Dövlət Gömrük Komitəsinin sədri Səfər Mehdiyev deputatların xaricdən məhsul gətirib satdığını deyib. S.Mehdiyev mətbuata müsahibəsində malların rüsumsuz idxal limitinin 1000 dollardan 300 dollara endirilməsi, bununla bağlı ictimaiyyətdə yaranan narazılıq və deputatların bu dəyişikliyin əleyhinə çıxması haqda sualı cavablandırıb.
DGK sədri qeyd edib ki, deputatlar özləri qanunsuz bizneslə məşğul olduqları üçün bu dəyişikliyə etirazlarını bildiriblər: “Sizə səbəbi izah edim. Çünki Milli Məclisin bəzi deputatları bu qanunsuz biznesdə iştirak edirdilər. Və qərar onların maraqlarına toxunurdu. Ölkəyə hər şeydən xəbərsiz vətəndaşın adına elektrik texnikası daxil olurdu, sonra mağazaların piştaxtalarından elə həmin vətəndaşlara kredit xətti ilə satılırdı. Həmin deputatların parlamentdəki emosional çıxışlarından sonra xeyli təəccübləndim və məyus oldum. Əsl səbəbi anlaya bilmirdim.
Ancaq bir az araşdırandan sonra aydın oldu ki, həmin deputatlar ölkəyə vətəndaşların adına telefonlar, televizorlar, kompüterlər gətirir, sonra isə mağazalarda satdırırlar. Bu fırıldaqçılar nə edirdilər? Öz maraqlarını qoruyurdular.
Hər bir vətəndaş özü ilə 800 dollar gətirə və 300 dollar məbləğində poçt alınmaları edə bilər. Manat ekvivalentində bu, təqribən 2 min manatdır. Doğrudanmı vətəndaş hər ay 2 min manatlıq elektron alış-veriş edir? Əlbəttə, yox. Azərbaycanda minimal və orta əmək haqqını nəzərə alaraq ədalətli hədd müəyyənləşdirilib”.
Bir dövlət məmuru kimi Səfər Mehdiyevin bu məsələ ilə bağlı ortaya qoyduğu prinsipial mövqe təqdir ediləndir. Çünki çox az sayda məmurlar yaranmış neqativliyi öz adı ilə səsləndirir. Diqqət çəkən digər məqam isə deputatların səlahiyyət hədlərini aşaraq, qanunları kobud şəkildə pozmasıdır. Onların bu cür fəaliyyəti deputat adına xələl gətirmiş olurmu?
Uzun müddət parlamentdə deputat kimi təmsil olunan Milli Dirçəliş Hərəkatı Partiyasının sədri Fərəc Quliyev “Bakı-Xəbər”ə açıqlamasında bildirdi ki, bu çox ciddi və cəsarətli çıxışdır: “Bu həm də Səfər Mehdiyevin özünə əminliyini göstərir. Başladığı islahatları davam etdirmək niyyətini ortaya qoyur. Heç kimə güzəştə getmək niyyətinin olmadığı təəssuratını yaradır. Doğru olaraq, hamını qanun qarşısında bərabər olmağa çağırır. Mən onun bu mövqeyini çox bəyəndim. Parlamentdə təmsil olunanda və ondan sonrakı dönəmdə də bildirmişəm ki, məmurlar mütləq şəkildə əmlak bəyamnaməsini təqdim etməlidirlər. Doğrudur, seçki prosesində deputatlığa namizədlər belə bir sənədi təqdim edirlər. Sonradan bəzi deputatların bizneslə məşğul olması üzə çıxır. Komitə sədri də konkret faktlara əsaslanaraq buna işarə edib. Hesab edirəm ki, belə hallar bir çox fəsadlar törədir. Hətta süni şəkildə qiymətlərin qaldırılması ilə nəticələmir. Bazarın doymasında monopolistlərin rolu kifayət qədər yüksək olur. Bura vergidən yayınma məsələlərini də aid edə bilərik. Mövqelərindən istifadə edən məmurlar və deputatlar icra strukturlarına təzyiq göstərirlər ki, qanunsuz tələbləri yerinə yetsin. Prokurorluq bir çox məmurları həbs edəndə onların kifayət qədər varidatının üzə çıxdığının şahidi olduq. Bəzi sabiq deputatlar da məsuliyyətə cəlb olunanda onların bizneslə məşğul olmalarına dair ciddi faktlar üzə çıxdı. Komitə sədrinin bu cəsarətli mövqeyi hər kəs tərəfdən təqdir edilməlidir. Eyni zamanda başqalarına dərs olmalıdır ki, heç kimdən çəkinmədən konkret mövqe ortaya qoymaq lazımdır. Biz həqiqətən islahat istəyiriksə, həmin monopolist piramidanın ləğvinə nail olmalıyıq. Kimlərəsə güzəştlər olacaqsa, islahatlar tormozlanacaq. Komitə sədrinin əlində konkret faktlar olmasa belə fikirlər səsləndirməz”.
Partiya sədri daha sonra qeyd etdi ki, Dövlət Gömrük Komitəsinin əvvəlki rəhbərliyinin fəaliyyəti ilə indikini müqayisə edəndə ortaya ciddi faktlar çıxır: “Məhz yeni rəhbərliyin fəaliyyəti nəticəsində qısa müddət ərzində büdcəyə 1 milyarddan artıq vəsait köçürüldü. Bunun özü ciddi islahatların getdiyindən xəbər verir”.
Məhəmmədəli QƏRİBLİ
