"İlham Əliyev Azərbaycanın İƏT-də həm iqtisadi, həm də təşkilatçı - inteqrasion güc olduğunu sübut edir" - Aydın Quliyev

img

İqtisadi Əməkdaşlıq Təşkilatının (İƏT) Aşqabadda 15-ci Zirvə toplantısı Azərbaycanın uğurla üzvlük və iştirak etdiyi əhəmiyyətli beynəlxalq hadisədir. Prezident İlham Əliyevin İƏT Zirvəsində çıxışı Azərbaycanın regional beynəlxalq əməkdaşlığa verdiyi töhfələri dəyərləndirmək baxımından çox əhəmiyyətli  mənbədir.

Azərbaycan Prezidentinin Zirvədəki məruzəsi sadəcə bir üzv ölkənin dövlət başçısının növbəti çıxışı deyil. İlham Əliyev Azərbaycan kimi böyük siyasi, iqtisadi və diplomatik uğurları olan ölkənin İƏT-i bir təşkilat olaraq daha da gücləndirmək üçün nələr etdiyini və hələ bundan sonra da etmək gücündə olduğunu təfsilatı ilə təqdim etdi. Faktlar sübut edir ki, Azərbaycan lideri üzv olduğumuz istənilən beynəlxalq təşkilatın təkmilləşdirilməsinə və güclənməsinə əhəmiyyətli qatqılar vermək missiyasını İƏT-də də uğurla aparmaqdadır. Təsadüfi deyil ki, məhz Azərbaycan liderinin ardıcıl və məqsədyönlü səyləri sayəsində İƏT-in Bakıda Tədqiqatlar Mərkəzinin yaradılması reallığa çevrildi və onun nizamnaməsi Təşkilatın bundan əvvəlki Zirvəsində təsdiqləndi. Bu Tədqiqatlar Mərkəzinin aparacağı iqtisadi tədqiqatları üzərində İƏT-in daha yüksək əməkdaşlıq mərhələlərinə çıxmasına təkan verəcəyi şübhəsizdir. Bu mənada İlham Əliyevin Azərbaycanın son illərdəki iqtisadi uğurları barədə detallı təqdimatları İƏT ölkələri üçün çox cəlbedici olacaq. İlham Əliyev Zirvədə bir daha göstərdi ki, bizim ölkəmiz İƏT sisteminə həm özünün hazırkı iqtisadi inkişaf modeli, həm də potensial imkanları ilə dinamik olaraq artan töhfələr verməkdə davam edəcək. Azərbaycan İƏT ölkələri ilə İslam Əməkdaşlığı və Qoşulmama Hərəkatı çərçivəsində də səmərəli əməkdaşlıq edir. Bu formatlar çərçivəsində birgə əməkdaşlıq sayəsində həmin ölkələr Azərbaycanın beynəlxalq iqtisadi inteqrasiya və COVİD-lə milli və qlobal mübarizə işinə nələr töhfə etdiyini yaxşı bilirlər. Lakin üstəlik olaraq bu da deyilməlidir ki, bütün əməkdaşlıq formatlarında "qurucu və təşəbbüskar lider" kimi özünü artıq təsdiq etmiş Azərbaycan Prezidenti İƏT-in inkişafında daha böyük rol oynayacağını bir daha göstərdi.

İƏT Zirvəsində İlham Əliyevin Zəngəzur dəhlizi barədə bəyanatı İƏT-in qarşısında  açılan böyük perspektivləri göstərmək baxımından müstəsna əhəmiyyət kəsb edir. İlham Əliyev Zirvədəki çıxışı ilə göstərdi ki, Azərbaycan Zəngəzur dəhlizinin timsalında İƏT- in qarşısında yeni böyük şans açıb. Prezident Əliyevin "Zəngəzur dəhlizi Şərq-Qərb və Şimal-Cənub nəqliyyat marşrutlarının mühüm elementi olacaq" "İƏT ölkələri dəhlizin imkanlarından  faydalanacaq" kimi bəyanatları Azərbaycanın hərbi-siyasi və diplomatik uğurları hesabına həqiqətən İƏT-in qarşısında böyük inkişaf perspektivinin açıldığını deməyə əsas verir. Məlumdur ki, İƏT Zirvəsindən cəmi iki gün əvvəl Azərbaycan lideri Soçi görüşündə Zəngəzur dəhlizinin qaçılmaz reallığa çevrilməsi üçün müstəsna əhəmiyyətə malik daha bir təminat aldı. İƏT üzvləri olan Əfqanıstan, Pakistan, İran və Mərkəzi Asiya dövlətlərinin Şimal-Cənub, Şərq-Qərb nəqliyyat dəhlizlərinə praktik faydalılıq prinsipi ilə bağlı olduqlarını nəzərə alsaq İlham Əliyevin Soçidə nail olduğu bu təminatın əhəmiyyətinin miqyasca nə qədər boyüdüyünü görmək mümkündür.

İlham Əliyevin addım-addım irəlilədiyi Zəngəzur dəhlizi tək Azərbaycana yox, bütün İƏT təşkilatına böyük uğurlar gətirəcək.

Azərbaycanın İƏT təşkilatında həm böyük iqtisadi, həm də təşkilatçı - inteqrasion güc olduğunu Prezident Əliyevin fəaliyyətləri bir daha sübut edir.

Aydın QULİYEV

Son xəbərlər