yol qan tökmədən və qurbanlarsız mümkün olmayıb, əcdadlarımız tərəfindən salınıb. Biz və Avropa bu ənənələri davam etdirməliyik. Biz yaxşı anlamalıyıq ki, bu dəyərlərin qorunması diqtə olunmuş iradənin yerinə yetirilməsi, milli identikliyin itirilməsi deyil, Avropaya yaxınlaşmaq özümüzə qayıdışdır. Bu gün yaranmış real şansı əldən versək, nə əcdadlarımız, nə də gələcək nəsil bunu bizə bağışlayar”.
İki gün əvvəl edilən çıxışdan hər şey məlum olur. Gürcüstan qarşısında yeni vəzifələrin durduğunu onlar anlayır. Bunun üçün də uzaqgörənlik edib, Rusiyaya bu yöndə təzyiqlər edirlər. Əslində bu, Ermənistana deyil, Avropanın tələbi ilə Rusiyaya edilən təzyiqdir. Sadəcə, Ermənistana məxsus yük maşınları da həmin burulğana düşüb. Martın 3-də Gürcüstan Avropa İttifaqına üzvlüyə namizəd ölkə olması üçün müraciət edib. Bu, Gürcüstan tarixində tamamilə yeni mərhələnin başlanğıcı olub. Buna görə də, Gürcüstan heç vaxt Rusiyaya meyl etməyəcək”.
Məhəmmədəli QƏRİBLİ
