Putin Soçidə Paşinyana da sülh rəmzli hədiyyə verməklə düzmü etdi?..

Rusiya Prezidenti Vladimir Putin Soçidə keçirilən üçtərəfli görüşün yekunları ilə bağlı keçirilən birgə mətbuat konfransında Azərbaycan Prezidenti İlham Əliyevə və Ermənistan baş naziri Nikol Paşinyana zeytun budaqları təsvir edilən suvenir hədiyyə verib.

V.Putin vurğulayıb ki, zeytun budağı sülhün və rifahın rəmzidir.

Zeytun budağı qədim yəhudi, xristian və islam ənənələrində sülh, qələbə, sevinc, bolluq, saflıq, iffət və ölməzliyi simvollaşdırır. 

Azərbaycan sülhə hər zaman hazırdır və bunu öz əməlləri, davranışları ilə göstərib, bu halda Azərbaycan Prezidentinə sülh rəmzi olan  zeytun budaqları təsvir edilən suvenirin verilməsi tam təbii idi. Putin Soçidə Paşinyana da sülh rəmzli hədiyyə verməklə düzmü etdi?..

Qarabağ Azadlıq Təşkilatının (QAT) sədri Akif Nağı baki-xeber.com-a bildirdi ki, ümumiyyətlə Rusiyanın sülh təşəbbüsləri ilə çıxış etməsi, bu təşəbbüslərin tərəfləri sülhə gətirəcəyi görüntüsünün yaradılması o qədər də düzgün yanaşma deyil. A.Nağının fikrincə, illərdir Rusiyanın Qarabağda oynadığı rolla bağlı mövqelər, münasibətlər aydındır, hər kəsin bu barədə bilgisi var. “Hesab edirəm ki, indiki situasiyada da Rusiyanın sülhməramlı qüvvələri bölgəyə yerləşdirilibdir. Amma Rusiya burada sülhməramlı rolu oynayır, yoxsa yox? Bu ciddi sual doğuran məsələdir. Soçidə Azərbaycan Prezidenti ilə Ermənistanın baş nazirinin görüşdürülməsi, orada gedən söhbətlər, müzakirələr də prosesin Rusiyanın təşəbbüsü ilə real sülhə doğru getdiyini göstərmir. Bu gerçəklikdir. Orada da Rusiyanın özünü sülhpərvər kimi göstərərək hər iki tərəfə zeytun budaqları təsvir edilən suvenir hədiyyə etməsi, bununla da tərəfləri sülhə çağırması fikrimcə, o qədər də mahiyyətə, reallığa uyğun deyil. Təbii ki, Azərbaycan Ermənistandan fərqli olaraq həmişə sülh tərəfdarı kimi çıxış edib. 30 il ərzində Azərbaycan dəfələrlə Ermənistana və onun arxasında dayananlara məsələnin sülh yolu ilə həll edilməsini və sülh müqaviləsi imzalamağı təklif edib. Azərbaycanın sülh çağırışlarına, problemin sülhlə həll edilməsi təkliflərinə Ermənistanın əhəmiyyət verməməsinə və  bu ölkənin təxribatına cavab verərək Azərbaycan  hərbi əməliyyatlara başlamışdı. Azərbaycan sona qədər sülh variantına sadiq qaldı. Sonda da yenidən Ermənistanın yeni hərbi təcavüz davranışı ilə rastlaşdıq. Ermənistanda aşağıdan yuxarıya “yeni hücum, yeni ərazilər” tezisi ortaya atıldı və bu ölkənin hərbi-siyasi rəhbərliyinin təxribatlarına cavab olaq Azərbaycan hərbi əməliyyatlar keçirdi. Paşinyan da, onun xarici işlər naziri də, müdafiə naziri də müharibə istəyirdilər. Müharibə baş verdi və Azərbaycan öz torpaqlarını işğaldan azad etdi. Azərbaycanın bu 30 ildə göstərdiyi dözümə, sülh siyasəti yeritdiyinə, sülh tərəfdarı olduğuna və bu gün də sülh mövqeyindən çıxış etdiyinə görə Azərbaycan Prezidentinə sülh simvolu olan suvenirin hədiyyə edilməsi tam məntiqə uyğundur.  Amma Putinin Azərbaycan Prezidenti ilə yanaşı Paşinyana da sülh simvolu olan suvenir verməsi heç yerinə düşmür və məntiqə sığmır. Bu simvolik sülh suveniri Ermənistana verilib, amma nə Ermənistan, nə də Paşinyan sülh simvolu olan hədiyyəyə layiq deyil. Çünki Paşinyan heç zaman sülh tərəfdarı kimi çıxış etməyib”.

A.Nağı xatırlatdı ki, Paşinyan Azərbaycanı dəfələrlə təhdid edib, əvvəllər Şuşada o cür oyunlardan çıxıb, ağılagəlməz hərəkətlər törədib, müharibə bəyanatları səsləndib, Azərbaycanın yeni ərazilərinə iddialar irəli sürürdü, Gəncəni hədəfə götürmüşdü. “Bunu gizlətmirdi, Azərbaycana qarşı tam militarist mövqedən çıxış edirdi. Ermənistan cəmiyyəti özü də həmişə Azərbaycana qarşı barışmaz mövqe sərgiləyib. Ermənistan Qriqoryan kilsəsi indinin özündə də Azərbaycana qarşı revanşist mövqedən çıxış edir, müharibəni təşviq etməklə məşğul olur. Yəni bütövlükdə Ermənistan hakimiyyəti, Ermənistan cəmiyyəti, erməni kilsəsi Azərbaycana qarşı düşmənçilik edir və hərbi əməliyyatların yenidən başlanılması mövqeyindədirlər. Bu gün onlar məcburiyyət qarşısında özlərini məzlum kimi göstərirlər, Azərbaycanın qoyduğu tələblərin müəyyən bir hissəsini yerinə yetirirlər. Amma yenə də onların içərisində Azərbaycana qarşı hərbi əməliyyatlara yenidən başlamaq cəhdləri var”.
A.Nağı deyir ki, hazırda müvəqqəti olaraq rus sülhməramlılarının nəzarəti altında olan ərazilərimizdə Rusiyanın dəstəyi ilə erməni silahlı dəstələri yaradılır, bu silahlı dəstələri birbaşa Ermənistan yaradır. Ermənistan tərəf indiyə qədər Azərbaycana qarşı çox təxribatlar, hərbçilərimizə qarşı xoşagəlməz hallar törədib, bundan sonra da ondan hər cür təxribatlar gözlənilir. A.Nağı bu baxımdan hesab edir ki, Rusiya prezidenti bunları bildiyi halda bu addımı atmalı deyildi: “Ermənistanın, Ermənistan vətəndaşlarının Azərbaycana qarşı törətdiyi cinayətlərə görə, birabaşa məsuliyyəti Paşinyan daşıyır. Ona görə də, Paşinyana elə bir simvolun verilməsi qətiyyən yerinə düşmür. Paşinyan sülh tərəfdarı deyil, belə görünür ki, o sülhü qəbul etməyəcək də, Azərbaycana qarşı yenə də təxribatlar törədəcək. Bu səbəbdən də Rusiya prezidentinin zeytun budaqları təsvir edilən suveniri Paşinyana da verməklə Azərbaycan Prezidenti ilə Paşinyanı eyniləşdirmək, eyni müstəviyə qoymaq, hər ikisinə eyni yanaşma sərgiləmək mövqeyi qətiyyən qəbul edilməzdir, bu düzgün deyil. Fikrimcə, Rusiya da bu mövqeyinə yenidən baxmalıdır” - deyə A.Nağı vurğuladı.

İradə SARIYEVA